6. Ќе помогне ли молитвата?

ДАЛИ има некаква полза од молитвите? Библијата покажува дека е така, дека молитвите навистина им помагаат на верните Божји слуги (Лука 22:40; Јаков 5:13). Всушност, молитвата може многу да ни помогне — во духовен, емоционален, па дури и во физички поглед. Како?

Па, да речеме дека имаш дете што добило подарок. Дали ќе го научиш дека е доволно само да чувствува благодарност? Или ќе го поучиш и да покажува благодарност? Кога длабоките чувства ќе ги преточиме во зборови, тие добиваат поголемо значење и стануваат посилни. Дали истото важи и кога зборуваме со Бог? Секако! Да спомнеме неколку примери.

Молитви на благодарност. Кога му се заблагодаруваме на нашиот Татко за убавите работи што ни се случуваат, вниманието ни е свртено кон нашите благослови. Како резултат на тоа, се чувствуваме поблагодарни, посреќни и попозитивни (Филипјаните 4:6).

Пример: Исус покажал благодарност за начинот на кој неговиот Татко ги чул и одговорил на неговите молитви (Јован 11:41).

Молитви за простување. Кога го молиме Бог да ни прости, ја изоструваме нашата совест, му покажуваме колку многу се каеме и стануваме посвесни за сериозноста на гревот. Исто така, наоѓаме олеснување од чувството на вина.

Пример: Давид во молитва го искажал своето каење и својот јад (Псалм 51).

Молитви за водство и мудрост. Кога го молиме Јехова да нѐ води или да ни ја даде мудроста што ни е потребна за да донесуваме добри одлуки, тоа ни помага да бидеме навистина понизни. Ваквите молитви може да нѐ потсетат на нашите ограничувања и да ни помогнат да си ја зајакнеме довербата во нашиот небесен Татко (Изреки 3:5, 6).

Пример: Соломон понизно барал водство и мудрост за да може да владее со Израел (1. Царевите 3:5-12).

Молитви кога ни е тешко. Ако му го излееме срцето на Бог кога сме вознемирени, ќе почувствуваме големо олеснување и ќе се потпреме на Јехова наместо на себе (Псалм 62:8).

Пример: Цар Аса се молел кога пред себе имал еден посилен непријател (2. Летописи 14:11).

Молитви за доброто на другите. Таквите молитви ни помагаат да се бориме против себичноста, да ги разбереме другите и да бидеме посочувствителни.

Пример: Исус се молел за своите следбеници (Јован 17:9-17).

Молитви на фалба. Кога го фалиме Јехова за неговите прекрасни дела и особини, се зголемува нашата почит и ценење кон него. Освен тоа, таквите молитви можат да ни помогнат да станеме поблиски со нашиот Бог и Татко.

Пример: Давид искрено го фалел Бог за сѐ што создал (Псалм 8).

Друг благослов поврзан со молитвата е „мирот Божји, кој ја надминува секоја мисла“ (Филипјаните 4:7). Да се биде спокоен во овој немирен свет е навистина редок благослов. Тоа е добро дури и за нашето физичко здравје (Изреки 14:30). Но, дали благословот доаѓа само како резултат на нашите напори? Или е вклучено нешто поважно?

[Истакната мисла на страница 10]

Молитвата може многу да ни помогне — во духовен, емоционален, па дури и во физички поглед