Lesina 13

Ufita Fasia Oko Rikia To’odoa Ne Mamana?

To’odoa ki sui bo’o tha God e se’ethathala sulia, mada te’edo bo’o? (1)

Uria ta to’odoa oro asia na’a keka alan̄i kera ana Kristian? (2)

Ade ufita fasia oko riki thaito’omana Kristian mamana? (3-7)

1. Tha Jesus e thafalia te’e Kristian to’odoa mamana. Aia i taraena fulin̄ana sa kai te’e kule’e wane, mada te’e figua, na kera fa’abaita tha God Jehova ana mamana la. (John 4:23,24; Ephesians 4:4,5) N̄a Baebol ka to’oa an̄e’e imole bo’o na kera ni ila tala ne sisikofi uria marukia.—Matthew 7:13,14.

2. N̄a Baebol ka fa’aron̄o ania ibuira n̄a mae lana aposela ki, to’odoa ne garo bia biran̄a ne ai sitala ana Kristian kai thafe’e kotho mai i ma’alutana Kristian mamana. Wane eki keka tolea toa na kera fa’amamane fasia keka lae na’a suli kera fulin̄ana sa tha Kraest. (Matthew 7:15, 21-23; Acts 20:29,30) Adelana kuka rikia to’odoa oro e’eta ki keka sorea kera Kristian. Ade ufita fasia oko riki thaito’omana Kristian mamana ki?

3. Si olotoa lala’a mamana eri ana Kristian na kera to ana liothaua mamana i ma’alutada kwai liu. (John 13:34,35) Kera kesi to’oa uria keki sorea kera lea ka talua tei imole ana tei kule’e wane mada se’edo kai e’eta. E ai kesi to’o lau bo’o uria keki lalakwa tainia imole ki ana ta fanua lau. (Acts 10:34,35) Kera kesi ado ila omea. Kristian mamana ki keki riki kera kai lea mala do’ora ki bia waiwaena ki.—1 John 4:20,21.

4. Tasi olotoa lau ana to’oda ne mamana eri toa nia ki keki to ana manata baita la ana Baebol. Keki alafafia mala Baelana tha God bia keki fa’amamanea si ta ne sorea. (John 17:17; 2 Timothy 3:16,17) Kera to’olan̄ai nia mala Baelana tha God ne gwaun̄ai ka talua manate’edo imole mada kastom. (Matthew 15:1-3, 7-9) Kera ili uria to la sulia Baebol ana marukia kera afa thato ki sui. Aia kera kesi fa’aron̄o bada ana ta tesido sui keka ilia lau bada tesido e’eta.—Titus 1:15,16.

5. N̄a to’odoa ne mamana keki farebaita ana thatana tha God. (Matthew 6:9) Tha Jesus e fa’aron̄o ana thatana tha God, Jehova, isana tei imole ki lau. Kristian mamana kai ili lau bo’o una eri. (John 17:6,26; Romans 10:13,14) Ni tei kera bo’o na imole ki i ma’alutana figua kamalua na kera fa’aron̄o ana thatana tha God isana tei imole ki lau?

6. Kristian mamana keki fa’aron̄o tatalo bona’a ania sula Inotoa tha God. Tha Jesus e ilia lau bo’o. Nia e n̄ata n̄ado lau bo’o sulia Inotoa eri. (Luke 8:1) Nia e fa’aron̄o fifi’i bona ana toa na e toleda uria keki fa’aron̄o tatalo ana si baea nei ila fanua nei iano laulau. (Matthew 24:14; 28:19,20) Kristian mamana ki kera fa’amamanea talito’ona bona’a Inotoa tha God na kai falea enenoa mamana eri bia tolea la ila fanua nei iano.—Psalm 146:3-5.

7. Toa na tha Jesus e toleda kera kesi to bia fanua nei iano ne ta’a. (John 17:16) Kera kesi to ila n̄ata ofua ana fanua nei iano bia olisusu’ua i ma’alutana figua. Kera keki to fasia falea lana se’efia, ili lana do ta’a ki, bia manate’edo ne ni ila fanua nei iano. (James 1:27; 4:4) E ufita fasia oko riki thaito’omana to’odoa ma’alutana figua no to iei kera to ania oloto’oa na Kristian mamana ki?

[Pictures on page 26, 27]

Kristian mamana ki kera liothau ani kera, manata baita ana Baebol, bia fa’aron̄o la sulania Inotoa tha God