LESON 11

Ta na Oki Ilifania Fasia Oko Todaa si Do Le’a Fasia Baebol

Lo Printed Buk

Manto’ona fesi, masa oko thathamia oki ilifania te’e si raa na baita, sui oko kwaimangosi ura ilifa’i lana la. Si ta na oki ilifania? Fasia ka kwai’akura e le’a uria oki ukalia ana kalasi raa ki. Te’emai lana Baebol e una’eri la’u bo’o. Mada oko to ana soeto’ona la, ‘fei na kwei thafali te’emai iei?’ La leson ne’e, kuki u’unu sulia tei si do na oki ilifania fasia ka adomi oe oko se’ethathala ura te’emai la bia studyim lana Baebol.

1. Uria ta ka le’a si manga ki sui kuki te’emania Baebol?

Wane na te’emania Baebol mada “law Jehovah” si manga ki sui bana nia kai se’ethathala bia kai todaa si do le’a. (Te’emania Psalm 1:1-3.) Si manga na o bi’i thafali ura te’emai lana Baebol, nia e le’a uria oki te’emai bamu’a sulia tu mada tri minute la te’efa thato. Si manga na o ili una’eri oe oki se’ethathala ura te’emai lana Baebol.

2. Fasia oko todaa si do le’a si manga na o te’emania Baebol, si ta na oki ilifania?

Fasia oko todaa si do le’a si manga na o te’emania Baebol, nia e le’a si manga na o te’emania te’e verse sui oko “manta kalia.” (Joshua 1:8, footnote) Bia la’u bo’o si manga na o te’emai, e le’a uria oki manta kalia soeto’ona la ne’e ki: ‘Ta na verse eri e to’oa saku’a sula’ania Jehovah? Si do eri adomi ufita bo’o an nau? Kwai aruto’ona ufita bo’o ana verse eri ura adomi lana ta ruana imole?’

3. Si manga ta na o manto’ona e le’a ura oki te’emania Baebol?

Imole oro a’i kesi to ana si manga uria keki te’emania Baebol. Do na adea ka le’a uria “kuki aruto’ona le’a ana si manga kulu.” (Ephesians 5:16) Fasia oko aruto’ona le’a ana si manga oe, nia e le’a uria oki olto’ona te’e si manga la fa thato ura oki te’emania Baebol. Uria tei imole kera olto’ona u’usuwedi ura keki te’emania Baebol. Tei imole kera olto’ona afathato ura te’emai lana Baebol. Tei imole keka olto’ona tha’ulefi uria keki te’emania Baebol. Mani oe si manga ta na e le’a uria oki te’emania Baebol?

TO’OA LA’U TEI SI DO

Oki to’oa la’u tei si do na oki ilifania fasia oko se’ethathala ura te’emai lana Baebol. Bia oki to’oa la’u bo’o oki kwaima’akwali ufita fasia oko todaa si do le’a si manga na o studyim Baebol.

Collage: Te’e wela e ili uria kai ania te’e fanga na a’i si anito’ona ubo’o tesi manga. 1. Totolo na’o nia a’i si ania bo’o fanga eri. 2. Ruana si manga nia ka anito’ona na fanga eri. 3. Buira nia ka se’ethathala na ura kai ania fanga eri. — Si manga na o anito’ona te’e fanga na osi anito’ona ubo’o tesi manga, totolo na’o osi thathamia, sui si manga na o ania si manga ki sui bana lalae oko thathami ania la’u bamu’a, te’emai lana Baebol e una’eri la’u bo’o

4. Si do na oki ilifania fasia oko se’ethathala ura te’emai lana Baebol

Si manga na kulu bi’i te’emania Baebol nia a’i si kwai’akura. Uria la’u bo’o si manga na kulu bi’i anito’ona te’e fanga. Te’emania 1 Peter 2:2, sui u’unu kalia soeto’ona la:

Ana mantaa oe, si manga na o te’emania Baebol ana fa bongi ki sui bana, ufita oe oki se’ethathala ura te’emai lana?

Fatania VIDEO fasia oko rikia si do na tei imole kera ilifania, fasia keka se’ethathala ura te’emai lana Baebol. Sui u’unu kalia soeto’ona la ki.

VIDEO: Si do na Wela Bi’i Baita kera Ilifania ura Te’emai lana Baebol (5:33)

Uria na kulu rikia la video eri, ta na adea ka afeta’i uria wela bi’i baita eki keki te’emania Baebol?
Ta na kera ilifania fasia keka te’emania Baebol?
Ta na kera ilifania fasia keka se’ethathala uria te’emai lana Baebol?

Tei idea na kai adomi oe si manga na o thafali ura te’emai lana Baebol:

Filia languis na o thaito’omana oki te’emai ania. Te’emania Niu World Transleison na to ana languis na o thaito’omana te’emai la ania.
Thafali te’emai ana Baebol buka na o thathamia. Rikia chart “Thafali Ura Te’emai lana Baebol.”
Kedaa si kula na o te’emania sui na’a. Aruto’ona chart “Tickim Chapter na O Te’emania Sui Na’a.”
Aruto’ona JW Library^® app. La jw library thaito’omana oko te’emania bia oko rongoa audio ana Baebol.
Aruto’ona appendix na to la Niu World Transleison. La appendix eri e to ana map, chart, bia glossary na kai adomi oe fasia oko thaito’omana si do na o te’emai sulia.

5. Ta na oko ilifania si manga na o kwaima’akwali ma’asia study

Te’emania Psalm 119:34, sui u’unu kalia soeto’ona la:

Uria ta ka le’a ura oki fo’a sui fete’i oko te’emania Baebol mada oko kwaima’akwali ma’asia study?

Fasia oko todaa si do le’a fasia studyim lana Baebol, si manga o kwaima’akwali ana te’e leson, lae sulia idea ne’e ki:

Te’emania paragraf totolo na’o ki ana leson.
Te’emania scripture sui oko bobola ngania bia si do na paragraf e u’unu sulia.
Te’emania soeto’ona la sui oko lio ura lu’u la nia la paragraf sui oko andalaenim, si do eri kai adomi oe si manga na o u’unu ofu bia imole na to’odo bi oe.

Collage: Te’e kini e kwaima’akwali ma’asia study la. A. Nia e te’emania page totolo na’o ana leson. B. Nia e te’emania scripture fasia Baebol. C. Nia andalaenim lu’u la ana soeto’ona la.

Ufita oe o thathami thaito’omana?

Jehovah’s Witness kera to ana Baebol transleison e’eta ki. Sui mena ana, Baebol na mili aruto’ona nia na Niu World Transleison blo olketa Holi Scripture sulia nia e kokota, ka kwai’akura ura ma’aluta’i lana, bia ka to ana thatana God.—Te’emania article ne’e la jw.org “Waswe, Bible Bilong Olketa Jehovah’s Witness Hem Difren?”

SI BA’EA TEI IMOLE KEKI SOREA: “Studyim lana Baebol e afeta’i asia na’a, bia a’i kwesi to ubo’o ana tesi manga uria studyim lana.”

Ta na mantaa oe?

SI DO NA KULU TO’OA

Fasia oko todaa si do le’a fasia te’emai lana Baebol, olto’ona si manga ura te’emai la, fo’a sui fete’i oko te’emai, bia oko kwaima’akwali ma’asia study la.