Да се живее според христијанското предание во слобода

„Каде што е Духот Господов, таму има слобода“ (2. КОРИНТЈАНИТЕ 3:17).

1. Кому му се предадени Јеховините сведоци, и зошто користат законски застапништва?

ЈЕХОВИНИТЕ СВЕДОЦИ веруваат дека нивната религија ќе трае засекогаш. Затоа, тие очекуваат да му служат на Бог „со дух и со вистина“ во сета вечност (Јован 4:23, 24). Како лица со слободна волја, овие христијани извршиле безрезервно предание на Јехова Бог и одлучни се да живеат според него. За таа цел, тие се потпираат на Божјата Реч и на неговиот свет дух. Додека со цело срце го следат својот правец на христијанско предание во слободата дадена од Бог, Сведоците покажуваат должно почитување кон улогата на владините ‚виши власти‘ (NW) и правилно ги користат законските средства и подготовки (Римјаните 13:1; Јаков 1:25). На пример, Сведоците го користат Watch Tower Society како законски инструмент — еден од многуте во различни земји — за да им овозможи да го извршат своето дело на помагање на солуѓето, особено на духовни начини. Но, Сведоците му се предадени на Бог, а не на некое законско застапништво, и нивното предание на Јехова ќе трае засекогаш.

2. Зошто Јеховините сведоци многу ги ценат Watch Tower Society и сличните законски застапништва?

² Како слуги предадени на Бог, Јеховините сведоци се обврзани да ги следат Исусовите упатства да ги ‚научат сите народи, крштавајќи ги во името на Отецот, и Синот, и Светиот Дух, учејќи ги‘ (Матеј 28:19, 20). Ова дело ќе продолжи сѐ до крајот на системот на ствари, зашто Исус исто така рекол: „Ќе биде проповедано ова Евангелие за царството по целиот свет, за сведоштво на сите народи; и тогаш ќе дојде крајот“ (Матеј 24:3, 14). Секоја година, погоните за печатење на Watch Tower Society и сличните законски тела ги снабдуваат Јеховините сведоци со милиони Библии, книги, брошури и списанија за употреба во нивната проповедничка активност ширум светот. Затоа, овие законски ентитети се непроценливи во помагањето на предадените Божји слуги да живеат според своето предание на него.

3. Во која смисла Јеховините сведоци порано го користеле терминот „Заедницата“?

³ Можеби некои аргументираат дека начинот на кој Сведоците зборуваат за Watch Tower Society — или почесто само за „Заедницата“ — покажува дека тие гледаат на неа како на нешто повеќе отколку само како на законски инструмент. Зарем не ја сметаат неа како краен авторитет во врска со обожавањето? Книгата Jehovah’s Witnesses—Proclaimers of God’s Kingdom ја разјаснува оваа поента, објаснувајќи: „Кога Стражарска кула [1 јуни 1938] укажала на ‚Заедницата‘, тоа не значело само законско посредство туку и телото од помазани христијани кое го формирало тој законски ентитет и го користело“.a Затоа, тој израз го претставувал ‚верниот и разборит роб‘ (Матеј 24:45, NW). Во таа смисла Сведоците обично го користат терминот „Заедницата“. Секако, терминот „законска корпорација“ и терминот ‚верниот и разборит роб‘ не се меѓусебно заменливи. Директорите на Watch Tower Society се избираат додека, пак, Сведоците кои го сочинуваат ‚верниот роб‘ се наименувани од Јеховиниот свет дух.

4. а) Како се изразуваат многу Сведоци за да избегнат недоразбирања? б) Зошто треба да бидеме урамнотежени во однос на терминологијата?

⁴ За да избегнат недоразбирања, Јеховините сведоци се обидуваат да бидат внимателни во врска со тоа како се изразуваат. Наместо да велат: „Заедницата учи“, многу Сведоци претпочитаат да користат такви изрази како што се: „Библијата вели“ или „Јас сфаќам дека Библијата учи“. На тој начин ја нагласуваат личната одлука што ја донел секој Сведок прифаќајќи ги библиските учења и со тоа избегнуваат да остават погрешен впечаток дека Сведоците некако се обврзани од диктирањата од некоја религиозна секта. Се разбира, предлозите во поглед на терминологијата никогаш не би требало да станат предмет на контроверзија. Најпосле, терминологијата е важна само до оној степен до кој ги спречува недоразбирањата. Потребна е христијанска рамнотежа. Библијата силно нѐ опоменува ‚да не се препираме‘ (2. Тимотеј 2:14, 15). Исто така, Писмото го наведува овој принцип: „Ако со јазикот свој не изговарате разбирливи зборови, како ќе се разбере она што го зборувате?“ (1. Коринтјаните 14:9).

Божјиот дух ја смалува потребата од правила

5. Како треба да се разбере 1. Коринтјаните 10:23?

⁵ „Сѐ ми е позволено [законски, NW], но не е сѐ полезно“, забележал апостол Павле. Тој додал: „Сѐ ми е позволено, но не е сѐ за поука [не изградува, NW]“ (1. Коринтјаните 10:23). Очигледно, Павле не мислел дека е законски да прави работи кои Божјата Реч јасно ги осудува. Во споредба со околу 600 закони кои му биле дадени на древниот Израел, постојат релативно малку категорични заповеди кои го регулираат христијанскиот живот. Според тоа, многу работи се оставени на совеста на поединецот. Едно лице кое извршило предание на Јехова ја ужива слободата која резултира од водството преку Божјиот дух. Со тоа што ја направил вистината своја своина, христијанинот ја следи својата библиски школувана совест и се потпира на Божјето упатство преку светиот дух. Тоа му помага на предадениот христијанин да одреди што ќе „изградува“ и што ќе биде „полезно“ за него и за другите. Тој сфаќа дека одлуките кои ги донесува ќе влијаат врз неговиот личен однос со Бог, кому му се предал.

6. Како на христијанските состаноци можеме да покажеме дека сме ја направиле вистината наша своина?

⁶ Еден Сведок покажува дека ја направил вистината своја своина преку коментирањето на христијанските состаноци. Отпрвин, можеби го рецитира она што е наведено во публикацијата што се проучува. Меѓутоа, со текот на времето тој ќе напредува до тој степен што ќе ги изразува библиските учења со свои сопствени зборови. На тој начин, тој дава доказ дека ја развива својата способност на размислување, не само повторувајќи го она што го рекле другите. Формулирањето на мислите со свои сопствени зборови и изразувањето на точните зборови на вистината на еден срдечен начин, ќе му донесе задоволство и ќе покаже дека тој е уверен во сопствениот ум (Проповедник 12:10; спореди Римјаните 14:5б).

7. Какви одлуки доброволно донеле некои Јеховини слуги?

⁷ Јеховините сведоци се мотивирани од љубов кон Бог и кон своите солуѓе (Матеј 22:36—40). Точно, тие се тесно соединети преку врската на љубовта слична на Христовата, како здружение на браќа ширум светот (Колосјаните 3:14; 1. Петрово 5:9). Но, како лице со слободна волја, секој лично одлучил да ја објавува добрата вест за Божјето Царство, да остане политички неутрален, да се воздржува од крв, да избегнува извесни видови забава и да живее според библиските мерила. Ова не се одлуки на кои е присилен. Тоа се одлуки кои спаѓаат во структурата на еден начин на живот кој е доброволно избран од страна на потенцијалниот Сведок уште пред воопшто да го преземе чекорот на христијанско предание.

Одговорни пред Водечко тело?

8. Кое прашање треба да се разјасни?

⁸ Библијата јасно покажува дека вистинските христијани не му служат на Бог присилно. Таа вели: „Господ е Дух; а каде што е Духот Господов, таму има слобода“ (2. Коринтјаните 3:17). Но, како овој факт може да се усклади со идејата за еден „верен и разборит роб“ со неговото Водечко тело? (Матеј 24:45—47, NW).

9, 10. а) Како принципот за поглаварство се применува во христијанското собрание? б) Што наложило следењето на принципот за поглаварство во христијанското собрание од првиот век?

⁹ За да одговориме на ова прашање, мораме да го задржиме на ум библискиот принцип за поглаварство (1. Коринтјаните 11:3). Во Ефесјаните 5:21—24 Христос е идентификуван како „глава на Црквата“, оној кому таа му е ‚покорна‘. Јеховините сведоци сфаќаат дека верниот и разборит роб го сочинуваат Исусовите духовни браќа (Евреите 2:10—13). Оваа класа на верниот роб е наименувана за да го обезбедува Божјиот народ со духовна „храна во право време“. Во ова време на крајот, Христос го наименувал овој роб „над сиот свој имот“. Затоа, неговата позиција го заслужува почитувањето од секој кој тврди дека е христијанин.

¹⁰ Целта на поглаварството е да го сочува единството и да осигура „сѐ да се врши како прилега и уредно“ (1. Коринтјаните 14:40). За да се постигне ова во првиот век, биле избрани извесен број помазани христијани од класата на верниот и разборит роб за да ја претставуваат целата група. Како што докажале последователните настани, надгледувањето спроведувано преку тоа водечко тело од првиот век имало Јеховино одобрување и благослов. Христијаните од првиот век радо го прифатиле тоа уредување. Да, тие всушност му изразиле добредојде и биле благодарни за убавите резултати кои тоа ги произвело (Дела 15:1—32).

11. Како треба да се гледа на денешното Водечко тело?

¹¹ Вредноста на едно такво уредување сѐ уште постои. Моментално, Водечкото тело на Јеховините сведоци е составено од десет помазани христијани, од кои сите зад себе имаат децении христијанско искуство. Тие им нудат духовно водство на Јеховините сведоци, како што правело водечкото тело од првиот век (Дела 16:4). Како и раните христијани, Сведоците радо се потпираат на зрелите браќа од Водечкото тело за библиски темелено упатство и водство во врска со обожавањето. Иако членовите на Водечкото тело се робови на Јехова и на Христос, како што се и нивните сохристијани, Библијата нѐ поучува: „Покорувајте им се на наставниците ваши и бидете послушни, оти тие, бидејќи се задолжени да одговараат, бдеат за вашите души, — та со радост тоа да го вршат, а не со воздишки, зашто тоа не е полезно за вас“ (Евреите 13:17).

12. Кому мора да му поднесе извештај секој поединечен христијанин?

¹² Дали позицијата на надгледување што Писмото му ја доделува на Водечкото тело значи дека секој Јеховин сведок мора нему да му поднесува извештај за своите дела? Не — според Павловите зборови до христијаните во Рим: „Зошто го осудуваш братот свој! Или ти, што го укоруваш братот свој? Зашто сите ќе застанеме пред судот Христов [Божји, NW] . . . секој од нас ќе одговара пред Бога за себе“ (Римјаните 14:10—12).

13. Зошто Јеховините сведоци ја известуваат својата проповедничка активност?

¹³ Меѓутоа, зарем не е точно дека од Сведоците како поединци се очекува да ја известат својата проповедничка активност? Да, но целта на тоа јасно е објаснета во еден прирачник на Сведоците, кој вели: „Раните следбеници на Исус Христос покажувале интерес за извештаите за напредокот во проповедничкото дело (Марко 6:30). Како што делото просперирало, биле составувани статистички извештаи со записи за истакнати искуства на оние кои имале удел во проповедањето на добрата вест . . . (Дела 2:5—11, 41, 47; 6:7; 1:15, 16а; 4:4) . . . Колку само било охрабрувачки за тие верни христијански работници да ги чујат извештаите за она што било постигнато! . . На сличен начин, Јеховината современа организација настојува да води прецизна евиденција за делото што се извршува во исполнување на Матеј 24:14“.

14, 15. а) Како 2. Коринтјаните 1:24 се применува на Водечкото тело? б) На која основа христијаните како поединци мораат да донесуваат лични одлуки, во знак на признание на кој факт?

¹⁴ Водечкото тело е една подготовка полна со љубов и пример на вера кој е вреден за имитирање (Филипјаните 3:17; Евреите 13:7). Со тоа што не отстапуваат од Христос и го следат како модел, тие можат да ги одѕвонуваат Павловите зборови: „Не како ние да владееме со верата ваша, туку сме помагачи на вашата радост, бидејќи во верата вие сте тврди“ (2. Коринтјаните 1:24). Набљудувајќи ги трендовите, Водечкото тело свртува внимание кон користите од внимавањето на библискиот совет, нуди предлози во врска со применувањето на библиските закони и принципи, предупредува на прикриените опасности и ги обезбедува ‚соработниците‘ со потребното охрабрување. На тој начин, тоа го исполнува своето христијанско управителство, им помага да ја задржат својата радост и ги изградува во верата за да можат да стојат цврсти (1. Коринтјаните 4:1, 2; Тит 1:7—9).

¹⁵ Доколку некој Сведок донесува одлуки на темел на библискиот совет кој го нуди Водечкото тело, тоа го прави по сопствена желба бидејќи неговото лично проучување на Библијата го уверило дека тоа е исправниот правец. Секој Сведок е под влијание на Божјата сопствена Реч за да го примени здравиот совет од Писмото кој го нуди Водечкото тело, целосно признавајќи дека одлуките што ги донесува ќе влијаат врз неговиот личен однос со Бог, кому тој му е предаден (1. Солунјаните 2:13).

Студенти и војници

16. Иако одлуките во врска со однесувањето се лична работа, зошто некои се исклучени?

¹⁶ Но, доколку одлуките во врска со однесувањето се лична работа, зошто некои Јеховини сведоци се исклучени? Никој самоволно не одредува дали практикувањето на некој особен грев бара исклучување. Наместо тоа, оваа постапка се бара по Писмото само кога некој член на собранието непокајнички се впушта во тешки гревови, како што се оние кои се наброени во 5. поглавје од Првото послание до Коринтјаните. Според тоа, иако некој христијанин може да биде исклучен заради практикување блуд, ова се случува само доколку поединецот одбива да ја прифати духовната помош од пастирите кои се полни со љубов. Јеховините сведоци не се единствени во следењето на оваа христијанска практика. The Encyclopedia of Religion забележува: „Секоја заедница го полага правото да се заштити од оние членови што не се повинуваат, кои можеби ја загрозуваат општата благосостојба. Во религиозна рамка, ова право честопати е засилено со верувањето дека санкцијата [екскомуникација] влијае врз нечија положба пред Бог“.

17, 18. Како би можела да се илустрира исправноста на исклучувањето?

¹⁷ Јеховините сведоци се студенти на Библијата (Исус Навин 1:8; Псалм 1:2; Дела 17:11). Програмата за библиско образование која ја обезбедува Водечкото тело би можела да се спореди со еден школски наставен план кој е изложен од страна на една комисија за образование. Иако комисијата сама по себе не е изворот на материјалот кој се учи, сепак таа го востановува наставниот план, го одредува методот на поучување и ги издава потребните директиви. Доколку некој очевидно одбива да живее според барањата на таа институција, им создава тешкотии на состудентите или, пак, донесува срам врз училиштето, може да биде истеран. Училишните авторитети го имаат правото да дејствуваат во корист на студентите како целина.

¹⁸ Освен што се студенти, Јеховините сведоци се и војници на Исус Христос, поучени да ‚се борат во добриот подвиг на верата‘ (1. Тимотеј 6:12; 2. Тимотеј 2:3). Се разбира, тврдоглавото однесување кое не му доликува на еден христијански војник може да навлече божествено неодобрување. Како поединец кој е надарен со слобода на избор, еден христијански војник може да одлучи како што сака, но тој мора да ги сноси последиците од својата одлука. Павле резонира: „Ниеден војник не се вплетува во светски работи, за да му угоди на својот началник. А ако, пак, некој војува, сепак венец не добива, бидејќи не се борел според правилата“ (2. Тимотеј 2:4, 5). Зрелите христијани, вклучувајќи ги и оние од Водечкото тело, целосно му остануваат на располагање на својот Водач, Исус Христос, држејќи ги „правилата“ за да можат да ја освојат наградата — вечен живот (Јован 17:3; Откровение 2:10).

19. Со тоа што ги испитавме фактите во врска со христијанското предание, во што можеме да бидеме сигурни?

¹⁹ Зарем фактите не разјаснуваат дека Јеховините сведоци се слуги на Бог, а не робови на луѓе? Како предадени христијани кои ја уживаат слободата за која Христос ги ослободил, тие дозволуваат Божјиот дух и неговата Реч да управуваат со нивните животи додека обединето служат со своите браќа во Божјето собрание (Псалм 133:1, NW). Исто така, доказите за ова треба да ја избришат секоја несигурност во врска со изворот на нивната сила. Заедно со псалмистот, тие можат да пеат: „Господ е крепост моја и штит мој; на Него се надеваше срцето мое и Он ми помогна; затоа се зарадува срцето мое и Јас ќе Го прославувам со сето мое срце“ (Псалм 27:7).

[Фуснота]

Како би одговорил?

◻ Како Watch Tower Society и сличните законски застапништва им помагаат на Јеховините сведоци?

◻ Како христијаните извлекуваат корист од улогата на Водечкото тело на Јеховините сведоци?

◻ Зошто Јеховиниот народ ја известува својата проповедничка активност?

◻ Под какви околности е соодветно исклучувањето на еден предаден христијанин?

[Слика на страница 19]

Водечкото тело од првиот век го сочувало единството на доктрината

[Слика на страница 23]

Ширум светот, Јеховините сведоци ја уживаат слободата за која Христос ги ослободил