LESINA 17

Circuit Overseer Ki Kera Adomi ʼUfita Ani Kamiliʼa?

Circuit overseer bia kukaʹe nia — Malawi

Circuit overseer e lio sulia ofu la ura pirisi la — Ofu la ura pirisiṉi

Circuit overseer e ilia raa ura pirisi la — Pirisiṉi

Circuit overseer e ofu bia toʼa nanaʼo ki i la figuteʼe Kristin — Ofu la toʼa nanaʼo ki

Si maṉa oro, Greek Skrifsa ki e uʼunu sulia tha Barnabas bia tha aposol Paul. Wane eki kera raa mala circuit overseer ki ura fulatoʼona lana figuteʼe Kristin baaki i naʼo. Uria taa na keka ilia si do eri? Sulaʼania kera manata baita ana toolana bare waidoʼorana ki na kera too ana teʼe faʼamamane la. Tha aposol Paul e soreʼa, ni nia e thathamiʼi “oli ura fulatoʼona lana waidoʼorana ki” bia kai rikia toolada. Nia ka kwaialami ura lae la sulia talaṉeʼe kilomita oro ura faʼasukwai lana doʼora eki. (Acts 15:36) I taraʼena circuit overseer ki mena kera abula una eri laʼu boʼo.

Kera lae mai ura faʼasukwai lamaliʼa la. Teʼe circuit overseer kai lae ura fulatoʼona lana figuteʼe Kristin ki. Ni nia kai raa bia figuteʼe Kristin eki roo si maṉa i la teʼefa ṉali. Nia kai raa bia teʼe figuteʼe Kristin sulia teʼe uiki. Kamiliʼa miki fulatoʼona kwaiadomia baita fasia doʼora eki bia kwaida masa keka foli kini. Kera ili uria keki thaitoʼomamaliʼa sui bana. Keka thathamia asia naʼa ura raa la bi kamiliʼa ura ṉata la sulia si faʼaroṉoa leʼa bia toʼo lana Baebol i sana imole ki. Keka lae bia toʼa nanaʼo ki ura thai la sulia sifsif tha God ki, bia keka falea ṉataa ki i la figuteʼe Kristin bia asi maṉa ana ofu la baita ki na kai faʼasukwai kamiliʼa.—Acts 15:35.

Kera onotoʼomaliʼa sui bana. Keka thathamia asia naʼa ura keki faʼasukwaia figuteʼe Kristin ki ura kwaimani leʼa la bia tha Jehovah. Keka ofu bia toʼa nanaʼo ki ma wane ni raa ki ura uʼunu la kalia raa ki na kera ilia i la figuteʼe Kristin bia fale lana si baʼea ni kwaiadomi la i fada ura ili leʼa la ana raa ki na kera takwefale kera ania. Keka adomia pioneer ki fasia keki sitatha ana ṉata la sulia si faʼaroṉoa leʼa. Keka thathamia ura keki thaitoʼomana leʼa ana imole ki na kera thafali kwairoʼomi bia figuteʼe Kristin ma kwaimania kera bia tha God. Circuit overseer eki sui boʼo kera kwaialami ura raa ofu la bi kamiliʼa ura adomi lamaliʼa la. (2 Corinth 8:23) Fuliṉana sa kuki lae sulia fitoʼoa na kera too ania i fana tha God.—Hebrew 13:7.

Uria taa ni boʼo na circuit overseer ki keka lae ura fulatoʼona lana figuteʼe Kristin ki?
Si taa na oki ilia fasia oko fulatoʼona kwaiadomia fasi kera?