Дипломците на Гилеад добиваат поука што го допира срцето

НА 9 СЕПТЕМВРИ 2006 година, во образовниот центар Патерсон (Њујорк), се одржа промоцијата на студентите на 121-виот клас на мисионерската школа Гилеад. Програмата многу ги охрабри сите присутни.

Џефри Џексон, член на Водечкото тело на Јеховините сведоци, ја отвори програмата изразувајќи им добредојде на 56-те дипломци и на присутните од целиот свет, кои броеја 6.366 лица. Тој го разработи стихот од Псалм 86:11, каде што стои: „Поучи ме, о Јехова, за својот пат! Ќе одам во твојата вистина. Дај ми неподелено срце за да се бои од твоето име!“ Брат Џексон истакна три работи што се нагласени во тој стих. Тој рече: „Во првата реченица станува збор за поуката, во втората реченица за примената, а во третата за мотивацијата. Овие три работи се важни особено за вас, мисионерите, откако ќе отидете на своите доделби“. Потоа најави серија од говори и интервјуа во кои беа истакнати овие три работи.

Охрабрувачки и поучни зборови

Вилијам Маленфонт, член на персоналот во централата, зборуваше на темата „Најдобриот живот што можеш да го имаш“. Тој се осврна на примерот на Марија, сестра ѝ на Марта. Еднаш, кога кај нив дошол Исус, Марија избрала да седи крај неговите нозе и да го слуша, и тоа ѝ било најважно. Исус ѝ рекол на Марта: „Марија го избра подобриот дел, кој нема да ѝ се одземе“ (Лука 10:38-42). „Размислете малку за ова“, рече говорникот. „Во сета вечност Марија ќе се сеќава на тоа дека седела крај нозете на Исус и во разговор со него лице в лице слушала прекрасни духовни вистини — сѐ затоа што направила добар избор“. Откако ги пофали дипломците што направиле добар избор на духовно поле, тој рече: „Она што сте го избрале ве довело до најдобриот живот што можете да го имате“.

Потоа Ентони Морис, член на Водечкото тело, зборуваше на темата „Облечете се во Господарот Исус Христос“, говор што се темелеше на Римјаните 13:14. Како можеме да го направиме тоа? Да се облечеме во Господарот Исус Христос значи да бидеме како него. Тоа значи да го следиме неговиот пример и став. „Луѓето се чувствувале пријатно кога биле со Исус“, рече говорникот, „затоа што искрено се интересирал за нив, и тие можеле да го почувствуваат тоа“. Потоа говорникот зборуваше за тоа дека дипломците стекнале многу знаење на часовите во Гилеад, ‚за да можат да разберат што е ширината и должината и височината и длабочината‘ на вистината како што стои во Ефешаните 3:18. Но, ги потсети на 19. стих, каде што стои: „И да ја спознаете Христовата љубов, која го надминува знаењето“. Брат Морис ги поттикна дипломците: „Додека и понатаму проучувате, размислувајте за тоа како можете да се угледате на нежното сочувство на Христос и навистина ‚да се облечете во Господарот Исус Христос‘“.

Последни совети од инструкторите на Гилеад

Следниот говор го одржа инструкторот Валас Ливеранс, чија тема се темелеше на Изреки 4:7. Тој рече дека, иако Божјата мудрост е најважното нешто, мораме да ‚стекнуваме и разборитост‘, што значи да комбинираме различни факти и потоа да видиме како се поврзани еден со друг за да сфатиме некоја работа. Говорникот покажал дека стекнувањето разбирање ни носи радост. На пример, во времето на Неемија, левитите го ‚објаснувале законот‘ и ‚го разјаснувале‘. Потоа, луѓето ‚многу се радувале, зашто ги разбрале зборовите што им биле објавени‘ (Неемија 8:7, 8, 12). Брат Ливеранс на крајот рече: „Радоста е неизбежен резултат од разбирањето на Божјата реч вдахновена од светиот дух“.

„Кој е навистина твојот непријател?“ е темата што ја разработи Марк Нојмар, еден друг инструктор на Гилеад. Кога има војна, прилично голем број војници се убиени од „пријателски куршум“, погодени од своите војници. „Што е со духовната војна што ја водиме?“, праша тој. „Ако не внимаваме, би можеле да се збуниме во врска со тоа кој е нашиот вистински непријател и да ги раниме војниците што се на нашата страна“. Зависта може да збуни некои. Таа го навела цар Саул да се обиде да го убие Давид, кој исто како него го обожавал Јехова, иако негови непријатели, всушност, биле филистејците (1. Самоилова 18:7-9; 23:27, 28). Потоа, говорникот продолжи: „Што ако служите со некој мисионер што е подобар од вас во многу работи? Ќе го раниш ли војникот од твоите редови со критизерски забелешки, или ќе се помириш со фактот дека другите се подобри од тебе на многу полиња?“ Кога во центарот на вниманието ги ставаме мааните на другите, само ќе се збуниме во поглед на тоа кој е нашиот вистински непријател. „Борете се со вистинскиот непријател, Сатана“.

Убави искуства и поучни интервјуа

Следниот дел, „Проповедај ја добрата вест“, го одржа инструкторот Лоренс Боуен, и беа изнесени интервјуа и искуства. Тој објасни дека фуснотата на 2. Тимотеј 4:5 гласи „врши мисионерско дело“. Говорникот додаде: „Ова е сосема на место, бидејќи главната задача што треба да ја изврши еден мисионер што е обучен на Гилеад е да ја шири добрата вест, а сите во овој клас го правеа тоа секаде каде што ќе сретнеа некого“. Беа одглумени неколку убави искуства.

Програмата продолжи со уште два дела што ги одржаа Мајкл Барнет и Скот Шофнер, обајцата членови на бетелската фамилија. Тие интервјуираа членови на одборите на подружниците на Австралија, Барбадос, Кореја и Уганда. Коментарите на членовите на подружниците открија колку напор се вложува за да им се излезе во пресрет на потребите на мисионерите, вклучувајќи и обезбедување соодветно сместување и здравствена нега за нив. Членовите на одборите нагласија дека успешните мисионери се спремни да се приспособат на локалните услови.

Стимулирачки и мотивирачки заклучок

Главното предавање на програмата беше говорот „Бој се од Бог и оддај му слава“, што го изнесе Џон Е. Бар, долгогодишен член на Водечкото тело. Тој го разработи она што е речено во Откровение 14:6, 7, каде што стои: „Видов еден друг ангел како лета среде небото, носејќи вечна добра вест за да им ја објави на оние што живеат на земјата — на секој народ и племе и јазик и народност. И зборуваше со силен глас: ‚Бојте се од Бог и оддајте му слава, зашто дојде часот на неговиот суд!‘“

Брат Бар ги поттикна дипломците да запомнат три работи во врска со тој ангел. Прво, ангелот морал да објавува една вечна добра вест — дека Христос сега во целост владее како цар. Говорникот рече: „Сосема сме уверени дека тој бил устоличен за Цар во 1914 година. Затоа, оваа радосна вест мора да се објави низ целата Земја“. Второ, ангелот рекол: „Бојте се од Бог“. Говорникот објасни дека дипломците треба да им помагаат на оние што ја проучуваат Библијата да стекнат длабока страхопочит од Бог за да не направат нешто што не му се допаѓа. Трето, ангелот заповедал: ‚Оддајте му слава на Бог‘. „Никогаш не заборавајте“, беа поттикнати дипломците, „дека служиме за слава на Бог, а не за своја слава“. Потоа, кога зборуваше за ‚часот на суд‘, брат Бар рече: „Истекува времето до моментот кога ќе се изрече конечниот суд. Многу луѓе на нашите подрачја допрва треба да ја чујат пораката за добрата вест пред да биде предоцна“.

По овие последни зборови, 56-те дипломци добија дипломи и беа испратени до краевите на Земјата. Срцата на дипломците и на сите други присутни беа длабоко трогнати од мотивирачките совети што ги добија тој убав ден.

[Рамка на страница 17]

ПОДАТОЦИ ЗА КЛАСОТ

Број на застапени земји: 6

Број на земји во кои се испратени: 25

Број на студенти: 56

Просечна старост: 35,1

Просек на години во вистината: 18,3

Просек на години во полновремена служба: 13,9

[Слика на страница 18]

121. клас што дипломираше на Школата Гилеад

Во списокот долу, редовите се нумерирани однапред наназад, а имињата се наведени одлево надесно во секој ред.

1) Фокс Ј.; Куники Д.; Вилкинсон С.; Кавамото С.; Консоланди Џ.; Мајен К. 2) Сантијаго Н.; Кланси Р.; Фишер М.; Де Абреу Л.; Дејвис Е. 3) Хван Џ.; Хофман Д.; Риџвеј Л.; Ибрахим Џ.; Дабелштајн А.; Бакабак М. 4) Петерс М.; Џоунс К.; Форд Ш.; Пара С.; Ротрок Д.; Татлоу М.; Перез Е. 5) Де Абреу Ф.; Кавамото Ш.; Ивз С.; Бардоу Џ.; Хван Џ.; Вилкинсон Д. 6) Фокс А.; Бакабак Џ.; Сикауски П.; Форје К.; Мајен С.; Консоланди Е.; Риџвеј В. 7) Пара Б.; Перез Б.; Татлоу Ф.; Сантијаго М.; Ибрахим Ј.; Куники К. 8) Бардоу К.; Сикауски Б.; Ивз К.; Форд А.; Ротрок Џ.; Хофман Д.; Дејвис М. 9) Петерс К.; Дабелштајн К.; Џоунс К.; Кланси С.; Фишер Ј.; Форје С.