Труди се да ги видиш јаките страни кај другите

Коренот на проблемот

Вообразеноста е плодна почва за предрасуди. Еден вообразен човек има превисоко мислење за себе и смета дека е подобар од оние што се поинакви од него. Секој може да падне во оваа замка. Во една енциклопедија пишува: „Речиси секој ќе рече дека културата од која потекнува барем во извесна мера е подобра од другите. И тоа во однос на начинот на живот, храната, облеката, навиките, верувањата, вредностите итн.“ (Encyclopædia Britannica). Што ќе ни помогне да немаме вакво погрешно гледиште?

Библиско начело

„Од понизност сметајте ги другите за поголеми од себе“ (ФИЛИПЈАНИТЕ 2:3).

Што учиме од ова? Противотров за горделивоста е понизноста. Понизноста ни помага да сфатиме дека во некои работи другите се подобри од нас. Ниту еден народ, ниту една група, не може да се пофалат дека се најдобри во сѐ.

Да го разгледаме примерот на Штефан. Тој пораснал во комунистичка земја, но успеал да ги надмине предрасудите што ги имал кон луѓето од некомунистичките земји. Тој вели: „Сфатив дека, за човек да ги победи предрасудите, многу е важно да ги смета другите за подобри од себе. Јас не знам сѐ и од секој човек можам да научам по нешто“.

Што можеш да направиш

Биди реален и не заборавај дека и ти имаш слабости и правиш грешки. Прифати го фактот дека во некои работи другите се подобри од тебе. Не ги ставај во ист кош сите луѓе што припаѓаат на одредена група.

Наместо да имаш негативно мислење за некого само затоа што припаѓа на одредена група луѓе, прашај се:

• „Дали работите што не ми се допаѓаат кај него се навистина лоши или се само поинакви?“

• „Дали тој би ми нашол мани мене?“

• „Во кои работи е подобар од мене?“

Ако искрено размислиш за овие работи, не само што ќе ги надминеш предрасудите туку ќе најдеш и работи што ти се допаѓаат кај тој човек.