LESINA 23

Raa ʼUfita Ki Boʼo Na Mili Ilia Ura Keda Lana Buka Kamiliʼa Ki?

Teʹe wane i la Writing Department, U.S.A — Writing Department, U.S.A.

Transleita ki i South Korea — South Korea

Teʹe wane i Armenia e raʹu ana buka Jehovah’s Witness Ki kera kedaa — Armenia

Teʹe thari i Burundi e raʹu ana buka Jehovah’s Witness Ki kera kedaa — Burundi

Teʹe kini i Sri Lanka e raʹu ana magasin ki na Jehovah’s Witness Ki kera kedaa — Sri Lanka

Karaṉia 700 ṉata la eʼeta ki na mili kedaa ana buka kamiliʼa ki na mili thauṉaʼi daki. Si abula la eri e adomi kamiliʼa ura faʼaroṉo tatalo la ana “si faʼaroṉoa leʼa” i sana “imole ana fanua ni sui bana, kwalafa ni sui bana, bia kuleʼe toʼa ana ṉata la eʼeta ni sui bana.” (Revelation 14:6) E adeʼufita na mika sitatha fafia ili lana si raa eri ne aʼi si kwaiakori? Sulaʼania toʼa ni keda lana buka kamiliʼa ki kera too i la fanua oro bia ni kera toʼa fasia fanua eʼeta kwailiu ki. Ni kera bia karaṉia 3,300 transleita ki na kera kwaiadomi ura ili lana si raa eri. Ma ni kera teʼefau kera Jehovah’s Witness Ki.

I totolenaʼo kera kedaa uʼunua eki ana English. Figuteʼe Wane Nanaʼo Ana Organization ne liosulia raa eri ura kekeda la. Raa eri e too gwauṉaʼi mai i la Bethel i United States. Si kula eri na keki ʼolosia raa ki i fana toʼa ni kekeda ki na kera raa i la Bethel eri, bia tei toʼa iada na kera raa i la tei branch eʼeta ki. Sulaʼania toʼa eki ni kekeda la kera lae mai fasia fanua eʼeta kwailiu ki, mika too ana si tatha la ura keda lana uʼunua ki ne adomia imole ki ana bibiraṉa eʼeta kwailiu ki, ma ka adea imole ki fasia kokomua oro eʼeta ki keka thathamia buka eki.

Uʼunua ki na kera kedaa kera falea i fana transleita ki. I buriana kera kokotoa bia keka alafafia uʼunua ki na kera kedaa, keka arutoʼona internet ura fale lana uʼunua eki i fana transleita ki kakalia fanua nei iano, fasia keka bulasia ura ṉata lada. Keka raa taliṉaʼi ura talisi lana si baʼea ana ṉata la kera ki ne fula fafia manateʼedo na kera kedaa ana English.—Ecclesiastes 12:10.

Computer ne adomia raa eri ka eliʼeli. E afetaʼi ura computer kai ilia raa toʼa ni kekeda la bia transleita ki. Mena ana, computer program ki na kera arutoʼona ne adomia raa kera ki ka eliʼeli. Jehovah’s Witness Ki kera thauṉania teʼe computer program na kera alaṉia ana Multilanguage Electronic Publishing System (MEPS). Program eri e adea ka kwaiakori ura keki bulasia uʼunua ki ura talaṉeʼe ṉata la oro eʼeta ki bia ofu lana si baʼea ki bia pikisa ki fasia ka kwaimaʼakwali ura printim lana.

Uria taa ni boʼo na mika raa fifii ana si raa eri, doʼanita tei ṉata la ki aṉeʼe toʼoni imole ki bana na kera ṉata ania? Sulaʼania tha Jehovah e thathamia “imole ni sui bana keki fulatoʼona marukia ma keki todaa thaitoʼomeʼedoa ne kokoto sulia mamana la.”—1 Timothy 2:3, 4.

Raa ʼufita ki na mili ilia ura keda lana buka kamiliʼa ki?
Uria taa na buka kamiliʼa ki mika bulasia ana ṉata la eʼeta oro ki?