Да им се помогне на другите да ги научат Божјите барања

„Наложена ми е нужност. Навистина, тешко мене ако не ја објавувам добрата вест!“ (1. КОРИНТЈАНИТЕ 9:16, НС).

1, 2. а) Во кое двократно дело Јехова бара да учествуваме? б) Што мораат да научат луѓето со чесни срца за да станат поданици на Божјето Царство?

ЈЕХОВА има добра вест за човештвото. Тој има Царство и сака луѓето насекаде да чујат за него! Штом ќе ја дознаеме оваа добра вест, Бог бара да ја споделуваме со другите. Ова претставува двократно дело. Прво, мораме да ја објавуваме добрата вест за Божјето Царство. Во своето пророштво за „свршетокот на светот“, Исус рекол: „Ќе биде проповедано ова Евангелие за царството по целиот свет, за сведоштво на сите народи; и тогаш ќе дојде крајот“ (Матеј 24:3, 14).

² Вториот аспект на ова дело вклучува поучување на оние кои поволно се оѕвиваат на објавувањето на Царството. По своето воскресение, на една голема група свои ученици Исус ѝ рекол: „Одете и научете ги сите народи, крштавајќи ги во името на Отецот, и Синот, и Светиот Дух, и учејќи ги да пазат сѐ што сум ви заповедал; и ете, Јас сум со вас преку сите дни до свршетокот на светот“ (Матеј 28:19, 20). Она што ‚Христос го заповедал‘ не потекнувало од него; тој ги поучувал другите да ги држат Божјите заповеди, односно барања (Јован 14:23, 24; 15:10). На тој начин, да се поучуваат другите ‚да ги пазат работите што ги заповедал Христос‘ подразбира да им се помогне да ги научат Божјите барања. Лицата со чесни срца мораат да ги задоволат Божјите барања за да станат поданици на неговото Царство.

3. Што е Божјето Царство и што ќе постигне тоа, поради кое пораката за Царството претставува толку добра вест?

³ Што е Божјето Царство? И што ќе постигне тоа, поради кое пораката за Царството претставува толку добра вест? Божјето Царство е небесна влада. Тоа му е многу драго на Јеховиното срце, бидејќи е средството преку кое тој ќе го посвети своето име, исчистувајќи го од секаков прекор. Царството е инструментот што Јехова ќе го употреби за да предизвика Неговата волја да се врши и на Земјата како на небото. Затоа Исус нѐ учел да се молиме да дојде Божјето Царство и нѐ поттикнал да го ставиме на прво место во својот живот (Матеј 6:9, 10, 33). Дали сфаќаш зошто на Јехова му е толку важно да ги поучуваме другите за неговото Царство?

Предизвик, но не товар

4. Како може да се илустрира тоа дека нашата обврска да ја проповедаме добрата вест не претставува товар?

⁴ Дали е товар да се проповеда оваа добра вест? Апсолутно не! Да илустрираме: Еден татко има обврска да се грижи за своето семејство во материјален поглед. Пропустот да го прави тоа е еднаков на отфрлање на христијанската вера. Апостол Павле напишал: „Ако некој не се грижи за своите, а особено за своите домашни, тој се одрекол од верата и полош е од неверник“ (1. Тимотеј 5:8). Но, дали таа обврска е товар за еден христијански маж? Не, ако го сака своето семејство, бидејќи во тој случај, тој сака да се грижи за него.

5. Иако делото на проповедање и правење ученици е обврска, зошто треба да уживаме во нашето учество во него?

⁵ Слично на тоа, делото на проповедање и правење ученици претставува обврска, барање од кое зависи самиот наш живот. Павле вака се изразил: „Наложена ми е нужност. Навистина, тешко мене ако не ја објавувам добрата вест!“ (1. Коринтјаните 9:16, НС; спореди Језекиил 33:7—9). Меѓутоа, нашиот мотив за проповедање е љубовта, а не обична должност. Првенствено го сакаме Бог, но ги сакаме и своите ближни, а знаеме колку е важно тие да ја чујат добрата вест (Матеј 22:37—39). Таа им дава надеж за иднината. Божјето Царство наскоро ќе ги исправи неправдите, ќе го отстрани сето угнетување и ќе го обнови мирот и единството — сето тоа на вечен благослов на оние кои се подложуваат на неговото праведно владеење. Зарем не сме одушевени, да, восхитени да ја споделуваме таквата добра вест со другите? (Псалм 110:3, НС).

6. Зошто делото на проповедање и правење ученици претставува вистински предизвик?

⁶ Истовремено, ова дело на проповедање и правење ученици претставува вистински предизвик. Луѓето се разликуваат. Сите немаат исти интереси или способности. Некои се добро образовани додека, пак, други имаат многу малку образование. Читањето — некогаш омилена разонода — сега честопати се смета за заморна задача. Аписменоста, која се дефинира како „особина или состојба да се биде способен да се чита, но без интерес да се прави тоа“, претставува растечки проблем, дури и во земјите кои се фалат со висока стапка на писменост. Тогаш, како можеме да им помогнеме на луѓето со такво различно потекло и интереси да научат што бара Бог? (Спореди 1. Коринтјаните 9:20—23.)

Исправно опремени за да им помагаме на другите

7. На кој начин „верниот и разумен роб“ нѐ опремил да им помагаме на другите да ги научат Божјите барања?

⁷ Една предизвикувачка задача ќе извршиш полесно доколку ги имаш исправните алатки или опрема. Една алатка која денес е прикладна за една одредена работа, утре може да биде преиначена или дури и заменета поради изменетите потреби. Слично е и со нашиот налог да ја објавуваме пораката за Божјето Царство. Низ годините, „верниот и разумен роб“ ни ги обезбедил токму исправните алатки, публикации што се посебно наменети за користење при водењето домашни библиски студии (Матеј 24:45, НС). На тој начин, опремени сме да им помогнеме на луѓето од „сите племиња . . . народи и јазици“ да ги научат Божјите барања (Откровение 7:9). Одвреме навреме, се обезбедувани додатни свежи инструменти за да се одржи чекор со изменетите потреби на светското поле. Да разгледаме неколку примери.

8. а) Каква улога имала книгата „Бог нека биде вистинит“ во унапредувањето на библиското образование? б) Каков инструмент за делото на библиски студии бил обезбеден во 1968 година, и на кој начин бил посебно наменет? в) На кој начин книгата Вистина помогнала во делото на правење ученици?

⁸ Од 1946 до 1968 година, книгата “Let God Be True” („Бог нека биде вистинит“) беше користена како моќен инструмент за библиското образование и беа издадени околу 19.250.000 примероци на 54 јазици. Книгата Вистина која води до вечен живот, издадена 1968 година, долги години беше делотворно користена во проучувањето на Библијата со заинтересираните лица. Претходно, не беше невообичаено некои со години да проучуваат со Јеховините сведоци без да се крстат. Но, овој инструмент беше наменет да го вклучи ученикот, охрабрувајќи го да го примени она што го учи. Каков беше резултатот? Книгата Jehovah’s Witnesses​—Proclaimers of God’s Kingdom (Јеховини сведоци — објавители на Божјето Царство) наведува: „За трите службени години, почнувајќи од 1 септември 1968 и заклучно со 31 август 1971 година, се крстија вкупно 434.906 лица — повеќе од двојно од бројот на лицата кои се крстија во текот на претходните три службени години!“ Уште од нејзиното излегување, книгата Вистина постигна вчудовидувачки тираж — преку 107.000.000 на 117 јазици.

9. Каква посебна одлика има книгата Живеј засекогаш, и каков учинок имала врз редовите на објавители на Царството?

⁹ Во 1982 година, книгата Ти можеш засекогаш да живееш во рајот на Земјата стана главната книга што се користеше во водењето библиски студии. Оваа алатка има над 150 визуелни илустрации, секоја со добро формулиран текст што концизно ја истакнува поучната точка на сликата. Изданието на Наша служба за Царството од октомври 1982 година наведе: „За околу 20 години колку што книгата ‚Бог нека биде вистинит‘ беше наша главна книга за проучување (од 1946 до средината на 1960-тите), во нашите редови беа приклучени преку 1.000.000 нови објавители на Царството. Потоа беа приклучени уште 1.000.000 објавители кога книгата Вистина која води до вечен живот стана наша главна книга за проучување по нејзиното излегување во 1968 година. Дали со користењето на новата книга за проучување, Ти можеш засекогаш да живееш во рајот на Земјата, ќе доживееме слична експанзија во редовите на објавители на Царството? Секако, ако биде Јеховина волја!“ Очигледно дека беше Јеховина волја, бидејќи од 1982 до 1995 година, преку 2.700.000 лица се приклучија кон редовите на објавители на Царството!

10. Која нова алатка беше обезбедена во 1995, и зошто треба таа да им овозможи на библиските ученици прилично брз духовен напредок?

¹⁰ „Жетвата е голема, а работници малку“ — рекол Исус (Матеј 9:37). Жетвата навистина е голема. Има уште многу да се направи. Во некои земји луѓето мораат да се запишат на листа на чекање за библиски студии. Затоа, со цел побрзо да се шири спознанието за Бог, во 1995 година „верниот и разумен роб“ обезбеди една нова алатка, книгата од 192 страници со наслов Спознание кое води до вечен живот. Овој вреден инструмент не се задржува на лажните доктрини. Книгата ги изнесува библиските вистини на еден позитивен начин. Се надеваме дека таа ќе им овозможи на библиските ученици прилично брзо да напредуваат во духовен поглед. Книгата Спознание веќе има влијание врз светското поле со 45.500.000 отпечатени примероци на 125 јазици и со превод на уште 21 јазик што е во тек.

11. Каква делотворна алатка била обезбедена за да помогне да се поучат оние кое се неписмени или кои слабо читаат, и на кој начин таа оставила силен белег врз нашата глобална програма на поучување?

¹¹ Одвреме навреме, ‚верниот роб‘ обезбедуваше алатки наменети за специфична или ограничена публика. На пример, што е со луѓето на кои можеби им е потребна посебна помош поради нивното културно или религиозно потекло? Како можеме да им помогнеме да ги научат Божјите барања? Во 1982 година, го добивме токму тоа што ни требаше — брошурата од 32 страници Радувај се на животот засекогаш на Земјата! Оваа богато илустрирана публикација беше делотворна алатка за поучувањето на оние кои се неписмени или кои слабо читаат. Таа содржи многу едноставно и лесно разбирливо изнесување на основните библиски учења. Од нејзиното излегување, брошурата Радувај се на животот остави силен белег врз нашата глобална програма на поучување. Отпечатени се преку 105.100.000 примероци на 239 јазици, со што стана најпреведуваната публикација што Watch Tower Society ја има произведено до ден-денес!

12, 13. а) Каков свеж начин за достигнување на широката публика обезбедува ‚верниот роб‘ од 1990 наваму? б) Како би можеле да ги употребиме видеокасетите на Друштвото во нашата служба на подрачјето? в) Каква нова алатка неодамна беше обезбедена за да ни помогне во нашето дело на правење ученици?

¹² Освен печатени публикации, почнувајќи од 1990 година, ‚верниот роб‘ нѐ обезбеди и со едно средство за поучување кое нуди еден свеж начин за достигнување на широката публика — видеокасети. Во октомври таа година беше издадена 55-минутната видеокасета Јеховини сведоци — организацијата зад името — првата видеокасета што воопшто е произведена од Watch Tower Society. Прекрасната, информативна презентација што е достапна на 35 јазици, ја покажува организацијата на Јеховиниот предаден народ ширум светот како ја исполнува Исусовата заповед да ја објавува добрата вест по целата Земја. Видеокасетата особено е наменета да помогне во нашето дело на правење ученици. Објавителите на Царството не губеа време да почнат да ја употребуваат оваа нова алатка во службата на подрачјето. Некои ја носеа во своите ташни, секогаш спремни да им ја покажат или позајмат на заинтересираните луѓе. Набргу по нејзиното излегување, еден патувачки надгледник напиша: „Видеокасетите станаа средство на XXI⁠-​от век за достигнување на умовите и срцата на милиони лица, и затоа се надеваме дека оваа видеокасета ќе биде само првата во долгата низа видеокасети што Друштвото ќе ги употреби за унапредување на делото на Царството ширум светот“. Всушност, беа обезбедени повеќе видеокасети, вклучувајќи ја и серијата од три дела The Bible​—A Book of Fact and Prophecy (Библијата — книга на факти и пророштва) и Jehovah’s Witnesses Stand Firm Against Nazi Assault (Јеховините сведоци стојат цврсто наспроти нацистичкиот напад). Ако видеокасетите на Друштвото ги има на располагање на вашиот јазик, дали си ги употребил во својата служба на подрачјето?a

¹³ Неодамна беше обезбедена една нова алатка, брошурата Што бара Бог од нас? за да ни помогне во нашето дело на правење ученици. Зошто беше издадена? Како може да се употреби?

Испитување на новата алатка

14, 15. За кого е наменета брошурата Што бара Бог, и што содржи таа?

¹⁴ Новата публикација Што бара Бог од нас? е наменета за луѓе кои веќе веруваат во Бог и ја почитуваат Библијата. Патувачките надгледници, како и мисионери обучени во Гилеад со долгогодишно искуство во земјите во развој, помогнаа во подготвувањето на оваа брошура. Таа содржи еден комплетен курс за проучување, обработувајќи ги основните учења на Библијата. Начинот на изразување е срдечен, едноставен и директен. Во исто време, текстот не е упростен. Тој не изнесува само „млеко“ туку и „тврда храна“ од Божјата Реч, на начин кој повеќето луѓе ќе можат да го разберат (Евреите 5:12—14).

¹⁵ Во последниве години, објавителите на Царството во различни земји бараа токму една таква публикација. На пример, подружницата на Watch Tower Society на Папуа Нова Гвинеја напиша: „Луѓето се збунети од противречните религиозни учења. Потребни им се концизни изјави на вистината, поткрепени со извесен број библиски стихови што можат да ги проверат во своите Библии. Потребна им е јасна и конкретна презентација на тоа што бара Бог од вистинските христијани и кои обичаи и практики се неприфатливи за него“. Брошурата Што бара Бог е токму она што ни е потребно за да им помогнеме на таквите лица да ги научат Божјите барања.

16. а) Кој особено би можел да извлече корист од едноставните објаснувања во новата брошура? б) Како би можеле лицата на твоето подрачје да извлечат корист од брошурата Што бара Бог?

¹⁶ Како можеш да го употребиш овој нов инструмент? Како прво, тој може да се употреби за проучување со луѓе кои имаат тешкотија со читањето или кои можеби не се склони да читаат.b Таквите поединци можат да извлечат корист од едноставните објаснувања во брошурата. Откако претходно разгледале еден примерок од оваа публикација, подружниците на Watch Tower го напишаа следново: „Брошурата ќе биде многу корисна во многу делови од земјата каде што луѓето не се баш наклонети да читаат“ (Бразил). „Постои еден значителен број имигранти кои не умеат да го читаат својот домашен јазик, а кои сѐ уште имаат тешкотија да читаат на француски. Оваа брошура може да се употреби како помагало за проучување со таквите лица“ (Франција). Можеш ли да размислиш за луѓето на твоето подрачје кои би можеле да извлечат корист од брошурата Што бара Бог?

17. На кој начин новата брошура би можела да биде од корист во многу земји, и зошто?

¹⁷ Второ, во многу земји, брошурата може да биде корисна за започнување библиски студии со богобојазливите луѓе, без оглед на тоа колку се образовани. Се разбира, треба да се вложи напор за да се започне студија со книгата Спознание кое води до вечен живот. Но, во некои случаи може да е полесно да се започне студија со брошура. Потоа, во некое погодно време, студијата може да се префрли на книгата Спознание, нашето главно и претпочитано помагало за проучување. Во врска со оваа употреба на брошурата Што бара Бог, подружниците на Watch Tower напишаа: „Започнувањето библиски студии е тешко, а изгледа дека шансите за започнување студија се подобри кога објавителите ќе почнат со брошура“ (Германија). „Една брошура од ваков вид ќе биде многу делотворна во започнувањето нови библиски студии, кои потоа би можеле да се продолжат со книгата Спознание“ (Италија). „Иако Јапонците имаат високо ниво на образование, повеќето имаат многу ограничено спознание за Библијата и за нејзините основни учења. Брошурата би требало да биде извонредна отскочна даска кон книгата Спознание“ (Јапонија).

18. Што треба да запомниме во врска со исполнувањето на Божјите барања?

¹⁸ Подружниците на Друштвото ширум светот ја побараа оваа брошура, а дадено е одобрение да се преведе на 221 јазик. Нека оваа нова публикација се покаже драгоцена така што ќе ни помогне да им помогнеме на другите да научат што бара Јехова Бог од нив. Што се однесува до нас, да запомниме дека исполнувањето на Божјите барања, вклучувајќи ја и заповедта да проповедаме и правиме ученици, ни дава скапоцена прилика да му покажеме на Јехова колку го сакаме. Да, она што Бог го бара од нас не е никаков товар. Тоа е најдобриот начин на живеење! (Псалм 18:7—11).

[Фусноти]

Можеш ли да објасниш?

◻ Во кое двократно дело Јехова бара да учествуваат неговите слуги?

◻ Зошто нашата обврска да проповедаме и да правиме ученици не ни е товар?

◻ Какви алатки обезбедил „верниот и разумен роб“ за користење во нашето дело на проповедање и правење ученици?

◻ За кого е наменета брошурата Што бара Бог, и како би можеле да ја употребиме во нашата служба?

[Слика на страница 24]

Нашето дело на проповедање и правење ученици не претставува товар

[Слики на страница 26]

„Бог нека биде вистинит“ (1946, ревидирана 1952): 19.250.000 на 54 јазици (на англиски)

„Вистина која води до вечен живот“ (1968): 107.000.000 на 117 јазици (на француски)

„Ти можеш засекогаш да живееш во рајот на Земјата“ (1982): 80.900.000 на 130 јазици (на руски)

„Спознание кое води до вечен живот“ (1995): 45.500.000 на 125 јазици (на германски)