Wane Kwaimani Tha God Ki Keki To I La Fanua Falu

Fanua falu e e’eta fasia fanua na kulu to i lana i taraena. God e ai si thathamia fanua nei ano kai fun̄u ana omea, liodila la bia fiila. I lafa thato ne ni umai, God kai thaun̄ania fanua nei ano kai falu. Fanua Falu eri riki lana kai ufita bo’o neri? Alabatania kulu rikia ta na Baebol e sorea:

To’a lea ki. To’a kwaimani tha God keki to i lana Fanua Falu. Keki abula lea uria kera kwailiu. Keki to sulia kokoto la na tha God e thathamia.—Proverbs 2:21.

Fan̄a kai Oro. I la Fanua Falu, e ai na’a ta thaofa. Baebol e sorea: “Fan̄a kai oro i fafona fanua nei ano.”—Psalm 72:16.

Fera lea ki bia ra ni se’ethathala. I la Fanua Falu fafona fanua nei ano, to’a ki sui keki to ana fera kera i tala ada. Imole ki sui keki ilia ra ne fulato’ona se’ethathala.—Isaiah 65:21-23.

Enenoa fafona fanua nei ano. E ai na’a ta firua bia maea ana omea. Baelana tha God e sorea: “[God] e fa’asuia na’a omea.”—Psalm 46:8, 9.

E ai na ta mataia. Baebol e alan̄ania: “E ai ta wane [ana to’a na kera to ila Fanua Falu] kai sorea: ‘Nau ku matai.’” (Isaiah 33:24) Lau bo’o, e ai na ta wane aena si mae na’a mada maana ka rodo mada alin̄ana ka bani mada ka ai si n̄ata.—Isaiah 35:5, 6.

Fiila, liodila, bia maea kai sui. Bae lana tha God e sorea: “Ma n̄a maea kai ei na’a; me ai na’a ta [“liodila,” New World Translation], mado an̄i la, mado se’efia: si do totonao ki kai ei na’a.”—Revelation 21:4.

To’a ta’a ki keki sui na’a. Jehovah e alan̄ania: “To’a ta’a ki . . . keki sui fasia fanua nei ano; bia to’a ni lole la, keki sui na’a.”—Proverbs 2:22.

Imole ki sui keki liothau bia keki farebaita ani kera kwailiu. E ai na’a ta soredoa te’ebali la, afetai la, kakausiteri la, bia lalakwa tai lana imole. Imole ki keki to ofu na’a bia keki abula ofu sulia kokoto la tha God.—Isaiah 26:9.