Дали треба да живееме заедно пред да се венчаме?

Многу парови живеат заедно пред да стапат во брак. Некои го прават тоа за да видат дали си одговараат и бидејќи се надеваат дека тоа ќе им ги зголеми шансите да имаат успешен брак. Дали е мудро двајца кои се во врска да живеат заедно пред да стапат во брак?

Во оваа статија:

• Што вели Библијата?

• Дали тоа што ќе живеете заедно ќе ве подготви за брак?

• Дали тоа што ќе живеете заедно ќе ви помогне во финансиски поглед?

• Дали тоа што ќе живеете заедно ќе ви помогне да не стапите во брак со погрешна личност?

• Дали има подобра опција?

Што вели Библијата?

• Библијата осудува секс надвор од бракот. На пример, во неа пишува: „Да се воздржувате од блуд“ (1. Солуњаните 4:3; 1. Коринќаните 6:18). Во ова се вклучени сексуални односи помеѓу еден маж и една жена кои живеат заедно дури и ако имаат намера да стапат во брак подоцна.a Библиските мерила им помагаат на паровите да се заштитат од вонбрачна бременост и од други негативни последици кои произлегуваат од заедничкото живеење пред брак.

• Брачната заедница ја основал Бог. Кога го склопил првиот брак, тој рекол: „Човек ќе ги остави татка си и мајка си и ќе се прилепи до својата жена, и тие двајцата ќе станат едно тело“ (1. Мојсеева 2:24). Кога еден маж и една жена ќе си дадат брачен завет, поголема е веројатноста дека меѓу нив ќе има љубов и дека нивното семејство ќе биде стабилно.

Дали тоа што ќе живеете заедно ќе ве подготви за брак?

Некои велат да. Тие сметаат дека, на двајца што се во врска, тоа што ќе живеат заедно ќе им овозможи да стекнат вредно искуство додека заедно ги извршуваат домашните обврски и го набљудуваат меѓусебното однесување. Но, заветот е неопходен за еден среќен брак.

Како можат двајца што планираат да стапат во брак да научат да останат заедно и во добро и во лошо? Не со тоа што ќе влезат во „пробен период“ пред бракот, во кој и двајцата партнери ќе гледаат на врската како на нешто на кое можат да му стават крај во секое време. Наместо тоа, една врска е успешна кога и двајцата партнери се цврсто решени да бидат верни еден на друг и кога заедно се трудат да ги решаваат проблемите.

Заклучок: Наместо да се подготват за брак, оние кои избираат да живеат заедно невенчано, всушност можеби се подготвуваат за разделба.

Библиско начело: „Човек што ќе си посее, тоа и ќе си пожнее“ (Галатите 6:7).

Дали тоа што ќе живеете заедно ќе ви помогне во финансиски поглед?

Некои велат да. Според едно истражување направено во САД, околу четворица од десет возрасни луѓе кои почнале да живеат заедно го направиле тоа од финансиски причини (Pew Research Center). Сепак, откако некое време живееле заедно, многу од оние кои учествувале во истражувањето рекле дека финансиските проблеми сѐ уште се главна причина поради која не се спремни да стапат во брак.

Заедничкото живеење пред брак може да има и други последици, особено за жените. На пример, откако една врска ќе заврши, жените обично се оние кои ја преземаат одговорноста да се грижат за децата.

Заклучок: Негативните последици од заедничкото живеење пред брак можат да бидат далеку поголеми од наводните користи.

Библиско начело: „Јас, Јехова, сум твој Бог, кој те учи да го правиш она што е за твое добро“ (Исаија 48:17).

Дали тоа што ќе живеете заедно ќе ви помогне да не стапите во брак со погрешна личност?

Некои велат да. Сепак, „луѓето кои живеат заедно пред брак честопати не сфаќаат дека тоа им отежнува да стават крај на врската“, пишува во книгата Fighting for Your Marriage. Зошто? Некои кои живеат заедно можеби ќе сфатат дека воопшто не си одговараат. Но, поради некои обврски, како на пример заедничко милениче, договор за заеднички стан или непланирана бременост, тие го развиваат она што истражувачите го нарекуваат „инерција на заедничко живеење“.b Со други зборови, „некои луѓе, кои инаку би ја прекинале врската пред да стапат во брак, одлучуваат да се венчаат бидејќи едноставно така им е полесно“, стои во истата книга.

Заклучок: Наместо да ти помогне да донесеш добра одлука, заедничкото живеење всушност може да ти отежне да ставиш крај на една лоша врска.

Библиско начело: „Паметниот човек го гледа злото и се трга, а глупавите одат понатаму и ја трпат казната“ (Изреки 22:3).

Дали има подобра опција?

Ти можеш да ги избегнеш ризиците што доаѓаат од заедничкото живеење пред брак и да ги зголемиш можностите за успешен брак. Како? Така што ќе се држиш за библиските мерила за бракот. Одвој си доволно време да ја запознаеш личноста со која размислуваш да стапиш во брак пред да почнете да живеете заедно како сопруг и сопруга. Подобро е да го избереш твојот брачен партнер на темел на заеднички вредности и верувања, кои се многу поважни од сексуалната привлечност.

Во Библијата има совети кои можат да ти помогнат да започнеш еден среќен и стабилен брак.c На пример, таа содржи начела кои можат да ти помогнат...

• да останеш верен

• да станеш личност која ќе биде добар брачен партнер

• да ги препознаеш знаците дека некоја личност не е вистинската за тебе уште додека сте во врска

За да дознаеш повеќе за овие теми, оди во делот „Брак и семејство“ на jw.org.

Библиско начело: „Целото Писмо е вдахновено од Бог и корисно за поучување“ (2. Тимотеј 3:16).