Зајакнати да се бориме со искушенијата и со обесхрабрувањето
„Ќе примите сила кога светиот дух ќе дојде врз вас“ (ДЕЛА 1:8)
1, 2. Каква помош им ветил Исус на своите ученици, и зошто ќе им била потребна?
ИСУС знаел дека неговите ученици нема да можат со сопствени сили да го држат сето она што им го заповедал. Било јасно дека ќе им треба натприродна сила бидејќи им претстоело огромно проповедничко дело. Освен тоа, имале големи противници, а морале да се борат и со своите слабости. Затоа, непосредно пред да се вознесе на небото, Исус им го дал следново уверување: „Ќе примите сила кога светиот дух ќе дојде врз вас, и ќе ми бидете сведоци во Ерусалим, во цела Јудеја и Самарија и сѐ до крајот на земјата“ (Дела 1:8).
2 Тоа ветување почнало да се исполнува на Педесетница 33 год. од н.е., кога светиот дух им дал сила на неговите следбеници да проповедаат низ целиот Ерусалим. Никакво противење не можело да ги спречи во тоа (Дела 4:20). „Во сите денови до свршетокот на овој поредок“, на верните следбеници на Исус — вклучувајќи нѐ и нас — ќе им биде неопходна таа сила што ја дава Бог (Мат. 28:20).
3. а) Што е разликата меѓу свет дух и сила? б) Што може да правиме со помош на силата што ни ја дава Јехова?
3 Исус им ветил на учениците дека ‚ќе примат сила кога светиот дух ќе дојде врз нив‘. Зборовите „сила“ и „дух“ имаат различно значење. Божјиот дух е движечка сила која извира од него и со која тој влијае врз луѓе или работи за да се исполни неговата волја. Но, силата може да се дефинира како „потенцијал или способност да се дејствува или да се предизвика некаков ефект“. Таа може да се поседува, но да не се користи сѐ додека не се јави потреба да се оствари некој резултат. Со други зборови, светиот дух би можел да се спореди со електричната енергија со која се полни една батерија, додека силата е енергијата што притоа се складира во батеријата. Силата што преку светиот дух Јехова ни ја дава како на свои слуги ни овозможува да живееме во склад со христијанскиот завет што сме му го дале и, кога е потребно, да им се спротивставиме на лошите влијанија. (Прочитај Михеј 3:8; Колошаните 1:29.)
4. Што ќе разгледаме во оваа статија, и зошто тоа е важно?
4 Како може да се види дека ја имаме силата што ни ја дава светиот дух? Како би можеле да постапуваме и да реагираме под влијание на духот во различни ситуации? Додека се трудиме верно да му служиме на Бог, наидуваме на многу пречки кои ни ги поставува Сатана, неговиот свет или нашето сопствено несовршено тело. Важно е да ги совладаме таквите пречки за да останеме верни како христијани, да продолжиме редовно да проповедаме и да задржиме добар однос со Јехова. Да видиме како светиот дух ни помага да се бориме со искушенијата и да излеземе на крај со уморот и обесхрабрувањето.
Зајакнати да се бориме со искушенијата
5. Како молитвата може да нѐ зајакне?
5 Исус ги поучил своите следбеници да се молат на следниов начин: „Не воведувај нѐ во искушение, туку избави нѐ од Злобниот“ (Мат. 6:13). Јехова нема да ги остави своите верни слуги кои му упатуваат вакво барање. Во друга прилика, Исус рекол дека „Таткото, кој е на небото, ќе им даде свет дух на оние што го молат за тоа“ (Лука 11:13). Колку утешно е ова Јеховино ветување дека ќе ни го даде својот дух кој ќе ни помогне да го правиме она што е исправно! Се разбира, ова не значи дека Јехова воопшто нема да дозволи да бидеме искушани (1. Кор. 10:13). Но кога ќе се најдеме на искушение, ќе биде неопходно да се молиме уште погорливо (Мат. 26:42).
6. На што се повикал Исус кога Сатана го искушувал?
6 Кога Ѓаволот го искушувал, Исус се повикал на Писмото. Тој јасно ја имал Божјата Реч во мислите кога рекол: „Напишано е... напишано е и ова... Бегај, Сатано! Зашто, напишано е: ‚Јехова, својот Бог, обожавај го и само нему служи му!‘“ Љубовта кон Јехова и кон неговата Реч му помогнала на Исус да заземе цврст став кога Искушувачот се обидел да го заведе (Мат. 4:1-10). Откако трипати ги одбил искушенијата, Сатана го оставил.
7. Како Библијата ни помага да се спротивставиме на искушенијата?
7 Кога самиот Исус толку се потпирал на Библијата за да се спротивстави на искушенијата на Сатана, колку повеќе тоа треба да го правиме ние! Всушност, за да му се спротивставиме на Ѓаволот и на искушенијата што доаѓаат од него, пред сѐ мора да бидеме решени да ги знаеме Божјите мерила и во потполност да се држиме за нив. Многу луѓе денес, кои ја проучуваат Библијата и стекнуваат разбирање и ценење за Божјата мудрост и праведност, се поттикнати да живеат според библиските мерила. Навистина, „речта Божја“ е толку моќна што може да ги процени „мислите и намерите на срцето“ (Евр. 4:12). Колку повеќе ја читаме и размислуваме за неа, толку појасно ни станува дека ‚сите патеки на Јехова се вистина‘ (Пс. 25:10). Затоа, добро е да ги насочиме своите мисли на стиховите кои содржат конкретни совети во врска со некои наши слабости.
8. На кои начини можеме да добиеме свет дух?
8 Исус успеал да им се спротивстави на искушенијата бидејќи, освен што го познавал Писмото, бил и „полн со свет дух“ (Лука 4:1). За да имаме и ние слична сила и способност, треба да станеме уште поблиски со Јехова така што во целост ќе го искористиме сето она што тој ни го дава за да нѐ исполни со свет дух (Јак. 4:7, 8). Во ова, меѓу другото, спаѓаат проучувањето на Библијата, молитвата и дружењето со соверниците. Мнозина се свесни колку им користи тоа што се постојано зафатени со христијанските активности, кои им го насочуваат умот на изградувачки духовни мисли.
9, 10. а) Кои искушенија се вообичаени за христијаните? б) Како длабокото размислување и молитвата ќе те зајакнат да се бориш со искушенијата дури и кога се чувствуваш уморен?
9 Со какви искушенија мораш да се бориш ти? Си се нашол ли некогаш на искушение да флертуваш со некој што не ти е брачен партнер? Ако не си во брак, си се нашол ли под притисок да излезеш со некој што не е Сведок? Кога гледаат телевизија или користат интернет, христијаните неочекувано можат да се најдат на искушение да гледаат нешто нечисто. Дали и тебе ти се случило такво нешто, и ако да, што направи? Би било мудро да размислуваме како еден погрешен чекор може да води до друг, а на крајот и до тежок грев (Јак. 1:14, 15). Мисли на тоа колкава болка ќе му нанесе таквиот грев на Јехова, на собранието и на семејството. Од друга страна, ако верно ги следиме Божјите начела, ќе имаме чиста совест. (Прочитај Псалм 119:37; Изреки 22:3.) Кога и да се најдеш на такви и слични искушенија, биди решен да се молиш за сила да им се спротивставиш.
10 Треба да имаме на ум уште нешто во врска со искушенијата кои ги користи Ѓаволот. Сатана дошол да го искушува Исус откако тој постел 40 дена во пустината. Ѓаволот сигурно си мислел дека тоа е особено „поволен момент“ да ја испита верноста на Исус (Лука 4:13). Тој бара поволни моменти за да ја стави на испит и нашата верност. Затоа, од пресудна важност е постојано да бидеме духовно јаки. Сатана обично напаѓа кога смета дека неговата жртва е најранлива. Затоа, секогаш кога сме уморни или обесхрабрени, да бидеме поодлучни од кога и да било да го молиме Јехова да ни даде свет дух и да нѐ заштити (2. Кор. 12:8-10).
Зајакнати да излеземе на крај со уморот и обесхрабрувањето
11, 12. а) Зошто мнозина денес се чувствуваат обесхрабрени? б) Што може да нѐ зајакне да се справиме со обесхрабрувањето?
11 Како несовршени луѓе, нормално е понекогаш да се чувствуваме обесхрабрени. Ова особено може да биде случај денес, бидејќи живееме во многу стресно време. Поминуваме низ веројатно најтешкиот период во историјата на човештвото (2. Тим. 3:1-5). Додека наближува Армагедон, економските, емоционалните и другите притисоци растат. Затоа, не треба да нѐ изненади што на некои им е сѐ потешко да се грижат за потребите на семејството. Тие се чувствуваат оптоварени, уморни, исцрпени, па дури и папсани. Ако тоа е случај и со тебе, како можеш да се справиш со силниот притисок?
12 Сети се, Исус ги уверил своите ученици дека ќе им даде помошник — Божјиот свет дух. (Прочитај Јован 14:16, 17.) Тоа е најголемата сила во вселената. Со својот дух, Јехова може да ни даде „неизмерно повеќе“ сила од онаа што ни е потребна за да го издржиме секое можно искушение (Еф. 3:20). Апостол Павле рекол дека, ако се потпираме на Божјиот дух, ќе добиеме „сила, која ја надминува нормалната“ иако сме „притиснати од сите страни“ (2. Кор. 4:7, 8). Јехова не ни ветува дека ќе го отстрани стресот, но нѐ уверува дека, преку својот дух, ќе ни ја даде силата што ни е потребна за да го поднесеме (Фил. 4:13).
13. а) Како една девојка била зајакната да се справи со тешка ситуација? б) Дали знаеш некои слични искуства?
13 Размисли за Стефани, која има 19 години и служи како општ пионер. На 12 години, таа добила мозочен удар и ѝ бил дијагностициран тумор на мозокот. Оттогаш имала две операции, третман со зрачење и уште два други удари, поради кои не може добро да ја движи левата страна и не гледа добро. Стефани мора да си ја штеди силата за она што ѝ е поважно, како што се христијанските состаноци и службата. Сепак, чувствува како Јеховиниот дух ѝ помага да издржи на многу начини. Кога се чувствувала обесхрабрена, искуствата на сохристијаните во библиските публикации ја освежиле и закрепнале. Браќата и сестрите ѝ давале поддршка така што ѝ праќале писма или споделувале со неа охрабрувачки мисли пред и по состаноците. А заинтересираните лица покажале дека се благодарни што ги поучувала за Библијата така што оделе кај неа дома за да проучуваат. За сето ова, Стефани му е многу благодарна на Јехова. Нејзин омилен стих е Псалм 41:3, за кој таа е уверена дека се исполнува и на неа.
14. Што не смееме да мислиме кога сме уморни или под притисок, и зошто?
14 Кога сме уморни или под притисок, не смееме никогаш да заклучиме дека ќе ни биде полесно ако ги скратиме духовните активности. Тоа е најлошото нешто што би можеле да го направиме. Зошто? Затоа што токму преку тие работи — личното и семејното проучување на Библијата, службата и состаноците — светиот дух нѐ зајакнува. Христијанските активности секогаш нѐ закрепнуваат. (Прочитај Матеј 11:28, 29.) Колку често се случува браќата и сестрите да дојдат уморни на состанок, но кога си одат, чувствуваат дека нивната сила е обновена и дека нивните духовни батерии се наполнети!
15. а) Дали Јехова ветува дека христијаните ќе можат да му служат без да вложат никаков труд? Објасни со библиски стихови. б) Што ни ветува Бог, и кое прашање се покренува со тоа?
15 Се разбира, ова не значи дека товарот што го носиме како ученици на Христос нема никаква тежина. Потребно е да вложиме труд за да бидеме верни христијани (Мат. 16:24-26; Лука 13:24). Сепак, преку светиот дух, Јехова може да му даде сила на уморниот. Пророкот Исаија напишал: „Оние што се надеваат на Јехова добиваат нова сила. Како орли се подигаат на крилја. Трчаат и не папсуваат, одат и не се уморуваат“ (Иса. 40:29-31). Тогаш, добро е да се прашаме: ‚Кои се, всушност, причините за духовниот умор?‘
16. Како би можеле да ги отстраниме можните причини за уморот или обесхрабрувањето?
16 Јеховината реч нѐ поттикнува ‚да процениме што е најважно‘ (Фил. 1:10). Споредувајќи го животот на христијаните со маратонска трка, под водство на светиот дух, апостол Павле советувал: „Да го симнеме и ние секој товар... и со истрајност да ја трчаме трката што е пред нас“ (Евр. 12:1). Тој сакал да каже дека мора да ги тргнеме настрана непотребните товари, односно непотребните активности кои нѐ исцрпуваат. Можеби некои од нас едноставно се обидуваат да прават премногу работи во животот. Затоа, ако честопати се чувствуваш уморен или под притисок, зошто не размислиш колку ѝ се посветуваш на работата, колку често патуваш во своето слободно време и колку сила трошиш на спорт или друга рекреација? Разумноста и скромноста треба да нѐ наведат сите нас да си ги признаеме границите и да ги сведеме непотребните активности на минимум.
17. Зошто можеби некои се обесхрабрени, но што ни гарантира Јехова?
17 Можеби некои Божји слуги се донекаде обесхрабрени и затоа што крајот на овој свет не дошол толку брзо колку што мислеле (Изр. 13:12). Оние што се чувствуваат вака, можат да се охрабрат од зборовите во Авакум 2:3: „Тоа видение ќе се исполни во времето што е одредено за него. Видението брза кон крајот и нема да излаже. Дури и да се забави, чекај го, зашто бездруго ќе се исполни. Нема да задоцни“. Јехова ни гарантира дека крајот на овој свет ќе дојде токму навреме!
18. а) Кои ветувања ти влеваат сила? б) Како ќе ни користи следната статија?
18 Се разбира, сите верни слуги на Јехова копнеат по денот кога повеќе ќе нема умор и обесхрабрување, и кога секој човек ќе ужива во „својата младешка сила“ (Јов 33:25). Светиот дух уште сега го зајакнува нашиот внатрешен човек додека учествуваме во закрепнувачки духовни активности (2. Кор. 4:16; Еф. 3:16). Не дозволувај поради уморот да ги изгубиш вечните благослови. Секој испит — сеедно дали е искушение, умор или обесхрабрување — ќе помине, ако не веднаш, тогаш во Божјиот нов свет. Во следната статија ќе видиме како светиот дух ги зајакнува христијаните да истраат кога се прогонувани, да му се спротивстават на лошото влијание од околината и да издржат разни други неволји.
Како би одговорил?
• Како нѐ зајакнува читањето на Библијата?
• Како нѐ зајакнуваат молитвата и размислувањето?
• Како да ги отстраниш можните причини за обесхрабрувањето?
[Слика на страница 24]
Христијанските состаноци можат духовно да нѐ зајакнат