Дали ,сакаш‘ да им помагаш на другите?
1 Исус вистински се грижел за луѓето. Кога еден лепрозен човек го преколнувал за помош, Исус ја испружил раката, го допрел човекот и му рекол: „Сакам. Биди чист“ (Марко 1:40—42). На кои начини можеме да го имитираме Исусовиот став во врска со помагањето на другите?
2 Заинтересираните: Секој член на собранието игра улога во помагањето на заинтересираните да станат обожаватели на Јехова. Кога на состаноците ќе дојдат нови лица, поздрави ги и запознај се со нив. Барај начини да ги охрабриш. Пофали ги за коментарите што ги даваат. Изрази ценење за нивните напори да ги применат библиските начела во својот живот. Помогни им да ги увидат можностите да стекнат вистински пријатели во собранието.
3 Соверниците: „Оние кои ни се сродни по верата“ особено ја заслужуваат нашата помош на различни начини (Гал. 6:10). Мнозина се борат со здравствени проблеми. Со тоа што ќе направиш охрабрувачка посета, можеш да им го пружиш потребното друштво, а можеби и да помогнеш на практични начини. Некои можеби се соочуваат со други тешкотии во животот. Покажи грижа со тоа што ќе одвоиш време да ги сослушаш и да ги изградиш (1. Сол. 5:14). И на старешините им е потребна нашата соработка додека ги извршуваат своите одговорности (Евр. 13:17). Покажувајќи спремен дух и дух на помагање, можеме да им ‚станеме зајакнувачка помош‘ на нашите соверници (Кол. 4:11).
4 Членовите на семејството: Исто така, треба да настојуваме да ја имитираме Исусовата грижа за луѓето во нашиот семеен круг. Длабоката грижа ги поттикнува родителите ‚да ги подигаат своите деца во дисциплина и во Јеховино умствено насочување‘ (Ефеш. 6:4). Децата можат да го направат својот дел со тоа што навреме ќе се подготват за семејната студија, собраниските состаноци или службата на теренот. Поголемите деца можат да го одразуваат сочувството на Исус така што нежно ќе им помагаат на своите родители да се справат со тешкотиите што ги носи староста. На овие и на други начини, сите ние можеме ‚да практикуваме побожна оддаденост во своето домаќинство‘ (1. Тим. 5:4).
5 Додека го имитираме Исус во помагањето на другите, можеби ќе можеме да ги олесниме проблемите и да ја зголемиме блискоста во нашето семејство и во собранието. Најважно од сѐ, му оддаваме чест на Јехова, „Таткото на нежни милосрдија“ (2. Кор. 1:3).