Божјата мудрост се гледа во природата

„Тој нѐ учи нас повеќе отколку земните животни и нѐ прави помудри од небесните птици“ (ЈОВ 35:11).

ПТИЦИТЕ имаат неверојатни способности. Тие изведуваат воздушни маневри на кои можат да им завидат и конструкторите на летала. Некои видови птици летаат илјадници километри над едноличниот океан и непогрешливо пристигнуваат на својата цел.

Друга извонредна природна дарба на птиците — која уште повеќе открива колку е мудар Оној што ги создал — е нивната способност да комуницираат меѓусебно со крици и со песни. Да разгледаме неколку примери.

Говорот на птиците

Некои видови птици почнуваат да комуницираат уште пред да се изведат од јајцето. На пример, препелицата снесува осум јајца, и тоа по едно јајце на ден. Ако сите јајца се развиваат со исто темпо, ќе се изведат во период од осум дена. Тогаш на мајката ќе ѝ биде тешко да се грижи за разџивкани пиленца стари една недела, додека истовремено лежи и врз едно неизведено јајце. Но, интересно е што сите осум пиленца се изведуваат во период од само шест часа. Како е можно тоа? Истражувачите откриле дека една од главните причини е тоа што ембрионите на препелицата комуницираат меѓусебно додека сѐ уште се во јајцата и на некој начин се „договараат“ да се испилат речиси истовремено.

Кога птичките ќе пораснат, обично мажјакот е тој што пее. Тоа го прави особено во сезоната на парење за да ја означи својата територија или за да привлече женка. Секоја од илјадниците видови птици си има свој „јазик“, а тоа ѝ помага на женката да ги препознае мажјаците од својот вид.

Птиците најмногу пеат рано наутро и на зајдисонце, и тоа со добра причина. Во тие периоди има помалку ветар и други звуци. Истражувачите откриле дека песните на птиците се слушаат 20 пати подобро рано наутро и приквечер, отколку во текот на денот.

Иако најчесто мажјаците се песнопојците, не само тие туку и женките испуштаат најразлични крици, односно краткотрајни звуци, што си имаат свое значење. На пример, зебите имаат „речник“ од девет различни крици. Тие испуштаат еден вид крик за да предупредат на опасност од воздухот — како што е некоја грабливка која бара храна — но испуштаат поинаков крик за да предупредат на опасност што се заканува од земјата.

Неспоредлив дар

Вродената мудрост на птиците сигурно е нешто посебно. Но, кога станува збор за способноста на комуницирање, никој не може да се спореди со луѓето. Бог нѐ создал „помудри од небесните птици“, пишува во Јов 35:11. Само човекот може да изрази апстрактни, сложени мисли и идеи преку звуци што ги создава со своите гласни жици или, пак, користејќи гестови.

За разлика од другите живи суштества, изгледа дека бебето на човекот е програмирано да учи сложени јазици. Во списанието American Scientist, кое излегува на интернет, стои: „Бебињата можат да го научат јазикот дури и кога нивните родители не им зборуваат директно; глувите деца дури и измислуваат свои сопствени знаци доколку дома не се користи знаковен јазик“.

До каков заклучок доаѓаш?

До каков заклучок доаѓаш кога ќе чуеш некоја убава птичја песна или некое детенце како учи да ги изговори своите први зборови? Дали ја гледаш Божјата мудрост во она што го создал?

Откако размислувал за начинот на кој бил создаден, псалмистот Давид бил поттикнат да му рече на Бог: „Те фалам, полн со страхопочит, зашто сум чудесно создаден. Твоите дела се чудесни, и мојата душа тоа добро го знае“ (Псалм 139:14). Додека со ценење ја истражуваш Божјата мудрост која јасно се гледа во она што го создал, ќе стекнеш уште поцврста вера дека тој е способен да те води во животот.

Божјата моќ се гледа во ѕвездите

„Подигнете ги очите угоре и гледајте! Кој го создал тоа? Оној што ја изведува нивната војска според нивниот број и ги вика сите по име. Поради неговата голема моќ и неговата огромна сила не изостанува ниту едно“ (ИСАИЈА 40:26).

НАШЕТО Сонце е една ѕвезда со просечна големина. Сепак, тоа има 330.000 пати поголема маса од Земјата. Поголемиот број од блиските ѕвезди се помали од Сонцето. Но, има и други ѕвезди, како што е ѕвездата наречена V382 Cygni, што имаат барем 27 пати поголема маса од нашето Сонце.

Колкава енергија зрачи Сонцето? Замисли си колку силен треба да биде еден оган ако си оддалечен 10 километри од него, но сѐ уште можеш да ја почувствуваш неговата топлина! Сонцето е оддалечено од Земјата околу 150 милиони километри. Но, во сончев ден, неговата топлина може да предизвика изгореници на кожата! Интересно е тоа што до Земјата стигнува отприлика само еден милијардити дел од сончевата енергија. Сепак, ова мало количество е доволно за да го одржува животот на нашава планета.

Всушност, научниците пресметале дека вкупната енергија што доаѓа само од Сонцето е доволна за да се одржува живот на околу 31 билион планети како што е Земјата. Со други зборови, кога би можеле да ја собереме и искористиме целокупната енергија која Сонцето ја зрачи само во една секунда, Соединетите Држави би имале „доволно енергија за следните 9.000.000 години, според денешната стапка на користење“, вели веб-страницата на Space Weather Prediction Center (SWPC).

Сончевата енергија се создава во неговото јадро — нуклеарен реактор во кој се соединуваат атоми при што се ослободува енергија. Бидејќи Сонцето е толку големо, а неговото јадро има огромна густина, потребни се милиони години за енергијата што се создава во јадрото да стигне до неговата површина. Истата веб-страница вели: „Ако Сонцето престане да создава енергија денес, ќе бидат потребни 50.000.000 години за да се почувствуваат значителни промени на Земјата!“

Сега размисли за следново: кога ќе погледнеш кон небото во некоја ведра ноќ, гледаш илјадници ѕвезди, и секоја од нив испушта огромни количества енергија, слично на нашето Сонце. А научниците пресметале дека во вселената има стотици милијарди ѕвезди!

Како настанале сите тие? Повеќето истражувачи денес сметаат дека, од причини кои сѐ уште не можат потполно да ги разберат, вселената настанала одеднаш пред околу 14 милијарди години. Библијата едноставно вели: „Во почетокот Бог ги создаде небото и земјата“ (1. Мојсеева 1:1). Без сомнение, за Оној што ги создал џиновските енергетски постројки што ние ги нарекуваме ѕвезди може со право да се каже дека има „голема моќ“ (Исаија 40:26).