LESINA 16

Ṉa Taa Ni Boʼo Na Raa Kera Wane Ni Raa Ki?

Teʼe wane ana wane ni raa ki e kwaiadomi ura lio la sulia ukali lana buka ki — Myanmar

Teʹe wane ni raa e fale ṉataa — Fale ṉataa

Teʹe wane ni raa e lio sulia ofu la ura pirisi la — Ofu ura pirisi la

Wane ni raa eri e betasulia Kingdom Hall — Betasulia Kingdom Hall

Baebol e uʼunu sulia roo figuteʼe wane ni raa ki na kera too ura thai la sulia raa ki la i la figuteʼe Kristin ki. Roo figuteʼe wane eki na “ṉa toʼa nanaʼo ki [elder] bia ṉa wane ni raa ki [ministerial servant].” (Philippi 1:1) I la tei figuteʼe Kristin ki e too ana tei wane una eki. Raa ʼufita ki boʼo na wane ni raa ki kera ilia ura adomi lamaliʼa la?

Kera adomia toʼa nanaʼo ki. Wane ni raa eki kera kwaimani leʼa bia tha Jehovah. Ni kera wane ni manataṉado la anida bia keka raa taliṉaʼi. Tei wane iada keka biʼi baita ma tei wane keka araʼi naʼa. Kera thai sulia si raa oro gwauṉaʼi ki na kai adomia figuteʼe Kristin bia teisi raa ki laʼu ura beta la sulia Kingdom Hall. Kwaiadomia kera ki e falea si tatha la i fana toʼa nanaʼo eki ura manata gwauṉaʼi la sulia toʼodo la bia thai leʼa la sulia sifsif tha God ki.

Kera ilia si raa gwauṉaʼi ki. Kera takwefalea tei wane ni raa ki ura thathagoni lana imole ki na keki fula mai i la ofu la ki. Tei wane iada keka takwefale kera ura lio la sulia do ni arutoʼona lana ura ṉata la iei, buka ki, si malefo ne lae mai fasia kwaiadomia kera figuteʼe Kristin, bia keka kwaiadomi ura olotoʼona lana tafoloa na bare waidoʼorana i la figuteʼe Kristin keki uʼunu sulia si faʼaroṉoa leʼa iei. Keka kwaiadomi laʼu boʼo ura beta la sulia Kingdom Hall. Mado toʼa nanaʼo ki keki gani kera ura adomi lana waidoʼorana ki na araʼia e fulatoʼoda. Kwaialami la ana ili lana tesi raa bana na kera takwefaleda ania, e adea waidoʼorana ki i la figuteʼe Kristin keka farebaita ani kera.—1 Timothy 3:13.

Kera fatania si biraṉaa leʼa ki. Kera filia wane ni raa eki sulaʼania kera fatania kera kwaimani leʼa bia tha God. Ṉataa ki na kera faledaki i la ofu la kamiliʼa ki e faʼasukwaia fitoʼoa kamiliʼa. Asi maṉa na kera sukwai ura tatha la i naʼo ana ṉata la sulia si faʼaroṉoa leʼa, si do eri ka faʼasukwai kamiliʼa laʼu boʼo. Sulaʼania na kera raa ofu bia toʼa nanaʼo ki, si abula la eri e adomia bare waidoʼorana keka seʼethathala bia keka too ana teʼesi manataleʼedo. (Ephesus 4:16) Lalae ni kera keka farana laʼu boʼo ura keki tataʼe mai ura keki toʼa nanaʼo.

Toʼa ʼufita ki na wane ni raa ki?
I la figuteʼe Kristin, wane ni raa ki kera kwaiadomi leʼa ʼufita iei?