Египетээс гарсан нь

11 Тэгэхэд Ехова Мосед «Би фараон болон Египет дээр дахин нэг гамшиг буулгана. Дараа нь тэр та нарыг эндээс явуулна. Явуулах явуулахдаа бүрмөсөн хөөнө. 2 Одоо ард түмэнд “Эрэгтэйчүүд, эмэгтэйчүүд бүгдээрээ хөршөөсөө алт мөнгөн эдлэл гуй” гэж хэлэгтүн» хэмээн айлдав. 3 (Ехова египетчүүдийн зүрх сэтгэлийг зөөллөснөөр тэд ард түмэнд нь сайн хандав. Мосе бас Египетэд фараоны албат зарц нар, ард түмний дунд маш их нэр хүндтэй болов).

4 Тэгээд Мосе фараонд «Ехова ингэж айлдаж байна. “Би шөнө дундын алдад египетчүүдийн дундуур явна. 5 Египетийн ууганууд бүгдээрээ үхнэ. Сэнтийдээ заларч буй фараоны ууган хүүгээс авхуулаад тариа тээрэмдэж байгаа шивэгчний ууган хүү хүртэл үхнэ. Бас мал сүргийн ууган төл бүгд үхнэ. 6 Египет даяар өмнө нь хэзээ ч болж байгаагүй, дахин хэзээ ч болохгүй асар их уйлаан майлаан болно. 7 Харин израйлчуудын хүн мал руу нохой ч хуцахгүй. Тэгээд та нар Еховаг египетчүүд израйлчуудын хооронд зааг тавьсныг мэднэ” гэсэн юм. 8 Таны бүх албат зарц над руу ирээд сөгдөн мөргөцгөөж “Та явагтун. Өөрийг тань дагадаг ард түмнээ аваад яваач” гэж хэлнэ. Тэгсний дараа л би явна» гэжээ. Ингэж хэлчхээд тэрбээр фараоныхоос ууртай гэгч нь гарч явлаа.

9 Дараа нь Ехова Мосед «Фараон та нарыг сонсохгүй учраас би Египетийн нутагт өөр гайхамшгуудыг үйлдэнэ» гэв. 10 Мосе Аарон хоёр энэ бүх гайхамшгийг фараоны өмнө үйлдсэн ч Ехова фараоныг зөрүүдлэн муйхарлахыг зөвшөөрсөн бөгөөд фараон израйлчуудыг нутгаасаа явуулсангүй.