„Го најдовме Месијата!“

Околу седум века откако било запишано, пророштвото на Михеј во врска со Месијата се исполнило: во Витлеем се родил Исус. Триесетина години подоцна, во 29 год. од н.е., се исполнил првиот дел од пророштвото за доаѓањето на Месијата што го запишал Даниел. Тогаш Исус се крстил и Бог го помазал со свет дух. Долгоочекуваниот Месија, односно ветеното „потомство“, се појавил точно во определеното време!

Исус веднаш почнал да ја врши својата служба и да ја објавува „добрата вест за Божјето царство“ (Лука 8:1). Како што било проречено, Исус бил добар, нежен и искрено заинтересиран за другите. Со љубов ги поучувал луѓето, им давал корисни совети и ги лекувал од „секаква болест“ (Матеј 4:23). Луѓе од сите возрасти дошле до истиот заклучок како еден од неговите ученици, кој рекол: „Го најдовме Месијата!“ (Јован 1:41).

Исус прорекол дека, токму пред неговото Царство да почне да владее со целата Земја, во светот ќе има војни, земјотреси и многу други неволји. Тој нѐ поттикнал будно да ги следиме настаните и да бидеме свесни за нивното значење (Марко 13:37).

Исус бил совршен човек кој му останал послушен на Бог, но неговите непријатели го убиле. Сепак, со неговата смрт било овозможено еден ден луѓето повторно да го имаат она што Адам и Ева го изгубиле — вечен живот во рај.

Тоа што Исус умрел и тоа што Бог го воскреснал како моќно духовно суштество три дена подоцна, било исполнување на пророштвата. Откако воскреснал, Исус им се појавил на повеќе од 500 ученици. Пред да се врати на небото, тој им рекол на своите следбеници да им ја пренесуваат добрата вест за него и за неговото Царство на „луѓето од сите народи“ (Матеј 28:19). Колку добро ја извршиле таа задача?

На темел на Матеј, Марко, Лука, Јован и 1. Коринќаните.