Колку Јеховини сведоци познаваш? Можеби некои од нас ти се соседи, колеги или соученици. Или, пак, можеби некогаш си разговарал со нас за Библијата. Кои сме, всушност, ние и зошто зборуваме за своите верувања со другите?

Ние сме обични луѓе. Сите ние имаме најразлично потекло и живееме во различни услови. Некои од нас порано припаѓале на друга религија, а други, пак, не верувале во Бог. Но, пред да станеме Јеховини сведоци, сите ние сме посветиле време внимателно да ги испитаме учењата од Библијата (Дела 17:11). Сфативме дека она што го дознавме е вистина и донесовме лична одлука да му служиме на Јехова Бог.

Имаме корист од она што го учиме од Библијата. Како секој друг, и ние мораме да се бориме со разни проблеми и со нашите слабости. Но, бидејќи се трудиме да живееме според библиските начела, водиме подобар живот (Псалм 128:1, 2). Тоа е една причина зошто сакаме да им ги кажеме на другите убавите работи што ги учиме од Библијата.

Живееме според вредностите на кои нѐ учи Бог. Овие вредности што ги учиме од Библијата нѐ поттикнуваат да им правиме добро на другите и да ги почитуваме, и да развиваме особини како што се чесноста и љубезноста. Библиските начела им помагаат на луѓето да бидат одговорни и корисни членови на општеството и придонесуваат за обединети семејства и за висок морал. Бидејќи сме уверени дека „Бог не е пристрасен“, се чувствуваме како едно меѓународно семејство во кое сите имаат исти верувања и во кое не постојат никакви расни и политички бариери. Точно, ние сме обични луѓе, но обединети во едно уникатно братство (Дела 4:13; 10:34, 35).

• Какви сличности постојат меѓу Јеховините сведоци и другите луѓе?

• Кои вредности Јеховините сведоци ги научиле од Библијата?

Многу луѓе мислат дека „Јеховини сведоци“ е име на некоја нова религија. Но, уште пред повеќе од 2.700 години, слугите на единствениот вистински Бог биле наречени негови „сведоци“ (Исаија 43:10-12). До 1931 год., бевме познати како Истражувачи на Библијата. Зошто го усвоивме името Јеховини сведоци?

Кажува кој е нашиот Бог. Според древните ракописи, Божјето име, Јехова, се појавува илјадници пати во Библијата. Во многу преводи на Библијата ова име е заменето со титули, како што се Господ или Бог. Сепак, кога зборувал со Мојсеј, вистинскиот Бог и самиот го користел своето лично име, Јехова, и му рекол: „Тоа е моето име за навек“ (2. Мојсеева 3:15). На тој начин, Бог се издвоил од сите лажни богови. За нас е голема чест да го носиме Божјето свето име.

Покажува која е нашата задача. Почнувајќи од праведниот Авел, низ вековите многу луѓе сведочеле за својата вера во Јехова. Во овој „голем облак од сведоци“ спаѓаат и Ное, Авраам, Сара, Мојсеј, Давид и други (Евреите 11:4—12:1). Како што некој би сведочел на суд во одбрана на некое невино лице, така и ние сме решени да ја објавуваме вистината за нашиот Бог.

Го следиме примерот на Исус. Библијата го нарекува Исус „верниот и вистинит сведок“ (Откровение 3:14). Самиот Исус рекол дека ‚го објавил Божјето име‘ и дека ‚сведочел за вистината‘ за Бог (Јован 17:26; 18:37). Според тоа, вистинските следбеници на Христос треба да го носат Божјето име и да го објавуваат. Јеховините сведоци се трудат да го прават токму тоа.

• Зошто Истражувачите на Библијата го усвоиле името Јеховини сведоци?

• Колку долго Јехова има сведоци на Земјата?

• Кој е најголемиот сведок на Јехова?

Библијата прорекла дека по смртта на Христос ќе се појават лажни учители меѓу првите христијани кои ќе ја искриват библиската вистина (Дела 20:29, 30). Со текот на времето, токму тоа и се случило. Ги помешале учењата на Исус со паганските религиозни идеи и се појавил лажен облик на христијанство (2. Тимотеј 4:3, 4). Како да бидеме сигурни дека денес исправно разбираме што навистина учи Библијата?

Дошло време Јехова да ја открие вистината. Тој претскажал дека во „времето на крајот... вистинското знаење ќе се умножи“ (Даниел 12:4). Во 1870 год., една мала група луѓе кои ја барале вистината сфатиле дека многу црковни учења не се библиски. Затоа, истражувале што навистина учи Библијата и Јехова им помогнал да ги сфатат тие учења.

Искрените луѓе внимателно ја проучувале Библијата. Тие искрени Истражувачи на Библијата, наши претходници, имале метод на проучување на Светото писмо кој го користиме и ние денес. Дискутирале за Библијата тема по тема. Кога ќе наишле на дел што тешко можел да се разбере, барале други библиски стихови со кои можеле да го објаснат тој дел. Кога ќе дошле до заклучок кој бил во согласност со целата Библија, го запишувале. Бидејќи дозволиле Библијата да се толкува самата себеси, успеале повторно да ја откријат вистината за Божјето име и за Божјето Царство, за неговата намера со човештвото и со Земјата, за состојбата на мртвите и за надежта во воскресение. Нивната потрага ги ослободила од голем број лажни верувања и обичаи (Јован 8:31, 32).

Истражувачите на Библијата сфатиле дека дошло време да ја објават вистината насекаде. Затоа, во 1879 год. почнале да го издаваат списанието што се издава и ден-денес — Стражарска кула го објавува Јеховиното Царство. Сега, библиската вистина ја објавуваме во 240 земји и на преку 750 јазици. Никогаш порано вистинското знаење не било толку големо!

• Што се случило со библиската вистина по смртта на Христос?

• Што ни помогнало повторно да ја откриеме вистината од Божјата Реч?

Со децении, Јеховините сведоци користеа, печатеа и дистрибуираа различни преводи на Библијата. Но, тогаш увидовме дека има потреба од нов превод што ќе им помогне на луѓето „добро да ја запознаат вистината“, што е во склад со Божјата волја (1. Тимотеј 2:3, 4). Па така, во 1950 год. почнавме да издаваме делови од нашиот превод на Библијата, Преводот Нов свет, на современ англиски јазик. Потоа, тој превод послужи како темел за да се направи точен превод на Библијата на преку 130 јазици.

Беше потребна лесно разбирлива Библија. Со текот на времето, јазиците се менуваат, па многу преводи содржат нејасни или застарени изрази што тешко може да се разберат. Освен тоа, беа откриени древни ракописи кои се поточни и, временски гледано, поблизу до периодот кога биле напишани оригиналните записи, а тоа помогна подобро да се разбере библискиот хебрејски, арамејски и грчки јазик.

Беше потребен превод кој верно ќе ја пренесе Божјата реч. Наместо да си земаат слобода со Божјите вдахновени списи, преведувачите на Библијата треба верно да го следат оригиналниот текст. Меѓутоа, во повеќето преводи на Светото писмо не се спомнува Божјето име, Јехова.

Беше потребна Библија што ќе му оддаде признание на нејзиниот Автор (2. Самоилова 23:2). Во Преводот Нов свет, Јеховиното име е вратено на околу 7.000 места каде што се јавува во најстарите библиски ракописи, како што се гледа од фрагментот на сликата (Псалм 83:18). Оваа Библија, која е плод на повеќегодишно внимателно истражување, е задоволство да се чита бидејќи јасно ги пренесува Божјите мисли. Сеедно дали имаш Превод Нов свет на твојот јазик или не, убаво е да си стекнеш навика да ја читаш Јеховината Реч секој ден (Исус Навин 1:8; Псалм 1:2, 3).

• Зошто сметавме дека е потребен нов превод на Библијата?

• Што е добро да правиме секој ден ако сакаме да дознаеме која е Божјата волја?