Поглавје 121

Пред Синедрионот, потоа кај Пилат

НОЌТА привршува. Петар се одрекол од Исус по третпат, а членовите на Синедрионот завршиле со своето фалсификат судење и се разотишле. Меѓутоа, како што самнува петок наутро, повторно се состануваат, овојпат во салата на Синедрионот. Веројатно имаат намера да се остави впечаток дека ноќното судење било законско. Кога го доведуваат Исус пред нив, тие му велат, како и во текот на ноќта: „Ако си Христос, кажи ни!“

„Дури и да ви кажам, сигурно нема да верувате“, одговара Исус. „Освен тоа, ако ве прашам, сигурно нема да одговорите.“ Меѓутоа, Исус храбро укажува на својот идентитет, велејќи: „Отсега Синот човечки ќе седи откај моќната десница Божја“.

„Дали си ти тогаш Синот Божји?“ — сакаат да знаат сите тие.

„Вие сами велите дека сум“, одговара Исус.

За тие луѓе сосредоточени на убиство, овој одговор е доволен. Ова го сфаќаат како богохулство. „Зарем ни треба натамошно сведоштво?“, прашуваат тие. „Зашто сами го слушнавме тоа од неговата сопствена уста.“ Така тие го врзуваат Исус, го водат и му го предаваат на римскиот управител Понтиј Пилат.

Јуда, Исусовиот предавник, го набљудувал судењето. Кога видел дека Исус е осуден, зажалил. Затоа оди кај главните свештеници и постарите мажи за да им ги врати 30-те сребреници, објаснувајќи: „Згрешив кога предадов праведна крв“.

„Што нѐ засега нас? Тоа е твоја работа“, бездушно му одговараат. Затоа Јуда ги фрла сребрениците во храмот, оди и се обидува да се обеси. Меѓутоа, изгледа гранката на која Јуда го врзува јажето се крши, и неговото тело паѓа долу на карпите, каде се распрснува.

Главните свештеници не се сигурни што да прават со сребрениците. „Не е дозволено да се пуштаат во светата ризница“, заклучуваат тие, „бидејќи се цена за крв.“ Така, по заедничко советување, со парите ја купуваат грнчаревата нива за погребување странци. Затоа таа била наречена „Крвна нива“.

Кога Исус го доведуваат во палатата на управителот сѐ уште е рано утро. Но, Евреите кои се со него, одбиваат да влезат бидејќи веруваат дека таквата блискост со не — Евреи ќе ги извалка. Поради тоа, за да им угоди, Пилат излегува надвор. „Какво обвинение изнесувате против овој човек?“ — прашува тој.

„Ако овој не беше злосторник, немаше да ти го предадеме тебе“, одговараат тие.

Бидејќи сака да избегне да биде вмешан, Пилат одговара: „Земете го вие и судете му според вашиот закон!“

Откривајќи ја својата убиствена намера, Евреите тврдат: „Нам не ни е дозволено никого да убиеме“. Навистина, ако го убијат Исус за време на празникот Пасха, тоа веројатно би предизвикало јавен метеж, затоа што многумина имаат високо ценење за Исус. Но, ако успеат да ги наведат Римјаните да го погубат на темел на некое политичко обвинение, со тоа ќе се ослободат од одговорност пред народот.

Затоа верските водачи, не спомнувајќи го своето претходно судење во текот на кое го обвиниле Исус за богохулство, сега измислуваат поинакви обвиненија. Тие изнесуваат обвинение кое се состои од три дела: „Го најдовме овој човек како 1) ја подрива нашата нација и 2) забранува да се плаќаат даноци на цезарот и 3) вели дека самиот е Христос, цар“.

Токму ова обвинение, тврдењето на Исус дека е цар, го загрижува Пилат. Затоа, тој повторно влегува во палатата, го повикува кај себе Исус и го прашува: „Дали си ти царот на Евреите?“ Со други зборови, дали ти си го прекршил законот со тоа што си изјавил дека си цар кој се противи на цезарот?

Исус сака да знае колку Пилат веќе чул за него, па затоа го прашува: „Го велиш ли тоа сам од себе или другите ти зборуваа за мене?“

Пилат признава дека не знае за него и сака да ги дознае фактите. „Зарем јас сум Евреин?“ одговара тој. „Твојата нација и главните свештеници те предадоа кај мене. Што си направил?“

Исус на ниеден начин не сака да го заобиколи спорното прашање кое се однесува на царувањето. Одговорот што сега го дава несомнено го изненадува Пилат. Лука 22:66—23:3; Матеј 27:1—11; Марко 15:1; Јован 18:28—35; Дела 1:16—20.

▪ Со каква намера Синедрионот повторно се состанува тоа утро?

▪ Како умира Јуда, и што е сторено со 30-те сребреници?

▪ Наместо да го убијат Исус сами, зошто Евреите сакаат тоа да го сторат Римјаните?

▪ Какви обвиненија изнесуваат Евреите против Исус?