Пред да проповедаш, можеби ќе треба да бараш

1. Зошто собранијата на чие подрачје живеат луѓе што зборуваат различни јазици го делат подрачјето според јазикот?

¹ На Педесетница 33 год. од н.е., откако примиле свет дух, учениците на Исус ‚почнале да зборуваат на разни јазици‘ со луѓето кои дошле од разни краишта на светот (Дела 2:4). Како резултат на тоа, се крстиле околу 3.000 души. Интересно е што повеќето од тие луѓе зборувале и некој заеднички јазик, како што бил хебрејскиот или грчкиот. Па сепак, Јехова избрал пораката за Царството да им биде пренесена на нивниот мајчин јазик. Несомнено, една причина било тоа што луѓето обично поспремно ја прифаќаат добрата вест кога ќе ја чујат на својот мајчин јазик. Затоа, денес собранијата на чие подрачје живеат луѓе што зборуваат различни јазици го делат подрачјето според јазикот (Организирани, стр. 107, пас. 1-2). Групите на странски јазик не добиваат свое подрачје, туку им проповедаат на луѓето што го зборуваат тој јазик на подрачјето на собранието кое се грижи за групата и на други собранија во околината.

2. а) Каква потрага е потребна, и каде би била неопходна? б) Како можат собранијата да си помагаат додека ги обработуваат повеќејазичните подрачја? в) Што треба да правиме ако наидеме на заинтересирано лице што зборува на друг јазик?

² Ако живееш на место каде што сите зборуваат ист јазик, можеш едноставно да проповедаш одејќи од една куќа до друга. Но, сосема е поинаку ако живееш во голем град во кој се зборуваат различни јазици. Во една иста населба може да проповедаат собранија на различни јазици. Иако другите собранија можеби ќе му дадат на твоето собрание некакви информации за луѓето на нивното подрачје што го зборуваат твојот јазик, сепак главната одговорност да се најдат тие луѓе ја има твоето собрание, односно група. (Види ја рамката „Да си помагаме еден на друг“.) Затоа, што би се рекло, можеби ќе треба да тргнеш во потрага, односно да се распрашуваш каде можеш да ги најдеш тие луѓе. Како да го правиш тоа?

3. Што одредува каде едно собрание или група ќе бара заинтересирани лица и колку време ќе посвети на тоа?

³ Организирана потрага: Колку време ќе ни биде потребно за да ги лоцираме лицата кои зборуваат на нашиот јазик зависи од околностите. На пример, колку луѓе од тоа место го зборуваат тој јазик? Колку објавители има таму? Колку адреси на такви лица има собранието, односно групата? Собранието не мора да посвети исто внимание на секоја населба, туку може да се концентрира на погусто населените места што спаѓаат во неговото подрачје и на местата што не се премногу далеку. Меѓутоа, важно е потрагата да се одвива организирано за да им се даде прилика на колку што е можно повеќе луѓе да го повикуваат името на Јехова (Рим. 10:13, 14).

4. а) Како треба да се организира потрагата? б) Кои се некои начини на кои можеш да ги лоцираш луѓето што зборуваат на твојот јазик?

⁴ За да не се трошат време и сила непотребно, старешинството, особено надгледникот за служба, треба да го организира и да го надгледува барањето на лицата што го зборуваат јазикот на собранието (1. Кор. 9:26). Во групите на странски јазик, водство може да преземе еден оспособен брат, по можност старешина или слуга-помошник, што ќе го избере старешинството во собранието што се грижи за групата. Многу собранија и групи го вршат првичното пребарување систематски така што преку именик или преку Интернет ги наоѓаат имињата што се вообичаени за тој јазик. Потоа ги бараат овие лица преку телефон или одат кај нив дома за да видат кои адреси да ги вклучат во подрачјето. Ако е практично, старешинството на собранието што се грижи за групата може да организира одвреме-навреме целото собрание да учествува во потрагата. (Види ја рамката „Како да ги најдеш оние што зборуваат на твојот јазик“.)

5. а) Наведи неколку предлози што ќе им помогнат на објавителите кои се трудат да ги лоцираат луѓето. б) Што можеме да им кажеме на луѓето додека ги бараме оние што зборуваат на јазикот на собранието?

⁵ Секојпат кога одиме да бараме луѓе што зборуваат на јазикот на кој проповедаме, треба јасно да задржиме на ум која е нашата цел. Бидејќи и тоа е служба, обично треба да сме облечени како за во служба. За да задржат одушевеност и да си го усовршат јазикот, мнозина вежбаат презентации и си зборуваат на тој јазик додека одат низ подрачјето за да ги лоцираат луѓето. Времето што ќе го поминеме во тоа можеме да го известиме, но не и времето за да ги направиме картичките за подрачјата и списоците. Кога ќе најдеме некој што зборува на јазикот на собранието, треба да се потрудиме да му ја пренесеме добрата вест, а потоа да го известиме надгледникот за служба или оној што е назначен од него за да се внесат најновите податоци во белешките за подрачјето. Ова треба да се направи сеедно дали лицето било заинтересирано или не. Иако ваквата потрага е многу важна, треба да бидеме урамнотежени и да учествуваме во сите аспекти од службата. (Види ја рамката „Што да речеш додека ги бараш“.)

6. Кои посебни предизвици треба да ги совладаме за да ги најдеме глувите лица?

⁶ Како да ги најдеме глувите: За да дојдеме до едно глуво лице треба да совладаме посебни предизвици, да вложиме голем напор и да бидеме упорни. Глувите не можеме да ги препознаеме по името, изгледот или начинот на облекување. Освен тоа, понекогаш членовите на семејството и пријателите се заштитнички настроени и не се секогаш спремни да му дадат информации на објавителот што се распрашува за глуви лица. Следниве предлози за тоа како да ги бараме глувите може да послужат и додека се трудиме да ги најдеме оние што зборуваат друг јазик.

7. а) Како би можеле да пристапиме кога ги бараме глувите? б) Како да му помогнеме на станарот да сфати дека нема причина да се сомнева во нас?

⁷ Собранијата и групите на знаковен јазик успеале да изнајдат начини да ги лоцираат глувите лица на своето подрачје. Можеби станарот забележал дека некој сосед, колега или соученик комуницира на знаковен јазик. Можеби забележал сообраќаен знак кој покажува дека таму минуваат глуви деца. Можеби има роднина што е глув. Не заборавај дека на луѓето може да им изгледа сомнително зошто си кај нив. Меѓутоа, можеме да ги опуштиме ако се однесуваме пријателски и ако накратко, отворено и со почит им објасниме зошто сме кај нив. Кога го прашуваат станарот дали познава некој што е глув, некои објавители увиделе дека има добар ефект ако му ја пуштат Библијата или друго ДВД. Потоа едноставно му спомнуваат дека би сакале да им ја пренесат библиската надеж на глувите. Ако станарот се мисли дали да ти даде такви информации, можеби ќе прифати на својот глув роднина или пријател да му даде твоја визит-картичка или покана за собраниските состаноци.

8. Како може некое блиско собрание да му помогне на собранието на знаковен јазик?

⁸ Еден или два дена годишно, собранието на знаковен јазик може да покани некое блиско собрание на друг јазик да помогне да утврдат каде има глуви лица на некое градско подрачје што спаѓа во подрачјето на собранието. На состанок за проповедање организиран од собранието на знаковен јазик може да се дадат упатства и прикази како да се прави тоа. Кога ќе се поделат групите, би било добро во секој автомобил да има по еден објавител од собранието на знаковен јазик, како и карта за подрачјето што ќе се пребарува.

9. Како може да се бараат глуви лица на места каде што тие се собираат за дружење и рекреација или каде што добиваат услуги што ги обезбедува државата?

⁹ Глуви лица може да се бараат и на места каде што тие се собираат за дружење и рекреација или каде што добиваат услуги што ги обезбедува државата. Објавителите треба да носат соодветна облека. Можеби е најдобро да разговараме со еден или двајца од присутните и да бидеме дискретни наместо да ѝ се обратиме на целата група. Ако забележиш интерес кај некого, би можел да прашаш дали може да си размените информации за контакт.

10. Како можат објавителите да бараат глуви лица на деловно подрачје?

¹⁰ Друга можност е да се подготват карти на кои се означени деловните објекти, а потоа, да се посетат во соодветно време. На пример, на една карта може да се означат само бензинските пумпи. На друга фирмите за хемиско чистење, пералниците, рестораните, хотелите или други деловни објекти. Ако на секоја карта има деловни објекти од ист вид, објавителите може да го користат истиот пристап и да стекнат искуство и вештина. На пример, бидејќи во хотелите обично се сместуваат и глуви лица, би можеле на рецепционерот накратко да му објасниме зошто сме дојдени и да му понудиме подготвен пакет со ДВД и покана за собраниските состаноци за глувите гости во хотелот. Во некои деловни објекти можеме едноставно да се распрашаме дали некои клиенти или редовни муштерии комуницираат на знаковен јазик. Ако на подрачјето има училиште за глуви лица, би можеле да понудиме некои од нашите ДВД-ја за училишната библиотека.

11. Зошто може да се каже дека важен дел од нашата служба е да ги лоцираме луѓето на кои сакаме да им проповедаме?

¹¹ Важна задача: За да се најдат лицата што го зборуваат јазикот на кој проповедаш потребни се време и труд. Освен тоа, бидејќи луѓето често се селат, може да биде тешко да се води точна евиденција за оние што живеат на собраниското подрачје. Меѓутоа, на сѐ повеќе подрачја, важен аспект од службата е да се лоцираат луѓето. Јехова, кој ни дал задача да проповедаме, не е пристрасен (Дела 10:34). Тој „сака најразлични луѓе да се спасат и добро да ја запознаат вистината“ (1. Тим. 2:3, 4). Затоа, да соработуваме со Јехова и еден со друг за да ги најдеме луѓето од сите јазици кои имаат „чисто и добро срце“ (Лука 8:15).

[Рамка на страница 5]

Да си помагаме еден на друг

Ако на собранието или на групата им треба помош за да ги најдат луѓето што го зборуваат нивниот јазик, надгледникот за служба може да стапи во контакт со старешините на собранијата на други јазици во околината. Можеби е најдобро да стапи во контакт само со собранијата што се на разумна оддалеченост или на чие подрачје има значителен број луѓе што го зборуваат јазикот. Тогаш, тие собранија можат да ги известат своите објавители дека, доколку најдат некој што го зборува тој јазик, треба да ја запишат адресата и да му ја дадат на надгледникот за служба кој, пак, ќе ја предаде на собранието или групата кои барале помош. Надгледниците за служба на сите вклучени собранија можат да направат план што ќе им одговара на сите за најефикасно да го обработат повеќејазичното подрачје и да ги упатат интересентите до соодветното собрание или група.

Ако објавителите најдат лице што зборува друг јазик и е заинтересирано (или е глуво), треба веднаш да пополнат формулар Те молиме, посети го ова лице (S-43) и да му го предадат на собранискиот секретар. Така лицето ќе може во најскоро време да добие духовна помош. (Види km 5/11 стр. 3.)

[Рамка на страница 6]

Како да ги најдеш оние што зборуваат на твојот јазик

• Прашувај — интересенти, членови на нивното семејство, колеги итн.

• Користи телефонски именик за да ги најдеш имињата кои се вообичаени во твојот јазик. На Интернет или преку телефонските компании може да биде достапен именик во кој имињата се подредени според адресата.

• Биди дискретен кога се распрашуваш во местата што нудат јавни услуги, како што се библиотеки, владини канцеларии или факултети.

• Проверувај ги дневните весници за да видиш дали има известувања за јавни активности што ги организира некоја заедница на странски јазик.

• Посети ги локалните продавници и деловни објекти наменети за заедниците на странски јазик.

• Со претходна дозвола на одговорното лице, постави штанд за литература во некој деловен објект, студентски центар, или транспортен центар каде што обично може да се сретнат многу лица што зборуваат странски јазик.

• Ако законот во твојата земја дозволува, можат да се купат посебни телефонски именици што ги изработуваат некои фирми или компјутерски програми кои овозможуваат пронаоѓање на такви лица преку Интернет.

[Рамка на страница 7]

Што да речеш додека ги бараш

Кога им пристапуваме на луѓето пријателски, искрено и отворено, тие може да увидат дека нема место за сомнежи. Честопати помага ако најпрво покажеме публикација на јазикот на кој проповедаме.

Откако ќе го поздравиш станарот, би можел да речеш: „Бараме лица што зборуваат ․․․․․ јазик за да им ја пренесеме библиската надеж. Познавате ли некој со кого би можеле да разговараме?“

Ако бараш глуви лица, би можел да речеш: „Здраво. Може ли да ви покажам нешто? [На преносен ДВД-плеер, пушти еден дел од ДВД-то Да ли желите да сазнате истину?, на српски знаковен јазик.] Имаме и други бесплатни видеопрограми кои помагаат да се задоволат духовните потреби на глувите лица. Познавате ли некое глуво лице или лице со оштетен слух што комуницира на знаковен јазик?“ Ако станарот не може да се сети, би можеле да му наброиме места на кои можеби видел некое глуво лице, на пример на работа, на училиште или во соседството.