Зошто е тешко да се најде вистинска љубов

Не можеме да се пожалиме дека нема доволно совети во врска со романтичната љубов. Психотерапевтите и советниците ни ги нудат своите решенија. Во отворените емисии на телевизија честопати се зборува на оваа тема.

ГОЛЕМ број веб-страници на Интернет тврдат дека го имаат клучот за тоа како да се најде вистинска љубов. Можеби те уверуваат дека ќе откриеш „фасцинантни и неверојатни тајни“ и дека ќе учиш за љубовта од „професионални стројници“, „експерти за врски“ и „специјалисти за љубов“, а да не зборуваме за психотерапевти, психолози и астролози.

Книгите и списанијата кои зборуваат на тема љубов се продаваат дури да трепнеш, иако некои од нив даваат и претерани ветувања. На пример, една книга тврди дека ќе те научи „како да натераш некого да се заљуби во тебе“. Друга вели дека ќе ти ја открие тајната како да го најдеш „совршениот партнер за само еден месец“. Дали еден месец ти се чини предолго? Тогаш, има книга што ќе ти каже како можеш, „за помалку од 90 минути“, да натераш некого да те сака засекогаш.

Сите овие совети си имаат своја цена. Мнозина плаќаат и двојна цена. Прво плаќаат со пари за да го добијат советот. А потоа, кога ќе сфатат дека советот бил чисто промашување — како што често и се случува — плаќаат со емоционална болка кога работите нема да излезат онака како што очекувале.

Меѓутоа, има една книга чиишто совети, доколку ги применуваме, секогаш функционираат. Освен тоа, таа зборува реално за љубовта, без да изнесува некакви неверојатни тврдења и без да дава нереални ветувања. Иако е напишана многу одамна, нејзините совети никогаш не застаруваат. На нејзиниот Автор му нема рамен — ни во мудроста ни во љубовта. Можеби и ти ја имаш оваа посебна книга — Библијата. Без оглед на нашите околности или потекло, од Библијата можеме да научиме сѐ што треба да знаеме за љубовта. А советите во неа се бесплатни.

Дали Библијата ќе ни помогне да имаме добри односи со сите? Не. Колку и да се трудиме, на некои луѓе никогаш нема да им бидеме мили. А вистинската љубов и не може да се изнуди со сила (Песна над песни 8:4). Меѓутоа, доколку ги применуваме советите од Библијата, имаме поголеми шанси да бидеме во добри односи со другите, иако можеби за тоа ќе треба да вложиме време и сила. За овој аспект на љубовта ќе зборуваме во следната статија, но најнапред да разгледаме зошто денес е сѐ потешко да се најде вистинска љубов.

Љубовта „ќе олади“

Во своето величествено пророштво за „завршетокот на системот на работи“, Исус точно претскажал какви ќе бидат условите и во кој правец ќе се движат работите во нашево време. Тој рекол дека во светот ќе има беззаконие и војни — чиста спротивност на љубовта! Исто така рекол дека „мнозина . . . ќе се предаваат еден со друг и ќе се мразат еден со друг“ и дека „љубовта на повеќето ќе олади“ (Матеј 24:3-12). Зарем не се согласуваш дека луѓето стануваат сѐ поладни и дека нема вистинска љубов — дури ни во семејството?

Освен Исус, и апостол Павле ги опишал во детали условите во општеството во „последните денови“. Тој напишал дека луѓето ќе бидат „себељубиви, љубители на пари, вообразени, надуени, хулители, непослушни на родителите, неблагодарни, нелојални, без природна наклоност, непристапни за каков и да е договор, клеветници, без самосовладување, свирепи, без љубов кон доброта, предавници, своеглави, надуени од гордост, љубители на уживања наместо љубители на Бог“ (2. Тимотеј 3:1-4). Денес во многу земји овие работи станале нешто сосем вообичаено.

Сега размисли: Дали те привлекуваат горделиви, неблагодарни луѓе, кои не се лојални и кои би те клеветеле или би те издале? Сакаш ли да бидеш со луѓе кои се полни со себе и кои мислат само на пари или на уживања? Бидејќи себичниот човек дозволува врз неговите односи со другите да влијаат алчноста и неговите сопствени желби, секоја заинтересираност што ќе ја покаже за некого веројатно ќе биде од корист. Библијата мудро советува: „Од таквите одвратувај се“ (2. Тимотеј 3:5).

Забележи ја и изјавата дека луѓето што ќе живеат во последните денови ќе бидат „без природна наклоност“, или како што вели еден друг превод ќе „немаат љубов кон семејството“. За жал, сѐ повеќе деца растат во такви домови. Честопати, за љубовта учат од медиумите. Но, дали медиумите даваат точна слика за љубовта, љубов што навистина ќе придонесе за подобри односи?

Љубов од приказните или вистинска љубов?

До некој степен, медиумите влијаат врз сите нас. Една госпоѓа што се занимава со истражувања на таа тема напишала: „Популарната култура — филмовите и телевизијата, книгите и списанијата, радиото и музиката, рекламите, па дури и вестите — уште од мали нозе нѐ преплавува со приказни и утврдени стереотипи во врска со сексот, љубовта и романтиката“. Таа понатаму вели: „Сексот, љубовта и романтиката што се прикажуваат во медиумите ги обликуваат или уште повеќе ги зголемуваат нереалните очекувања кои повеќето од нас нема никогаш сосема да ги отфрлат. Поради нив не сме задоволни со партнерот, а не сме задоволни ни со самите себе“.

Да, книгите, филмовите и песните ретко даваат реална слика за љубовта. Впрочем, нивната главна цел е да ги забавуваат луѓето, а не да ги поучат. Па така, писателите и понатаму пишуваат на големо на оваа тема нудејќи им на читателите една мешавина од романтика и фантазија. Се разбира, ним тоа ќе им донесе големи пари. Но, за жал, многу лесно може да се случи читателот да ја помеша реалноста со фантазијата. Затоа луѓето честопати се разочарани кога нивните врски не се исти како врските на измислените ликови од романите или од филмовите. Тогаш, како можеме да направиме разлика помеѓу тоа што е фантазија, а што е реалност, што е љубов од бајките, а што е вистинска љубов? Да разгледаме некои споредби.

Љубов од бајките наспроти вистинска љубов

Иако љубовните приказни во книгите, филмовите или драмите можеби се разликуваат, сите тие во основа се правени по ист шаблон. Во списанието Writer се вели: „Повеќето љубовни романи и понатаму се пишуваат по еден утврден шаблон. Има добра причина за тоа. Шаблонот ‚момчето сретнува девојка—момчето ја губи девојката—момчето повторно ја придобива девојката‘ е испробан и ефикасен и ги освојува читателите одново и одново, без разлика на кое место и во кое време во кои се одигрува приказната“. Да го разгледаме подетално овој шаблон.

Момчето сретнува девојка: Згодниот принц запознава убава девојка и меѓу нив се раѓа љубов. Една позната писателка ги советува оние што сакаат да пишуваат љубовни романи дека, „уште од првиот момент кога ќе се здогледаат овие две души, на читателот треба веднаш да му биде јасно дека се создадени еден за друг“.

Според идејата за „љубов на прв поглед“ вистинската љубов е само чувство — силна емоција што те обзема кога ќе го запознаеш „оној вистинскиот“ (или „вистинската“). Ова би значело дека таквата љубов се раѓа одеднаш и не бара од тебе добро да ја познаваш другата личност. Меѓутоа, вистинската љубов е нешто повеќе од чувство. Точно, вклучени се и чувства, но љубовта е длабока човечка врска која вклучува и начела и морални вредности и која, доколку исправно се цени и се одржува, никогаш не престанува да расте (Колошаните 3:14).

Освен тоа, потребно е време за да ја запознаеш другата личност. Малку е нереално да мислиш дека си го нашол совршениот партнер на прв поглед, и ова обично води до разочарување. Освен тоа, ако брзо заклучиш дека си ја нашол вистинската љубов, можеби ќе станеш слеп за доказите што покажуваат дека не е така. За да си избереш партнер што ќе ти одговара, потребно ти е нешто повеќе од интуиција врз која влијае занесот на заљубеноста. Затоа, не брзај. Многу истражувања покажале дека лошиот избор на брачен партнер може негативно да се одрази врз работата, врз менталното и физичкото здравје, па дури и врз животниот век.

Момчето ја губи девојката: Злобен гроф ја грабнува убавата девојка и бега со неа од замокот. Принцот тргнува во опасна потрага за да ја најде. Претставничката за печат на американското здружение Писатели на љубовни романи вели: „Главниот заплет во љубовната приказна мора да се врти околу двајца што се заљубуваат и потоа се борат за својата љубов“. Во повеќето романи врската меѓу нив ќе успее — читателот го знае тоа. Пречките, кои честопати доаѓаат однадвор, се надминуваат.

Во вистинскиот живот проблемите обично доаѓаат и однадвор и однатре. Може да бидат поврзани со пари, работа, роднини и пријатели. До проблеми доаѓа и кога едниот не ги исполнува очекувањата на другиот. Мааните на ликовите од приказните обично се многу мали, но во вистинскиот живот не е секогаш така. Освен тоа, вистинската љубов сама по себе, без никаков труд од наша страна, нема да ни ги реши разликите во гледиштата, во потеклото, желбите и карактерот. Напротив, љубовта бара од нас соработка, понизност, благост, стрпливост и долготрпеливост — особини што секогаш не ни доаѓаат природно или лесно (1. Коринќаните 13:4-7).

Момчето повторно ја освојува девојката: Принцот ја спасува убавата девојка и го протерува грофот. Принцот и девојката се венчаваат и си живеат среќно до крајот на животот. Еден уредник на љубовни романи им го дава следниов совет на оние што сакаат да бидат писатели: „Приказната мора да заврши во стилот: ‚И така, си живееја среќно до крајот на животот‘ . . . Читателот треба да биде задоволен што двајцата вљубени се заедно и се среќни“. Во љубовните романи ликовите многу ретко се прикажани по повеќе години брак. Во текот на тоа време, можеби се јавиле несогласувања и многу други проблеми што ја ставиле врската на испит. А како што покажуваат статистиките за разводот, многу бракови не го поминуваат тој испит.

Да, за љубовта од бајките не треба многу; за вистинската љубов е потребен труд. Ако ги увидиш разликите што постојат помеѓу нив, нема да имаш наивни, нереални очекувања. Исто така, нема брзоплето да даваш ветувања за кои подоцна можеби ќе зажалиш. Следната статија ќе зборува за тоа како да развиеш вистинска несебична љубов и како самиот да станеш помила личност.

[Истакната мисла на страница 5]

Луѓето што сакаат помалку, помалку се сакани

[Истакната мисла на страница 7]

За љубовта од бајките не треба многу; за вистинската љубов е потребен труд

[Рамка/слика на страница 6]

Главните ликови во љубовните приказни

Во Соединетите Држави, годишната заработка од продажбата на љубовни романи е преку милијарда долари. Околу половина од книгите со меки корици што се продаваат во таа земја се љубовни романи. Според статистиките што ги објави американското здружение Писатели на љубовни романи, трите основни одлики што читателите, од кои околу 90 отсто се жени, ги очекуваат кај главниот машки лик се сила, добар изглед и интелигенција. Трите најпопуларни одлики кај главниот женски лик се интелигенција, цврст карактер и привлечност.

[Слики на страници 6 и 7]

Медиумите ретко даваат реална слика за љубовта