Поглавје 87

Обезбеди си ја иднината со практична мудрост

ИСУС штотуку завршил со раскажувањето на приказната за расипничкиот син пред едно мноштво во кое се наоѓаат неговите ученици, нечесни даночници и други познати грешници, како и книжници и фарисеи. Сега, обраќајќи им се на своите ученици, тој раскажува илустрација во врска со еден богат човек кој примил неповолен извештај за својот управител, односно настојник на куќата.

Според Исус, богатиот човек го повикува својот настојник и му вели дека ќе го отпушти. „Што да правам, зашто мојот господар ќе ми го одземе настојништвото?“ — се прашува настојникот. „Да копам не сум доволно јак, а да питам се срамам. Аха! Знам што да направам за да ме примат луѓето во своите куќи кога ќе ми се одземе настојништвото.“

Каков план има настојникот? Тој ги повикува оние кои имаат долг кај неговиот господар. ‚Колку должиш?‘, прашува тој.

Првиот одговара: ‚2.200 литра маслиново масло‘.

‚Земи го својот писмен договор, па седни и брзо напиши 1.100‘, му вели тој.

Потоа го прашува другиот: ‚А ти, колку должиш?‘

Тој вели: ‚22.000 литри пченица‘.

‚Земи го назад својот писмен договор и напиши 18.000.‘

Настојникот, во рамките на своите права, ги намалува должничките сметки на својот господар, бидејќи сѐ уште управува со финансиската состојба на господарот. Намалувајќи ги сумите, тој си прави пријатели од оние кои можат да му вратат услуги кога ќе го изгуби своето работно место.

Кога господарот слуша што се случило, тој е импресиониран. Всушност, тој ‚го пофалил настојникот затоа што, иако неправеден, постапил со практична мудрост‘. Навистина, додава Исус: „Синовите на овој систем на работи во практична смисла се помудри во однос на сопствената генерација отколку што се синовите на светлината“.

Сега, извлекувајќи поука за своите ученици, Исус ги охрабрува: „Направете си пријатели со помош на неправедното богатство, па кога тоа ќе затаи, да ве примат во вечните живеалишта“.

Исус не го пофалува настојникот заради неговата неправедност туку заради неговата далековида, практична мудрост. Честопати „синовите на овој систем на работи“ остроумно ги употребуваат своите пари или положба за да си направат пријатели од оние кои можат да им вратат услуги. Затоа и Божјите слуги, „синовите на светлината“, исто така треба на мудар начин да ги користат своите материјални средства, нивното „неправедно богатство“, за да биде на нивна корист.

Но, како што вели Исус, тие треба да си направат пријатели со помош на тоа богатство од оние кои можат да ги примат „во вечните живеалишта“. За членовите на малото стадо, тие места се на небото; за ‚другите овци‘, тие се на рајската Земја. Бидејќи само Јехова Бог и неговиот Син можат да примат лица на тие места, ние треба марливо да негуваме пријателство со нив, користејќи го секое „неправедно богатство“ кое го имаме за поддржување на интересите на Царството. Така, кога материјалното богатство ќе затаи или ќе исчезне, што сигурно ќе се случи, нашата вечна иднина ќе биде засигурана.

Исус понатаму кажува дека лицата кои верно се грижат дури и за тие материјални, или најмали работи исто така верно ќе се грижат за работи кои се од поголема важност. „Според тоа“, продолжува тој, „ако не сте се покажале верни во врска со неправедното богатство, кој ќе ви го довери она што е вистинско [т.е. духовните интереси или интересите за Царството]? И ако не сте се покажале верни во врска со она што е туѓо [интересите на Царството кои Бог им ги доверува на своите слуги], кој ќе ви го даде вашето [наградата живот во вечните живеалишта]?“

Ние едноставно не можеме да бидеме вистински слуги на Бог и во исто време да бидеме робови на неправедното богатство, материјалното богатство, како што Исус заклучува: „Ниеден куќен слуга не може да им биде роб на двајца господари; зашто, или едниот ќе го мрази, а другиот ќе го сака, или ќе се прилепи кон едниот, а другиот ќе го презира. Не можете да им бидете робови на Бог и на Богатството“. Лука 15:1, 2; 16:1—13; Јован 10:16.

▪ Како настојникот во Исусовата илустрација си прави пријатели од оние кои подоцна можат да му помогнат?

▪ Што е ‚неправедното богатство‘, и како со негова помош можеме да си направиме пријатели?

▪ Кој може да нѐ прими во „вечните живеалишта“, и кои се тие места?