Шүүгчид
21 Израйлын эрчүүд Мизпад байхдаа «Бидний хэн нь ч охиноо Бениамины эрчүүдэд эхнэр болгон өгөхгүй» гэж тангарагласан байжээ. 2 Ингээд израйлчууд Бетелд очоод жинхэнэ Бурхны өмнө үдэш болтол суулаа. Тэд дуугаа өндөрсгөж цурхиран уйлав. 3 Тэд: «Израйлын Бурхан Ехова минь ээ, Израйлд яагаад ийм юм тохиолдоно вэ? Өнөөдөр Израйлаас яагаад нэг овог дутна вэ?» гэцгээж байлаа. 4 Маргааш нь тэд эрт босож, шатаалт тахил, эвийн тахил өргөхөөр тахилын ширээ босгов.
5 Тэгээд израйлчууд: «Израйлын бүх овог Еховагийн өмнө Мизпад цуглахад хэн ирээгүй вэ?» гэжээ. Учир нь Еховагийн өмнө Мизпад ирээгүй хэнийг ч болов заавал хөнөөнө гэж тэд хатуу тангарагласан байв. 6 Израйлчууд ах дүү бениаминчуудынхаа төлөө харамсан «Өнөөдөр нэг овог Израйлаас таслагдлаа. 7 Амьд үлдсэн бениаминчуудад эхнэр олж өгөхийн тулд одоо яах вэ? Бид охидоо бениаминчуудад эхнэр болгон өгөхгүй гэж Еховад тангарагласан шүү дээ» гэцгээв.
8 Тэд: «Израйлын овгууд Еховагийн өмнө Мизпад цуглахад хэн ирээгүй вэ?» гэцгээсэн бөгөөд Иабеш-гилеадаас хэн нь ч хуаранд ирээгүй нь тодорхой болов. 9 Цугласан хүмүүсийг тоолоход Иабеш-гилеадын оршин суугчдаас нэг ч хүн ирээгүй байсан юм. 10 Иймд чуулган Иабеш-гилеад руу хамгийн хүчтэй 12 000 дайчнаа явуулж тэдэнд «Иабеш-гилеад руу явж, оршин суугчдыг нь, хүүхэд, эмэгтэйчүүдийг нь ч илдээр хөнөөгтүн. 11 Та нар эрэгтэй хүн бүрийг, түүнчлэн эрэгтэй хүнтэй хавьтсан эмэгтэй хүн бүрийг хөнөөх ёстой» хэмээн тушаажээ. 12 Иабеш-гилеадын оршин суугчдын дунд эр хүнтэй хавьтаагүй 400 онгон охин байв. Тэднийг Канааны нутагт байдаг Шило дахь хуаранд авчирчээ.
13 Тэгээд Израйлын чуулган Риммон хаданд буй бениаминчууд руу хэл хүргүүлж, найрамдах санал тавихад 14 бениаминчууд нутагтаа буцаж ирлээ. Израйлчууд Иабеш-гилеадын эмэгтэйчүүдийн дундаас амьд үлдээсэн эмэгтэйчүүдээ тэдэнд өгсөн боловч цөөджээ. 15 Израйлчууд Бениамины хойноос харамсаж байлаа. Яагаад гэвэл Ехова Бениаминыг Израйлын овгуудаас тусгаарласан юм. 16 Чуулганы ахлагчид: «Бениамины амьд үлдсэн эрчүүдэд эхнэр олж өгөхийн тулд бид яасан нь дээр вэ? Эмэгтэйчүүд нь бүгд амиа алдсан» гэхэд 17 зарим нь: «Бениамин овгийнхноос амьд үлдэгсэд өвөө эзэмших ёстой. Тэгж байж Израйлаас овог таслагдахгүй. 18 Гэхдээ “Бениаминчуудад охиноо эхнэр болгож өгсөн хүн хараагдаг” гэж Израйлын ард түмэн тангарагласан болохоор бид охидоо тэдэнд эхнэр болгон өгч болохгүй» гэж хэлэв.
19 Тэгээд тэд: «Шилод жил бүр Еховад зориулсан баяр болдог шүү дээ (Шило нь Бетелээс хойд зүгт, Бетелээс Шехем рүү өгсөх замын зүүн талд, Лебонагаас өмнө зүгт байдаг)» хэмээгээд 20 Бениамины эрчүүдэд «Явж усан үзмийн талбайд нь нуугдацгаа. 21 Шилогийн бүсгүйчүүдийг тойрон бүжиг бүжиглэхээр гарч ирэхийг хараад хүн нэг бүр чинь нуугдсан усан үзмийн талбайгаасаа гарч, эхнэр болгох эмэгтэйгээ барьж аваад Бениамины нутаг руугаа буц. 22 Хэрэв тэдний эцэг юм уу ах дүү нь гомдол нэхэж ирвэл бид: “Бениамины эрчүүдийг бодоод сайхан сэтгэл гаргаач. Бид дайн хийж, тэдэнд эхнэр олж өгсөн ч цөөдсөн юм. Та нар өгье гэж өгөөгүй учраас тангаргаа зөрчсөн болохгүй шүү дээ” гэж хэлнэ» гэв.
23 Бениамины эрчүүд хэлснээр нь хийж, хүн бүр бүжиглэж байсан эмэгтэйчүүдээс сонгосноо эхнэр болгов. Тэгээд тэд өвлөж авсан газартаа буцаж ирээд хотуудаа сэргээн барьж, тэндээ суурьшлаа.
24 Израйлчууд ч тэндээсээ тарж, хүн бүр өөр өөрийнхөө овог, ураг руугаа явав. Ийнхүү тус тусынхаа өвлөж авсан газар луу явцгаажээ.
25 Тэр үед Израйл хаангүй байсан бөгөөд хүн бүр зөв гэж бодсоноо хийдэг байжээ.