Lesina 15

Kwai Adomia Uria Ili Lana Ra Tha God

Uria ta na oki fa’aron̄o ana tei imole ki lau ana ta na o to’o uria? (1)

Ni tei bo’o na oki ukalia si fa’aron̄oa lea ne’e isana? (2)

Abula la oe kai ade ufita ana tei imole ki lau? (2)

Si man̄a ta ni bo’o oki lae fafia si fa’aron̄oa eri bia figua eri? (3)

1. Asi man̄a eri na’a, kera to’oa isamu si do oro lea fasia n̄a Baebol. N̄a lioto’oa ne’e e tole oe uria kwaima’a kwali la uria biran̄a Kristian ki. (Ephesians 4:22-24) N̄a lioto’oa eri e gwaun̄ai asia na’a fasia oko n̄alia marukia tatha. (John 17:3) Sui mena, tei imole ki kera atoia asia na’a ron̄o lana si fa’aron̄oa lea eri fasi keka toda marukia lau bo’o. Kristian mamana ki sui bana keki fa’aron̄o bona ania i sana ni tei bana. Si baea fifi tha God neri.—Romans 10:10; 1 Corinthians 9:16; 1 Timothy 4:16.

2. Ni oe oki thafali ukalia si do lea no to’oa bia ni tei kera no to karan̄ida. Fa’aron̄o ana bare’e wela oe, bia toa kwaimani ki, wela na moro sukulu ofu, bia toa na mulu ra ofu ki. Oki adelea bia oko faekwa asi man̄a oki ilia si do eri. (2 Timothy 2:24,25) Oko manata to’ona imole ki keki lio uria abula lamu ka talua si do na keki ron̄oa fasi oe. Si abula lea la oe eri kai idua lau mai tei imole fasia keka ron̄oa si fa’aron̄oa lea na oki fa’aron̄o ania.—Matthew 5:16; 1 Peter 3:1, 2,16.

3. Ibuira, ni oe mada o tala’ana oki thafali lae fafia si fa’aron̄oa eri bia figua ana Witness Tha Jehova Ki. Sido eri si kula gwaun̄ai asia na’a ila lae la oe neri. (Matthew 24:14) Thalume la baita masa ni oe o adomia tei imole lau uria kai tatae uria wane ni ra ifatha Jehova bia kai toda marukia tatha!—1 Thessalonians 2:19,20.