LESON 09
Fo’a la kai Adomi Oe Fasia Oko Kwaimani Le’a bia God
Ufita tesi manga oe o ato’ia kwai’adomia? Ufita oe o to ana ta soeto’ona la gwaunga’i ki na o thathami todaa lu’u la ania? Ufita tesi manga oe o ato’ia si ba’ea ura fa’ainamaruki la? Ufita oe o thathami kwaimani le’a bia Jehovah? Fo’a la kai adomi oe fasia oko ilifania si do eki. Sui kwa’i fo’a la ufita na kokota? Ufita God e rongoa fo’a la ki sui bana? Ta na oko ilifania fasia God ka rongoa fo’a la oe? Kuki todaa lu’u la ana soeto’ona la eki la leson ne’e.
1. Tei na fulingana kuki fo’a an nia, bia ta na kuki fo’a sulia?
Jesus sorea kuki fo’a ana Maka kulu na to mai i heven. Jesus mena fo’a la’u bo’o ana Jehovah. Nia sorea: “Muka fo’a una’eri: ‘Maka kamali’a na to i heven . . . ’” (Matthew 6:9) Si manga na kulu fo’a ana Jehovah, si do eri kai fa’asukwa’ia kwaimania kulu bi nia.
Kulu thaito’omana kuki fo’a bakalu’a sulia tesi do bana. Sui mena ana, fasia God ka lu’ua fo’a la kulu, fo’a la eri kai lae sulia si do na nia e thathamia. “Tesi do bana na kulu gania ka lae sulia mantana [God] nia kai rongo kulu.” (1 John 5:14) Jesus e fa’arongo kulu ana si do kokota na kuki fo’a uria. (Te’emania Matthew 6:9-13.) Kulu thaito’omana kuki fo’a uria si kwai’ato’ia kulu ki, kuki sorele’a la’u bo’o talea God uria si do na nia e ilia fakalu’a bia kuki gani nia uria kai adomia la’u bo’o ta ruana imole.
2. Ta na kuki ilifania si manga kulu fo’a?
Baebol sorea kuki “u’unu te’efau sulia si do na to la [ruru’ukalu’a] fana [God].” (Psalm 62:8) Si do eri fatania fo’a la kulu kai lae mai fasia ruru’ukalu’a. Fo’a la kulu kai fatania faarabaita la, do anta kuka fo’a baita mada kuka fo’a fa’ekwa. Kulu thaito’omana kuki fo’a ana tesi manga bia tesi kula bana.
3. God e lu’u ufita ana fo’a la kulu?
God e lu’ua fo’a la kulu ana tatha la e’eta ki. Jehovah e falea Baebol fasia kuka todaa lu’u la ana soeto’ona la kulu ki. Te’emai lana Baebol kai “[adomia] wane na a’i si lioto’o uria kai lioto’o.” (Psalm 19:7; te’emania James 1:5.) Nia kai falea enenoa la mantakalu’a si manga na kulu fulato’ona afeta’ia. Bia nia kai aruto’ona la’u bo’o imole nia ki uria keki adomi kulu si manga na kulu ato’ia kwai’adomia.
TO’OA LA’U TEI SI DO
Kuki u’unu sulia, ufita fesi kuka fo’a ana fo’a la na lae mai fasia ruru’ukalu’a fasia God ka se’ethathala sulia, bia fo’a la kai adomi ufita an kulu.
4. Si do na kuki ilifania fasia God ka alafafia fo’a la kulu
Ta na fatania masa God e alafafia fo’a la kulu mada e a’i? Fatania VIDEO.
Jehovah thathamia kuki fo’a an nia. Te’emania Psalm 65:2, sui u’unu kalia soeto’ona la:
Ana mantaa oe, God “Wane ni rongo lana fo’a la” e thathamia oki fo’a an nia? Uria ta na oko manta una’eri?
Fasia God ka rongoa fo’a la kulu, kulu kuki ilifania si do na lae sulia mantana. Te’emania Micah 3:4 bia 1 Peter 3:12, sui u’unu kalia soeto’ona la:
Ta na kuki ilifania fasia Jehovah ka rongoa fo’a la kulu?
Sui fete’i army keka lae ana firua, kera fo’a uria keki sitatha. Ufita God e alafafia kwa’i fo’a la eri?
5. Fo’a la kulu kai lae mai fasia ruru’ukalu’a
Tei imole ki si manga ki sui bana kera aruto’ona bada te’e kwa’i fo’a la. Sui ufita God e thathamia kwa’i fo’a la eri? Te’emania Matthew 6:7, sui u’unu kalia soeto’ona la:
Ta na oki ilifania fasia a’i osi sorea “te’e kwa’i fo’a la si manga ki sui”?
Bongi ki sui bana manta kalia si do le’a na o todaa fasia Jehovah, sui si manga na o fo’a oko sorele’a ana Jehovah uria si do eri. Si manga na o ilifania si do eri, nia kai adomi oe fasia a’i osi sorea te’e kwa’i fo’a la si manga ki sui.
Maka na e liothau ana wela nia e thathamia wela nia kai u’unu te’efau sulia mantana i sana. Jehovah mena thathamia kuki u’unu te’efau sulia mantakalu’a i sana.
6. Fo’a la nia te’e present fasia God
Fo’a la kai adomi ufita ani kulu si manga na kulu fulato’ona afeta’ia? Fatania VIDEO.
Baebol alangania fo’a la kai adomi kulu fasia kuka to ana enenoa la mantakalu’a. Te’emania Philippians 4:6, 7, sui u’unu kalia soeto’ona la ki:
Fo’a la kai adomi ufita bo’o an kulu, do anta a’i si fa’asuia mena afeta’ia kulu?
Ta bo’o tei si do na o thathamia oki fo’a sulia?
Ufita oe o thathami thaito’omana?
Si ba’ea ne’e “amen” e to’olangania “iu” mada “alafafia.” Imole Jehovah la si manga na sui kera aruto’ona si ba’ea ne’e “amen” ana susui lana fo’a la.—1 Chronicles 16:36.
7. Olto’ona si manga ura fo’a la
Tei si manga kulu abero lalae kuka liodora na’a ana fo’a la. Ta na fatania fo’a la e gwaunga’i ana Jesus? Te’emania Matthew 14:23 bia Mark 1:35, sui u’unu kalia soeto’ona la ki:
Ta na Jesus e ilifania fasia ka to ana si manga ura kai fo’a?
Si manga ta na oe o olto’ona ura oki fo’a?
SI BA’EA TEI IMOLE KEKI SOREA: “God e alafafia fo’a la ki sui bana.”
Ta na oki sorea?
SI DO NA KULU TO’OA
Fo’a la na lae mai fasia ruru’ukalu’a, e adomi kulu fasia kuka kwaimani le’a bia God, falea enenoa la mantakalu’a, bia ka fa’asukwa’i kulu ura ilifa’i lana si do na Jehovah e se’ethathala sulia.
Reviu
Tei na fulingana kuki fo’a an nia?
Ta na kuki ilifania si manga na kulu fo’a?
Si ta le’a na kuki fulato’ona fasia fo’a la?
TEI SI DO KI LA’U
Rikia lu’u la an soeto’ona la ki na imole kera to ania sula’ania fo’a la.
“Seven Things You Need to Know About Prayer” (The Watchtower, October 1, 2010)
Te’emai sulia uria ta fo’a la ka le’a, bia ta na kuki ilifania fasia kuka sorea te’e fo’a la na le’a.
Te’emai sulia ta na Baebol e to’oa sula’ania tei na fulingana kuki fo’a an nia.
La music video ne’e, rikia kulu kuki fo’a ana tesi kula bia tesi manga bana.