LESON 33
Ta na Kingdom tha God kai Ilifania
Kingdom tha God e kwaitalai sui na’a i heven. Sui ta na Kingdom eri kai ilifania fafona fanua ne iano? La leson ne’e, kuki to’oa si do le’a ki na Kingdom eri kai ilifania fafona fanua ne iano.
1. Ta na Kingdom tha God kai ilifania fasia enenoa bia kokota la ka to fafona fanua ne iano?
Jesus wane na King la Kingdom tha God, kai fa’asuia imole ki na a’i kesi ilifania si do na Jehovah e se’ethathala sulia bia gavman wane ki, si manga ana omea tha God na Baebol alangia ana Armageddon. (Revelation 16:14, 16) Buira Armageddon alanga’ia ki na Baebol e u’unu sulia kai mamana. Baebol e sorea, “Kasi manga na’a e to, sui imole ki na biirangada e ta’a keki sui.” (Psalm 37:10) Faara kwaitalai lana Kingdom tha God enenoa bia kokota la kai to fafona fanua ne iano.—Te’emania Isaiah 11:4.
2. Si manga na Kingdom tha God kai kwaitalai fafia fanua ne iano, marukia kai ufita?
Faara kwaitalai lana Kingdom tha God “imole na kera kokota keki to fafona fanua ne iano, bia keki to tatha bona’a iei.” (Psalm 37:29) Manto’ona fesi, masa imole kokota ki sui bo’o keka to fafona fanua ne iano, keka liothau ana kera kwailiu, a’i kesi mata’i na’a, bia keka to ana marukia le’a na toto si sui.
3. Ta na Kingdom tha God kai ilifania, buira e fa’asuia imole ki na biirangada e ta’a?
Si manga Jesus e fa’asuia imole ta’a ki sui, nia kai kwaitalai sulia 1,000-fala fa ngali. La si manga eri, Jesus bia 144,000 na kera kwaitalai bi nia, keki adomia imole ki na kera to fafona fanua ne iano fasia keka to la’u ana marukia na e laula’u. Susui lana 1,000-fala fa ngali eri, fanua ne iano laula’u kai tata’e mai te’e paradaes, ma talito’ona imole ki na kera adesulia law Jehovah kera na keki to iei. Sui Jesus ka olitania la’u bana sukwa’ia ura kwaitalai la fana maka nia tha Jehovah. Si manga eri Jehovah kai fa’asuia Satan, demon nia ki, bia imole na kera adefasia. (Revelation 20:7-10) Si do eri kai fatania Jehovah bona’a tala’ana kai kwaitalai sulia nia e manto’ona imole ki. Sula’ania si do eki na Jehovah kai ilifania, “thatana kai abu.” (Matthew 6:9, 10) Marukia le’a na kuki todaa faara kwaitalai lana Kingdom tha God e toto si sui.
TO’OA LA’U TEI SI DO
Kuki to’oa uria ta kuka mantangado ana alanga’ia ki na Baebol e u’unu sulia uria si manga na ni u mai kai mamana, faara kwaitalai lana Kingdom tha God.
4. Kingdom tha God kai fa’asuia gavman wane
Si manga “wane e kwaitalai, imole keka fulato’ona afeta’ia.” (Ecclesiastes 8:9) Sui mena ana, Jehovah kai aruto’ona Kingdom nia uria kai fa’asuia, afeta’ia ki na fuli nunufana kwaitalai lana gavman wane.
Te’emania Daniel 2:44 bia 2 Thessalonians 1:6-8, sui u’unu kalia soeto’ona la ki:
Ta na Jehovah bia Jesus keki ilifania ana gavman wane bia to’a nia ki?
Ta na o to’oa sula’ania Jehovah bia Jesus, na adea oko fa’amamanea kero’a keki ilifania si do sulia kokota la?
5. Jesus nia te’e King na kwaitalai lana e le’a
Jesus wane na e King la Kingdom tha God kai ilifania si do le’a oro fana imole nia ki na kera to fafona fanua ne iano. Fatania VIDEO fasia oko rikia si do na Jesus e ilifania si manga nia e to fafona fanua ne iano, e fatania God e falea sukwa’ia fana uria kai adomia imole ki na nia kai kwaitalai fafi kera.
Si do na Jesus e ilifania ki si manga nia e to fafona fanua ne iano, e fatania si do na nia kai ilifania la si manga na ni u mai. Blessing ta na oe o thathamia asia na’a uria oki todaa? Te’emania scripture ki na e u’unu sulia blessing eki.
SI MANGA JESUS E TO FAFONA FANUA NE IANO, NIA E . . . |
SI MANGA JESUS KAI KWAITALAI FAFIA FANUA NE IANO, NIA KAI . . . |
|---|---|
|
|
|
|
|
|
|
|
6. Kingdom tha God kai falea marukia le’a fana imole ki
Jehovah kai aruto’ona Kingdom nia fasia ka fa’amamanea ana mante’edo na nia e to ania fana imole ki, nia na keki to ana marukia le’a na toto si sui. Fatania VIDEO fasia oko rikia Jehovah e aruto’ona ufita ana Jesus fasia ka fa’amamanea ana mante’edo na nia e to ania fana imole ki.
Te’emania Psalm 145:16, sui u’unu kalia soeto’ona la:
Si manga na o thaito’omana Jehovah kai “falea fana si do maruki ki sui bo’o, si do na kera thathamia,” to’omatafana la oe ka ufita?
SI BA’EA TEI IMOLE KEKI SOREA: “Masa kuka raa ofu bakalu’a, do kuki kokotaa bakalu’a afeta’ia ki na fuli.”
Afeta’ia ta na gavman wane a’i si tala’ana kai kokotaa, na Kingdom tha God bona’a na tala’ana kai kokotaa?
SI DO NA KULU TO’OA
Kingdom tha God kai fa’asuia afeta’ia ki na fuli fafona fanua ne iano. Sui fanua ne iano laula’u kai tata’e mai te’e paradaes, ma talito’ona imole ki na kera adesulia law Jehovah kera na keki to iei, bia keki to ana marukia le’a na toto si sui.
Reviu
Ta na Kingdom tha God kai ilifania fasia thatana Jehovah ka abu?
Uria ta kuka fa’amamanea alanga’ia ki na Baebol e u’unu sulia kai mamana faara kwaitalai lana Kingdom tha God?
Ta na o lio ma’akwali uria oki todaa si manga Kingdom tha God kai kwaitalai fafia fanua ne iano?
TEI SI DO KI LA’U
Te’emai sulia ta na Armageddon e to’olangania.
Te’emai sulia si do na kai fuli la si manga na Baebol e alangia ana “afeta’ia baita.”—Matthew 24:21.
Rikia si do na famili ki keki ilifania, si manga na kera manta sulia marukia la paradaes.
Te’emai sulia te’e wane na e lalakwa tania gavman, e todaa lu’u la fana soeto’ona la nia ki.