Како можеш подобро да ја проучуваш Библијата и повеќе да уживаш во тоа

ИСУС НАВИН требало да ги предводи Израелците во освојувањето на Ветената земја. Ова било многу тешка задача. Меѓутоа, Јехова го уверил дека ќе успее и го зајакнал со зборовите: „Биди храбар и многу силен“. Исто така, Јехова му рекол дека, ако го чита неговиот закон и се држи за него, ќе носи мудри одлуки и успешно ќе ја изврши задачата (Ис. Нав. 1:7, 8).

Во овие „особено тешки времиња“, и ние се соочуваме со разни тешкотии во животот (2. Тим. 3:1). Ако сакаме успешно да се справиме со нив, треба да го следиме примерот на Исус Навин, кој го послушал советот што му го дал Јехова. И ние треба редовно да ја читаме Библијата и да ги применуваме нејзините начела за да носиме мудри одлуки.

Но, некои од нас можеби не знаат како да проучуваат или можеби не уживаат многу во тоа. Сепак, проучувањето на Библијата е многу важно. Во рамката „Пробај ги следниве предлози“ ќе најдеш практични идеи што ќе ти помогнат да извлечеш поголема корист од проучувањето и повеќе да уживаш во тоа.

Псалмистот напишал: „Упати ме по патеката на твоите заповеди, зашто уживам да одам по неа“ (Пс. 119:35). И ти можеш да уживаш додека ја проучуваш Божјата Реч. Таа е неисцрпна ризница со скапоцено духовно богатство кое чека да го откриеш.

Иако не треба да предводиш цел народ како што правел Исус Навин, и ти си имаш свои тешкотии. Затоа, по примерот на Исус Навин, проучувај ја Божјата Реч и применувај ги нејзините поуки кои се напишани за твое добро. Ако го правиш тоа, ќе носиш мудри одлуки и ќе бидеш успешен во животот.