Невидени суши — што вели Библијата?

• „Кина известува дека ова лето беше погодена од најголемиот топлотен бран досега и дека претходно имало само две посуви лета откако се водат метеоролошки записи“ (The Guardian, 7 септември 2022).

• „Ова е петта година по ред делови од Африка да бидат погодени од екстремни суши“ (UN News, 26 август 2022).

• „На повеќе од половина Европа ѝ се заканува опасност од суша која најверојатно е најлошата суша во последните 500 години“ (BBC News, 23 август 2022).

Многу експерти предвидуваат дека ваквите суши ќе продолжат, па дури и дека ќе стануваат уште поекстремни. Дали може да се надеваме на подобра иднина? Што вели Библијата?

Дали сушите биле проречени во Библијата?

Во врска со нашево време, Библијата прорекла:

• „На разни места ќе има... глад“ (Лука 21:11).

Сушите често водат до недостиг на храна. Поради таквиот недостиг на храна, многу луѓе страдаат и умираат. Со сето ова се исполнуваат библиски пророштва (Откровение 6:6, 8).

Зошто има сѐ поголеми суши?

Библијата ни открива една главна причина зошто има сѐ поголеми суши. Во неа пишува:

• „Човекот кој оди не може да управува со своите чекори“ (Еремија 10:23).

Тоа значи дека луѓето не можат успешно да управуваат со „своите чекори“, односно дека немаат способност успешно да владеат. Поради нивните лоши одлуки, честопати доаѓа до суши и недостиг на вода.

• Повеќето научници се согласуваат дека глобалното затоплување е предизвикано од човечки фактор и дека, како резултат на тоа затоплување, има сѐ повеќе суши низ целиот свет.

• Постапките на луѓето кои се алчни и кои носат одлуки без да размислуваат за иднината водат до уништување на шумите, загадување и немудро искористување на природните ресурси. Како резултат на тоа, би можеле да изгубиме големи резерви на вода.

Сепак, Библијата ни дава надеж.

Дали има некаква надеж за иднината?

Преку Библијата, Бог ни ветува дека ќе донесе решение за проблемот со водата. Како?

1. 1. Бог ќе ги уништи „оние што ја уништуваат земјата“ (Откровение 11:18). Тој ќе отстрани една од причините за недостигот на вода — ќе ги уништи злобните и алчни луѓе кои со своите постапки ѝ наштетуваат на околината (2. Тимотеј 3:1, 2).

2. 2. „Изгорената земја ќе се претвори во езеро“ (Исаија 35:1, 6, 7). Бог ќе ја поправи сета штета предизвикана од сушите и ќе ја претвори Земјата во рај во кој ќе има изобилство вода.

3. 3. „Милостиво ја гледаш земјата и ѝ даваш изобилство, многу ја збогатуваш“ (Псалм 65:9). Бидејќи Бог ќе ја благослови Земјата, на неа ќе има изобилство здрава и вкусна храна и чиста вода за сите.