Kingdom News No. 37

Si Fa’aroṉoa I Fana Fanua Nei Iano

E Kwai Karaṉi Na’a Uria Foa’a Garo Ki Kai Sui!

▪ Ta naṉa foa’a garo?

▪ Susuilana kai ufita?

▪ Si maṉa na nia kai sui, oe oki si tatha?

Ta naṉa foa’a garo?

Manatamu e kulua sula ta’ala ne tatae i nunufana foa’a ki? Ṉa omea, ma tofathauwanea ki, bia olodola la na toa na kera sorea kera foa ana tha God kera ilidaki, e labatania manatale’e do kokoto oe? Uria ta na riki lana ka uria, ta’a la oro ne’e ki, ṉa foa’a ki na kera takwe i buriana? E ai kusi alua fafia foa’a ki sui bo’o. Ṉa foa’a garo ki na kera ilia sido eki. Tha Jesus Christ wane ni foa, na imole ki kera farebaita ani nia, e fatania foa’a ne garo raa na kera ilidaki e ta’a, ’uria lau bo’o “ai ne oela kai fuṉu ana fuṉi’i do ta’a.” (Matt 7: 15-17) Ta ni bo’o na foana foa’a ne garo?

Ṉa Foa’a Ne Garo . . .

◼ E THATHAMI SOREDO LAU BO’O I LA OMEA BIA GAVMAN: Buka na kera alaṉia ana Asiaweek e sorea: “I la fanua i Asia bia tai fanua lau bo’o, ṉa toa na kera thaofa ura kwaitalai la, kera aruto’ona fa’amamane la imole ki, ura toda lana thathami la kera ki itala’ada.” Adelana bo’o na buka eri ka ṉata fifi una eri: “Fanua nei iano e kwai karafi ura kai thuthu ila ta’ala.” Te’e wane gwauṉai ila te’e siosi i America, e sore una eri: “Muka thaute’efau bona’a ana toa na keki tofathauwane fasia thauwanea ka sui.” Manatana sulia si kula eri e ufita neri? “Thau te’efau ani kera ana thatana tha Lord.” Si do eki sui bo’o e e’eta bona’a fasia sido ṉa Bible e to’oa. Bible e una eri: “Mada sa ta wane ka sorea, ‘Nau ku liothau atha God,’ ma ka rikia do’orana ka ta’a, wane eri kai lole.” (1 John 4:20)a Jesus e sore una eri lau bo’o: “Muka liothau ana ma’alimae kamulua ki.” (Matthew 5:44) Fita foa’a na o thaito’omana, ṉa toa nia ki kera lae i la firua?

◼ E TO’OA ṈA TO’ODOA NA E GARO: Ṉa foa’a oro ki kera to’oa ṉa anoedo, nia naṉa soul. Doanita wane ka nofi mena ana, ṉa anoedo (soul) eri ka maruki bana. Foa’a oro ki keka aruto’ona ṉa to’odoa eri ura kwaali lana imole ki uria foa la uria anona wane kera ne nofi. Ma Bible ka to’odo e’eta bona’a una eri: “Ṉa soul ne abulata’a—nia kai nofi.” (Ezekie 18:4 NW) “Ṉa imole na kera maruki, kera thaito’omana kera keki nofi; ma imole na kera nofi sui na’a, e ai kesi thaito’omana bona’a tasi do.” (Ecclesiastes 9:5 NW) Tha Jesus e to’oa, toa na kera mae keki maruki lau. Masa anoedo e ai si mae, do na tha Jesus e to’oa e ai si mamana. (John 11:11-25) Ṉa foa’a oe, e to’oa na anona wane e ai si nofi?

◼ E TAKOFAEKWA ANA TOFA OE LA: Tei siosi ki i la fanua baita ki mai, keka alabatania wane na kai oe lau bana ura wane, bia kini na kai oe lau bana ura kini, uria kai kwaitalai i la siosi. Keka su’uṉwania gavman uria kai alafafia kwai’i luma’a imole eki. Doanita siosi na keka thaito’omana bada biraṉa eri e garo, keka takofaekwa bada ana wane ni kwaitalai kera na e oe ura kaala wela ki. Ma ta na Bible e to’oa? Nia e ṉata lala’a ubo’o una eri: ‘Musi tala lole kamalua’a i tala’amalua: toa na kera tona oe, mado toa na kera foa ana god e’eta ki, mado toa na kera oe fafia kwaida, mado wane ki na kera uria kini keka fa’aalamai kera i fana wane, mado wane ki na kera oe lau bada uri kera i tala’ada . . . e ai dodoloa keki fulato’ona tooa tha God.’ (1 Corinthians 6:9, 10) Osi thaito’omana bo’o tei foa’a na kera takofaekwa bada ana tofa o’e la?

Si ta ni bo’o na kai fulato’ona foa’a ne fuṉu ana fuṉi’i do ne ta’a? Tha Jesus e ṉata fifi una eri: “Ai ni sui bana ne ai si fuṉu ana fuṉi’i do ne lea keka kasia, ma keka u ania i la era.” (Matthew 7:19) E mamana asia na’a, ṉa foa’a ne garo keki kasia, ma keki fa’adaṉa te’efaua bona’a ania! Ma keki fa’adaṉa ufita ania, bia asi maṉa ta na kai daṉa? Si do na profeta e fatania i la Baebol buka ana Revelation, chapter 17 bia 18, e lu’ua si soeto’ona la eki.

Susuilana foa’a ne garo kai ufita?

Manata fasi sulia. Te’e sesela e ono i suila te’e do maruki kwasi. Ṉa do kwasi eri e kwaifamaui, e to ana fiu gui do bia tafulu susuke’e do. (Revelation 17:1-4) To’olaṉai lana sesela eri ni tei neri? Nia e gafoa ‘kiṉa ki i fanua nei iano’ ura keki adela suli nia. Nia ka afisia maku momothela’a ki, ka gwai asi gwai makwa lea ki, maka inoto asia na’a. Nia ka aruto’ona lau bo’o sukwaia spirit ta’a ki, ura ‘tole garo la ana toa ana fanua ki sui.’ (Revelation 17:18; 18:12, 13, 23) Ṉa Bible e adomi kulu kuka rikia sesela eri nia ṉa foa’a ki i fanua nei iano. Te’e kwai’i foa’a e ai neri. To’olaṉai lana sesela eri, nia naṉa foa’a ki na kera fuṉu ana fuṉi’i do ne ta’a ki.

To’olaṉai lana do kwasi eri na sesela eri e ono i suila, nia naṉa gavman ki ana fanua nei iano. (Revelation 17:10-13) Ṉa foa’a garo eri ne ono i suila gavman nai, e isikalia gavman uria kai ro’osuli nia asi maṉa na gavman kai abula bia kai soredo.

Doanita ka una eri mena, te’e si maṉa ne kwaifamaui e kwaikaraṉi uria kai fula mai. “Ma tafulu susuke’e do ba ki no rikia na ba, ma do maruki eri ne kwasi, keki rikia sesele eri ka ta’a, ma keki adea kai mutaia ani nia ma kai talu, ma keki ania seena, ma keki na’area teefau ania i la era.” (Revelation 17:16) I la si maṉa faekwa asia ni bo’o, ṉa gavman kai abula uria foa’a garo maka fa’adaṉa te’efau bona’a ani nia. Ṉa ta ni bo’o na kai boraea si abula la eri? Revelation, buka na e ni i la Bible e lu’u una eri: ‘Tha God e alua si lio eri i la ruru’una gavman ki, keka ilia si do manatana tha God e thathamia.’ (Revelation 17:17) Mamana asia na’a, tha God e gulea foa’a garo fafia ṉa do ta’a ne ilidaki ana thatana. Tha God kai aruto’ona ṉa gavman ki–toa kwaimani foa’a garo ki, ura ili lana si do eri fasia ka farana kokoto la nia.

Si ta ni bo’o na oki ilia mada sa o lalakwa fulato’ona kwakwaea ne naofia foa’a garo ki? Angel tha God e ṉata fifi una eri: “Toa nau ae, muki thaka mai fasia.” (Revelation 18:4 NW) Mamana asia na’a, si maṉa ni bona’a i femu na i taraena, uria thakala fasia foa’a garo ki! Ma i fei na oki thaka uria? Tona ono la fasia foa’a ki mena ka ai lau bo’o, sulia e ai ta manata to’oṉadoa ania. (2 Thessalonians 1:6-9) Talito’ona kula ni agwa ni bona’a, na foa’a ne mamana. Ni fania adelana fasia oko riki thaito’omana foa’a ne mamana?

Ma’alutai lana foa’a ne mamana

Fuṉi’i do lea ufita na foa’a ne mamana kai fuṉu ania?—Matthew 7:17.

Ṉa Foa’a Ne Mamana . . .

◼ E FATANIA LIOTHAUA: Toa na kera to i la foa’a ne mamana, kera “e’eta fasia fanua nei iano,” i fei na kera lae mai fasia bia biraṉada e ai si ukali kera, ma keka ‘liothau kwailiu ani kera.’ (John 13:35; 17:16 NW; Acts 10:34, 35) E ai kesi thauṉi kera kwailiu. Ma mada saka afetai bona’a, kera kwaialami ura fale lana maṉoda uri kera kwailiu.—1 John 3:16.

◼ E MANATA FIFI ANA BAELANA THA GOD: Ṉa foa’a mamana e gwauṉania to’odo lana fasia baelana tha God, na ṉa Bible. Ma nia e ai si to’oa “bibiranga” bia ‘si ṉata fifi imole ura kwaifamanatai la.’ (Matthew 15:6-9) ) Uria ta neri? Sula’ania “kekeda la abu eki sui bo’o tha God e alua maṉona iei, ma ka lea uria kwaifamanataia, uria fa’ase’enoni la, uria fa’ao’olola, uria to’olana si do kokoto ki.”—2 Timothy 3:16.

◼ E FA’A SUKWAIA TOAA KI BIA KA MANATA BAITA ANA BIRAṈA KOKOTO KI: Ṉa foa’a mamana e kwaifa’amanatai i sana toa ila wane ki uria keki “liothau ana kwaida alafana ana se’eda i tala’ada,” ka adomia kini ki uria keki to ania si biraṉa ana ‘faarebaita la ana kwaida’ bia ka to’oa isana kaala wela ki ura ‘keki adesulia ṉata lana maka kera ki ma thainada ki.’ (Ephesians 5:28, 33; 6:1) Toa gwauṉai ni kwaitalai nia ki lau bo’o keki fatania si biraṉa ne kokoto.—1 Timothy 3:1-10.

Ta foa’a e fatania si biraṉa eki? Ṉa buka na kera alaṉia ana Holocaust Politics na kera thauṉania i la 2001, e sore una eri: “Mada sa imole oro ki kera ilia si do na Jehovah’s Witness kera u’unutania bia keka abula sulia, mole’e imole sa keka mae i lasi maṉa tha Hitler e ai, bia kwai’i thau wane la na keki thau te’efau ana te’e kule’e wane ki, saka labatania fanua nei iano e ai.”

I la 235 au’ua ki, Jehovah’s Witness ki e ai kesi u’unu bada sulia biraṉa kokoto na e ni la Bible—kera abula lau bo’o sulia. Fula i sana Jehovah’s Witness ki oko soeto’oda uria keki adomi oe ura to’olana si ta na tha God e thathamia fasi oe fasia nia ka alafafia foa’a la oe. Si maṉa uria oki abula bona’a na i taraena. Osi tauṉia lau. E kwai karaṉi na’a uria foa’a garo ki kai sui!—Zephaniah 2:2, 3.

Mada sa oko thathami thaito’omana lau u’unua na e ila Bible na Jehovah’s Witness kera u’unutaia, aruto’ona adaresi fuu ki oko kekeda i sada.

□ Falea mai akua ta buka ana buka ne’e—Gohed for Luk Aot!

□ Nau ku thathami thaito’omana to’odoa nai la Bible ne ai kesi kwalia wane fafia.

[Footnote]

[Blurb on page 3]

Foa’a garo e gafoa ‘kiṉa ki i fanua nei iano’ ura adela suli nia

[Blurb on page 3]

“Toa nau ae, muki thaka mai fasia.”