1. Барај поддршка

Предизвик

„Некои работи со кои постојано морам да се борам се уморот и да најдам време за сѐ“, вели Алина која има два мали сина. Речиси сите самохрани мајки се борат со вакви предизвици. Од таа причина, многу самохрани родители имаат блиски пријатели од кои можат во секое време да побараат помош без да им биде непријатно.

Предлози

Барај помош од роднини и пријатели во кои можеш да имаш доверба. Би можел да си направиш список со лица од кои би побарал помош, сеедно дали треба некој да ти ги причува децата, да те префрли до некаде, да поправи нешто низ дома или да ти даде емотивна поддршка. Одвреме-навреме проверувај го овој список и направи промени ако е потребно. Провери и каква помош ти следува од државата и од невладините организации.

Рената, која е Јеховин сведок, добива голема помош од сохристијаните. „Тие се секогаш тука за мене“, вели таа. „Еднаш јас и моите две деветгодишни ќеркички фативме грип. Толку ми беше лошо што не можев ни да готвам. Штом другите од собранието дознаа, секој ден доаѓаше некој да ни донесе храна.“ Ваквите љубезни дела нѐ потсеќаат на зборовите запишани во Библијата, во 1. Јованово 3:18: „Дечиња, да не се сакаме ниту со зборови ниту со јазик, туку со дела и со вистина“.

Би можел ли да помогне и другиот родител? Ако другиот родител, обично таткото, има законско право да поминува одредено време со децата и чувствува одговорност и е спремен да помогне, би можела да го поделиш товарот со него. На крајот на краиштата, децата треба да поминуваат време и со својот татко.a

Учи ги децата да помагаат. Кога им даваш на децата задолженија соодветни за нивната возраст, им помагаш и ним и себеси. Работата ги учи децата на одговорност и им всадува добри работни навики кои многу ќе им користат во животот.