LESINA 8

Uria Taa Na Mika ʼAfi Leʼa Ura i La Ofu La Kamiliʼa Ki?

Maka bia wela nia kero thaʹosi keroa fasi keko lae ana ofu la — Iceland

Thaina bia thari nia kero thaʹosi keroa fasi keko lae ana ofu la — Mexico

Jehovah’s Witness Ki i Guinea-Bissau kera afi leʹa ura lae la ana ofu la — Guinea-Bissau

Teʼe bareʼe wela i Philippines kera lae ana ofu la — Philippines

Si maṉa na o rikia pikisa eki i la buka naʼi, e ʼufita, o rikia Jehovah’s Witness Ki kera ʼafi leʼa ura i la ofu la kera ki? Uria taa na mika manatabaita ura thaʼosi lamaliʼa la bia ʼafi leʼa la?

E fatania farebaita la i fana God kamiliʼa. E mamana, tha God e lio ura ruruʼido maka aʼi si lio gwauṉaʼi ura bali ana seʼedo. (1 Samuel 16:7) Mena ana, asi maṉa na miki ofu ura faʼabaita la ana tha God, mili thathamia asia naʼa fasia ruruʼumaliʼa ura farebaita la ani nia bia waidoʼorana na mili foʼa ofu. Masa kuki takwe i naʼo fana ta Kiṉi, kulu thathamia ura kuki fatania farebaita la ana bali ana ʼafi la sulaʼania gwauṉaʼia eri ne too ania. ʼUria laʼu boʼo, ʼafi la ura i la ofu la kamiliʼa ki kai fatania farebaita la i fana “Kiṉi eri ne tooladoa,” tha Jehovah God, bia si kula eri na miki foʼa iei.—1 Timothy 1:17.

E fatania mili abula sulia taa na ṉa Baebol e soreʼa. Baebol e faʼaroṉo ana Kristin ki uria keki ʼafisia si maku ne “marabibi bia keki too ana manateʼedo ni seʼenonia.” (1 Timothy 2:9, 10) ʼAfi la ne “marabibi” e toʼolaṉania si maku na kuki ʼafisia e aʼi si fafakaʼo kulu, e adea imole ki kesi manata garo, mado e aʼi si fatania seʼena imole. “Manateʼedo ni seʼenonia” e adomi kulu ura fili lana si maku ne fatania farebaita la ma ka aʼi si faʼaseʼesula. Kwaifamanataia eki e adomi kulu asi maṉa na kuki filia si maku eʼeta kwailiu ki. Asi maṉa na kulu thaʼosi leʼa ani kulu bia kuka ʼafi leʼa, si do eri e adea “imole ki ura keki manatabaita ana toʼodo lana God eri ne faʼamaruki kulu” bia keki ‘fareʼinoto ani nia.’ (Titus 2:10; 1 Peter 2:12) Asi maṉa na mili ʼafi leʼa ura i la ofu la kamiliʼa ki, si do eri e adomia imole ki ura too la ana manateʼedo ne kokoto sulia faʼabaita la ana tha Jehovah.

Osi alabatania maku ni bana ura kai suʼusi oe fasia fula la ana ofu la kamiliʼa ki i la Kingdom Hall. ʼAfisia bamuʼa tesi maku ne talaʼana maka faalu.

Uria taa na ka gwauṉaʼi ura kuki ʼafi leʼa asi maṉa na kuki faʼabaitaa tha God?
Kwaifamanataia ʼufita ki boʼo na kai adomi kulu asi maṉa na kuki thaʼosi kulu bia kuki ʼafisia tesi maku?