Si Ta Na Kai Fulato’ona Imole Na Kera Mae?

Maea e e’eta kwailiu fasia marukia. Maea e uria biin̄a liu la. (John 11:11-14) E afetai ura to’a na kera mae keki fafuron̄o, lio, n̄ata, mada keki manata sulia tesi do. (Ecclesiastes 9:5, 10) To’odoa ne garo e to’oa imole na kera mae kera lae uria kula anoedo ki kera to ilana fasi keka to bia to’a nia ki i nao mai na kera mae. Baebol e ai si to’oa si do eri.

Imole na kera mae kesi tala’ana adomi lakalua la, bia ka afetai uria keki thaun̄i kulu. Imole oro ki kera abula sulia kastom kera ki bia afufula na kera fa’amamanea na kei fa’a se’ethathala to’a na kera mae. God e ai si se’ethathala sulia si do eri sulia e man̄o mai fasia lole la natha Satan e ra ania. Maka ai si fa’a se’ethathala lau bo’o to’a na kera mae sulia e ai kesi to ana ta marukia. E ai si tala’ana kuki mau mada kuki fo’a ana to’a mae ki. Kuki fo’a talito’ona bona’a atha God.—Matthew 4:10.

To’a na kera mae keki maruki lau. Jehovah kai fa’atharasia to’a na kera mae ura marukia ila fanua falu fafona fanua nei ano si man̄a eri e ni umai. (John 5:28, 29; Acts 24:15) God kai fa’atharasia to’a na kera mae mala o fa’atharasia ta wane fasia bin̄aa.—Mark 5:22, 23, 41, 42.

Manate’edo ne sorea kusi mae nia lolea fasia Satan tha Devil. Satan bia dimon nia ki kera adea imole ki keka sore ana anona to’a mae ki kera maruki bia keka adea imole keka matai bia tei si afetai la. Satan kai lolea imole ki, teisi man̄a i la mo’osibole la bia ana fafaboa. Jehovah e n̄ata sukwai sulia to’a na keki ili uria n̄ata la bia to’a na kera mae.—Deuteronomy 18:10-12.