ЛЕКЦИЈА 07
Што ни открива Јехова за себе?
Како си го замислуваш Јехова Бог? Некои луѓе мислат дека Бог е величествен и влева стравопочит, и дека не е можно да бидеме блиски со него. Други сметаат дека е моќен, но бесчувствителен. Каков навистина е Јехова? Преку својата Реч, Библијата, Јехова открива некои од своите особини, а ни кажува и дека нѐ сака и се грижи за секој од нас.
1. Зошто не можеме да го видиме Бог?
„Бог е дух“ (Јован 4:24). Јехова нема тело како луѓето. Тој е дух кој живее на небото, на место кое не можеме да го видиме.
2. Кои се некои од особините на Јехова?
Иако Јехова е невидлив, ние можеме да го запознаеме. Всушност, колку повеќе ги запознаваме неговите прекрасни особини толку повеќе расте нашата љубов кон него. Библијата вели: „Јехова ја сака правдата и нема да ги остави оние што му се лојални“ (Псалм 37:28). Исто така, тој е „полн со сочувство и милосрден“, особено кон луѓето што страдаат (Јаков 5:11). „Јехова е близу до оние што се скршени во срцето и ги спасува оние со скршен дух“ (Псалм 34:18). Дали си знаел дека нашите постапки влијаат врз чувствата на Јехова? Кога некој прави лоши работи, го разочарува и го жалости (Псалм 78:40, 41). Но, кога некој постапува исправно, го радува. (Прочитај Изреки 27:11.)
3. Како Јехова покажува дека нѐ сака?
Најистакната особина на Јехова е љубовта. Всушност, Библијата ни кажува дека „Бог е љубов“ (1. Јованово 4:8). Јехова не ја открива својата љубов само преку Библијата туку и преку работите што ги создал. (Прочитај Дела 14:17.) На пример, размисли за тоа како сме создадени. Јехова ни дал способност да гледаме прекрасни бои, да слушаме пријатна музика и да уживаме во најразлични вкусови. Тој сака да му се радуваме на животот!
ДОЗНАЈ ПОВЕЌЕ
Во овој дел ќе дознаеш што користи Јехова за да направи извонредни работи. Исто така, ќе дознаеш како ги открива и како ги покажува своите прекрасни особини.
4. Светиот дух е силата што ја користи Бог
Јехова го користи светиот дух исто како што ние ги користиме нашите раце за да работиме. Библијата открива дека светиот дух не е личност, туку силата што Бог ја користи за да направи сѐ што ќе науми. Прочитај Лука 11:13 и Дела 2:17, а потоа разговарајте за овие прашања:
Бог „ќе го излее“ својот свет дух врз оние што го молат. Според тоа, дали светиот дух е личност или Божја сила? Зошто мислиш така?
Јехова го користи светиот дух за да прави извонредни работи. Прочитај Псалм 33:6 и 2. Петрово 1:20, 21, а потоа разговарајте за ова прашање:
На кои начини Јехова го користел светиот дух?
5. Јехова има прекрасни особини
Мојсеј бил верен Божји слуга, но сакал подобро да го запознае својот Творец. Затоа Мојсеј му рекол: „Објави ми ги своите патишта за да те запознаам“ (2. Мојсеева 33:13). Јехова му открил на Мојсеј некои свои особини. Прочитај 2. Мојсеева 34:4-6, а потоа разговарајте за овие прашања:
Кои свои особини му ги открил Јехова на Мојсеј?
Кои особини на Јехова најмногу ти се допаѓаат?
6. Јехова ги сака луѓето и се грижи за нив
Евреите, кои во минатото биле Божји народ, биле робови во Египет. Како се чувствувал Јехова кога тие страдале? Пушти ја АУДИОСНИМКАТА и следи го текстот во Библијата, или прочитај 2. Мојсеева 3:1-10. Потоа разговарајте за следниве прашања:
Што учиме од овој извештај за тоа како се чувствува Јехова кога гледа дека луѓето страдаат? (Види ги стиховите 7 и 8.)
Дали Јехова навистина сака да им помага на луѓето и дали има моќ да го прави тоа? Зошто мислиш така?
7. Особините на Јехова се гледаат во природата
Јехова ги открива своите особини преку она што го создал. Пушти го ВИДЕОКЛИПОТ. Потоа прочитај Римјаните 1:20 и разговарајте за следново прашање:
Кои особини на Јехова ги гледаш во работите што ги создал?
НЕКОИ ВЕЛАТ: „Бог не е личност, туку е само сила што е присутна насекаде“.
Што би рекол ти?
Зошто мислиш така?
ШТО НАУЧИ:
Јехова е невидлива духовна личност со многу убави особини, од кои најистакната е љубовта.
Како би одговорил?
Зошто не можеме да го видиме Јехова?
Што е светиот дух?
Кои се некои од особините на Јехова?
ИСТРАЖУВАЈ
Дознај нешто повеќе за четирите главни особини на Јехова.
Разгледај некои докази дека Јехова не е присутен насекаде.
Прочитај зошто Библијата го споредува светиот дух со Божји раце.
На еден слеп човек му било тешко да верува дека Бог го сака. Дознај што му помогнало да си го смени мислењето.
„Сега можам да им помагам на другите“ (Стражарска кула од 1 октомври 2015)