Биди задоволен со она што го имаш
1 Писмото нѐ советува да се грижиме за нашето домаќинство во материјален поглед, но тоа не треба да стане главна цел во нашиот живот. Духовните работи мораат да бидат на прво место (Мат. 6:33; 1. Тим. 5:8). Во овие ‚критични времиња со кои тешко се излегува на крај‘ предизвик е да се најде исправна рамнотежа (2. Тим. 3:1). Што ќе ни помогне да го сториме тоа?
2 Усвој го библиското гледиште: Божјата реч нѐ предупредува дека стремежот по богатство може да доведе до духовна пропаст (Проп. 5:10; Мат. 13:22; 1. Тим. 6:9, 10). Во овој пресуден час, би било катастрофално да станеме толку преокупирани со световното вработување или со финансиските грижи што ќе ги ставиме духовните активности — состаноците, проучувањето и службата — на второ место во нашиот живот (Лука 21:34—36). Спротивно на тоа, Библијата нѐ советува: „Кога имаме храна и покрив, да бидеме задоволни со тоа“ (1. Тим. 6:7, 8).
3 Ова не значи дека од христијаните се бара да живеат во самонаметната сиромаштија. Но, тоа ни помага да препознаеме кои се нашите вистински материјални потреби — храна, облека и соодветно место за живеење. Ако ни се задоволени животните потреби, не треба бескрајно да се стремиме по повисок животен стандард. Кога размислуваме да купиме нешто или да прифатиме дополнителна работа, добро би било да се запрашаме: „Дали ова навистина е потребно?“ Тоа ќе ни помогне да внимаваме на инспирираниот совет: „Вашиот начин на живот нека биде ослободен од љубовта кон парите, и бидете задоволни со она што го имате сега“ (Евр. 13:5).
4 Ако имаме доверба во Јехова, тој ќе нѐ благослови (Посл. 3:5, 6). Иако мораме напорно да работиме за да ги задоволиме секојдневните потреби, нашиот живот не се врти околу тие работи. Сеедно дали имаме малку или многу, се потпираме на Јехова да ги задоволи нашите потреби (Фил. 4:11—13). Како резултат на тоа уживаме побожно задоволство заедно со многу други благослови.
5 Имитирај ја верата на другите: Една самохрана мајка која ја подигала својата ќерка на патот на вистината постепено го поедноставувала својот живот. Иако уживала во удобноста на својот дом, се преселила во помала куќа, а потоа во стан. Ова ѝ овозможило да работи помалку часови со што можела да посвети повеќе време на службата. Откако ќерката пораснала и се омажила, мајката се пензионирала пред време, иако тоа значело дополнително намалување на нејзиниот приход. Нашата сестра сега веќе седум години е општ пионер и воопшто не жали за материјалните жртви што ги направила за да ги стави интересите на Царството на прво место во својот живот.
6 Еден старешина и неговата сопруга пионереле долги години додека подигале три деца. Како семејство, тие научиле да бидат среќни со тоа да ги задоволат своите потреби наместо да си ги задоволат желбите. Братот коментира: „Моравме да живееме поедноставно. Иако имавме некои тешки периоди, Јехова секогаш ни го даваше потребното . . . Кога гледам дека моето семејство на прво место ги става духовните интереси, чувствувам дека сѐ е како што треба и дека сум постигнал нешто“. Неговата сопруга додава: „Кога ќе го видам [мојот сопруг] зафатен со духовни работи, чувствувам длабоко внатрешно задоволство“. И децата се радосни што нивните родители одлучиле да му служат на Јехова полновремено.
7 За сите оние што наместо да се стремат по материјалните работи избираат ваков правец на побожна оддаденост, Библијата ветува богати благослови и сега и во животот што доаѓа (1. Тим. 4:8).