Вистинско христијанско единство — како?

¹ Што може да обедини повеќе од шест милиони луѓе од 234 земји и од околу 380 јазични групи? Само обожавањето на Јехова Бог (Мих. 2:12; 4:1—3). Јеховините сведоци знаат од лично искуство дека денес вистинското христијанско единство е реалност. Како „едно стадо“ под „еден пастир“, решени сме да се спротивставиме на разорниот дух на овој свет (Јован 10:16; Ефеш. 2:2).

² Непогрешливата намера на Бог е сите интелигентни суштества да бидат обединети во вистинско обожавање (Откр. 5:13). Знаејќи колку е важно ова, единството на неговите следбеници Исус го направил предмет на сесрдна молитва (Јован 17:20, 21). Како може секој од нас да придонесе за единството во христијанското собрание?

³ Како се постигнува единство: Без Божјата реч и без Божјиот дух, христијанското единство би било недостижно. Тоа што го применуваме она што го читаме во Библијата му дозволува на Божјиот дух слободно да протекува во нашиот живот. Тоа ни овозможува ‚да го одржуваме единството на духот во обединувачката врска на мирот‘ (Ефеш. 4:3). Ова нѐ тера да се поднесуваме еден со друг со љубов (Кол. 3:13, 14; 1. Петр. 4:8). Го унапредуваш ли единството со тоа што секој ден медитираш за Божјата реч?

⁴ Исто така, нѐ обединува и нашиот налог да проповедаме и да правиме ученици. Кога работиме со другите во христијанската служба, „борејќи се рамо до рамо за верата на добрата вест“, стануваме „соработници во вистината“ (Фил. 1:27; 3. Јов. 8). Додека го правиме тоа, обединувачките врски на љубовта во собранието се зајакнуваат. Зошто не поканиш некого со кого во последно време не си бил во службата на теренот да те придружува оваа седмица?

⁵ Колкава само предност имаме што сме дел од единственото вистинско меѓународно братство на земјата денес! (1. Петр. 5:9). Неодамна, илјадници лица од прва рака го искусија ова глобално единство на меѓународните конгреси „Оддајте му слава на Бог“. Сите ние да придонесуваме за ова скапоцено единство така што ќе ја читаме Божјата реч секој ден, ќе ги решаваме несогласувањата со љубов и ќе ја проповедаме добрата вест „еднодушно“ (Рим. 15:6).

Да ги бараме достојните

¹ Упатствата на Исус за извршување на проповедничкото дело се предизвик за нас. Тој рекол: „Во кој град или село ќе влезете, побарајте кој во него е достоен“ (Мат. 10:11). Денес, кога луѓето поминуваат сѐ помалку време дома, како можеме успешно да го извршиме ова барање?

² Анализирај го своето подрачје: Почни со тоа што ќе го анализираш своето подрачје. Кога е најверојатно луѓето да бидат дома? Каде можеш да ги најдеш во текот на денот? Дали има одреден ден од седмицата или одредено време од денот кога можеби ќе бидат поприемчиви? Тоа што ќе ја приспособиш својата служба на рутината и околностите на луѓето на твоето локално подрачје може да ти помогне да постигнеш најдобри резултати (1. Кор. 9:23, 26).

³ Многу објавители имале успех во текот на раните вечерни часови. Некои станари се поопуштени и поспремни да слушаат во тоа време. Во текот на зимските месеци, кога денот е пократок, делотворно може да се покаже сведочењето по телефон во вечерните часови (таму каде што е дозволено). Исто така, други начини за да се достигнат луѓето со добрата вест се и сведочењето на деловно подрачје и сведочењето на јавни места.

⁴ Во текот на еден месец на посебна активност, едно собрание организирало сведочење доцна попладне во сабота и во недела и сведочење навечер во среда и во петок. Исто така, организирале сведочење по телефон и на деловно подрачје. Овие подготовки создале толку голема одушевеност за службата што собранието решило да продолжи со тие подготовки.

⁵ Биди марлив во повторните посети: Ако на твоето подрачје е тешко да се најдат луѓето дома кога ќе навратиш повторно, на крајот од секоја посета, вклучувајќи ја и првата, обиди се да се договориш за конкретен термин кога ќе ги посетиш пак. Потоа, цврсто држи се на договорот (Мат. 5:37). Ако е пригодно, можеш да му го побараш телефонскиот број на станарот. Ова исто така може да ти помогне повторно да стапиш во контакт со лицето.

⁶ Нашите марливи напори да ги бараме достојните и да го негуваме интересот на кој ќе наидеме навистина ќе бидат благословени од Јехова (Посл. 21:5).