Хүн төрөлхтнийг ямар ирээдүй хүлээж байна вэ?
Хүн төрөлхтөн үндсээрээ устах тухай яриаг өмнөх аль ч үеийнхэн тэгтлээ их сонсож байгаагүй байх. Цөмийн сүйрлээс болж дэлхий сөнөх вий гэж олон хүн айдаг. Нөгөө нэг хэсэг нь байгалийн бохирдлоос болж дэлхий мөхнө гэж бодож байхад, гурав дахь нь эдийн засгийн замбараагүй байдал ертөнцийг сүйрүүлнэ гэж сэтгэл зовдог.
Энэ ертөнц үнэхээр устана гэж үү? Устлаа гэхэд, энэ нь яана гэсэн үг вэ? Хэзээ нэгэн цагт ертөнц устаж байсан болов уу?
Эртний ертөнц устсан
Нэг ийм явдал болжээ. Олон зууны тэртээ амьдарч асан Ноа гэдэг хүний үед хүмүүсийн зан чанар дэндүү муудсаныг хүн төрөлхтний хамгийн эртний ном болох Библид тэмдэглэжээ. Тэнд: «Тэр үед ертөнц усан галавт автан, усаар устгагдсан аж» хэмээгээд, «[Бурхан] эртний ертөнцийг хэлтрүүлэлгүй, харин бурханлаг бус хүмүүсийн ертөнц дээр үер буулгахдаа зөвт байдлыг тунхаглагч Ноаг өөр долоон хүний хамт хамгаалсан» гэж бичжээ (2 Петр 2:5; 3:6).
Тэгэхэд ертөнц устсан гэдэг нь ямар учиртай үг болохыг, бас юу гэсэн үг биш болохыг анхаарцгаая. Энэ бол хүн төрөлхтөн үндсээрээ устсан гэсэн үг биш ээ. Учир нь Ноа гэр бүлийнхэнтэйгээ бүх дэлхийг хамарсан усан галавыг эсэн мэнд давсан билээ. Тэрчлэн, газар дэлхий, одот тэнгэр хэвээрээ үлдсэн. Харин «бурханлаг бус хүмүүсийн ертөнц» л устсан юм.
Аажимдаа, Ноагийн үр хүүхэд өсөж олшроод, өөр ертөнц бүрэлдэн тогтжээ. Эдүгээ та бидний амьдарч буй нийгэм бол тэрхүү хоёр дахь ертөнц юм. Тэгвэл дайн дажин, гэмт хэрэг, хүчирхийллээр дүүрсэн өнөөгийн ертөнц яах бол? Биднийг ямар ирээдүй хүлээж байна вэ?
Энэ ертөнцийн ирээдүй
Библид Ноагийн үеийн ертөнц устгагдсан тухай өгүүлээд, цааш нь: «Өнөөгийн тэнгэр болоод газар нь Түүний үгээр байгаа бөгөөд галд зориулагдан, ...хадгалагдаж байна» гэж бичжээ (2 Петр 3:7). Библийн өөр нэг хэсэгт: «[Өнөөгийн] ертөнц... өнгөрнө» гэж тайлбарласан байдаг (1 Иохан 2:17).
Библид «ертөнц өнгөрнө» хэмээсэн нь манай гариг, одот тэнгэр шууд утгаар сөнөнө гэсэн үг биш ээ. Ноагийн үед ч тийм юм болоогүй (Дуулал 104:5). Харин өнөөгийн ертөнц, «тэнгэр» буюу Бурхныг эсэргүүцэгч Сатаны нөлөөн доорх засаглалын тогтолцоотойгоо, мөн «газар» буюу хүний нийгэмтэйгээ хамт галд хуйхлагдах мэт устгагдана (Иохан 14:30; 2 Коринт 4:4). Өнөөгийн ертөнц, Усан галавын өмнөх ертөнц шиг сүйрэх нь лавтай. Ертөнцийн сүйрлээс өмнөхөн болох ёстой үйл явдлыг Бурхны Хүү Есүс Христ хүртэл «Ноагийн өдрүүдэд» үүсчихээд байсан нөхцөл байдалтай адилтгажээ (Матай 24:37—39).
Сонирхолтой нь, Есүс Ноагийн өдрүүдийн тухай ярьсан нь «Таны ирэх хийгээд энэ ертөнцийн төгсгөлд ямар шинж тэмдэг байх вэ?» гэсэн шавь нарынхаа асуултад хариулсан хэрэг байжээ (Матай 24:3, «King James Version»). Дагалдагчид нь энэ ертөнц устана гэдгийг мэдэж байв. Ирээдүйн тэр явдал тэднийг айлгаж байсан уу?
Үгүй. Харин ч Есүс өнөөгийн ертөнц устахын өмнө ямар ямар үйл явдал болохыг тодорхойлж хэлээд, тэднийг баяр хөөртэй байхыг уриалан: «Юу гэвэл, та нарын аврал ойрхон болно» хэмээжээ (Лук 21:28, МАБ). Тийм ээ, аврагдах гэдэг нь Сатан болон түүний ёс бус ертөнц устахад эсэн мэнд үлдэж, энх амгалан, шинэ ертөнцөд амьдарна гэсэн үг! (2 Петр 3:13).
Тэгвэл энэ ертөнц хэзээ устах вэ? Есүсийн «ирэх хийгээд энэ ертөнцийн төгсгөлд» ямар «шинж тэмдэг» байх вэ?
«Шинж тэмдэг»
Энд, «ирэх» гэж орчуулсан пароусиа гэдэг грек үг нь гар дээр бэлэн байх гэсэн утгыг илэрхийлдэг. Тийм болохоор, «шинж тэмдэг» үзэгдэж байвал Христ удахгүй ирэх нь гэсэн үг биш, харин аль хэдийн ирчихээд байна гэсэн үг ажээ. Өөрөөр хэлбэл, тэрбээр тэнгэрийн хааны хувьд үл үзэгдэх байдлаар захираад эхэлчихсэн бөгөөд удахгүй дайснаа дарна гэсэн үг байв (Илчлэлт 12:7—12; Дуулал 110:1, 2).
Есүс «шинж тэмдэг» гэдгээр ганц нэгхэн үйл явдлыг бус, харин дэлхий нийтийг хамарсан олон үйл явдал, нөхцөл байдлыг тодорхойлон хэлжээ. Энэ бүхэн нь Библид «эцсийн өдрүүд» гэж нэрлэсэн тэр цаг үед болох ёстой байлаа (2 Тимот 3:1—5; 2 Петр 3:3, 4). Есүсийн зөгнөсөн «эцсийн өдрүүдийг» тодорхойлох зарим үйл явдлыг авч үзье.
«Үндэстэн үндэстнийхээ эсрэг, хаанчлал хаанчлалынхаа эсрэг босно» (Матай 24:7). Бидний амьдарч байгаа цаг үед дайн дажин урьд хожид байгаагүй тийм өргөн цар хүрээтэй болж байна. Нэгэн түүхч: «[1914 онд эхэлсэн] дэлхийн I дайн бол бүх нийтийг хамарсан анхны дайн байв» гэж тэмдэглэжээ. Гэтэл дэлхийн II дайн бүр ч илүү хөнөөлтэй байсан. Хүн төрөлхтөн одоо ч дайн дажинд нэрвэгдсээр байна. Тийм ээ, Есүсийн хэлсэн үг яахын аргагүй биелж байна!
«Энд тэндгүй өлсгөлөн... болно» (Матай 24:7). Дэлхийн I дайны араас бүх л түүхийн турш тохиолдож байгаагүй гэж хэлж болохоор их өлсгөлөн дагалдсан. Дэлхийн II дайны дараа ч аймшигтай өлсгөлөн болсон. Өнөөдөр, дэлхийн хүн амын тавны нэг нь хоол тэжээлээр дутагдаж, жил бүр 14 сая орчим хүүхэд өлсгөлөнгөөр үхэж байна. «Өлсгөлөн» үнэхээр болж байна!
«Хүчтэй газар хөдлөлтүүд болно» (Лук 21:11). 1914 оноос хойш газар хөдлөлтийн улмаас үрэгдэгсдийн тоо өмнөх зуунуудынхтай харьцуулбал жил тутам дунджаар арав дахин өсжээ. Томоохон газар хөдлөлтийн цөөн хэдэн жишээ дурдъя. 1920 онд Хятадад 200 000; 1923 онд Японд 140 000 орчим хүн үрэгдсэн буюу сураггүй алга болсон; 1939 онд Туркт 32 700; 1970 онд Перуд 66 800; 1976 онд Хятадад 240 000 (зарим мэдээгээр 800 000) хүн амиа алджээ. Үнэхээр «хүчтэй газар хөдлөлтүүд» болжээ!
«Хааяагүй... тахал бий болно» (Лук 21:11, ШГ). Дэлхийн I дайны дөнгөж дараахан «испани томуугаар» 21 сая орчим хүн нас баржээ. Нэгэн сэтгүүлд: «Асар олон хүнийг тийм богино хугацаанд, тийм харгис байдлаар үхэлд хүргэсэн явдал түүхэнд байсангүй» хэмээн тэмдэглэжээ («Science Digest»). Тэр цагаас хойш зүрхний өвчин, өмөн үү, ДОХ гэх мэтийн өвчин эмгэг хэдэн зуун сая хүний амийг авч одсон.
«Ёс бус байдал өснө» (Матай 24:12). 1914 оноос хойш өнөөгийн ертөнцөд гэмт хэрэг, хүчирхийлэл улам гаарсан. Олон улс оронд өдрийн цагаар ч гудамжинд явах аюултай болжээ. Орой үдшээр бол хүмүүс гадагшаа гарахаасаа айж, давхарлаж бэхэлсэн хаалгаа түгжиж аваад, гэртээ суудаг болжээ.
«Эцсийн өдрүүдэд» болох ёстой өөр олон үйл явдлыг зөгнөсөн бөгөөд энэ бүхэн мөн л биелж байна. Энэ нь өнөөгийн ертөнцийн төгсгөл ойртжээ гэсэн үг. Гэвч, үүнийг эсэн мэнд давах хүмүүс байх юм. «Ертөнц... өнгөрнө» гэсэн үгийн дараа «Бурхны хүслийг үйлддэг нэгэн нь мөнхөд оршино» гэж Библи амладаг (1 Иохан 2:17).
Тийм учраас, Бурхны хүсэл тааллыг танин мэдээд, биелүүлэх нь зайлшгүй чухал юм. Тэгж гэмээнэ, бид өнөөгийн ертөнц устахад эсэн мэнд үлдэж, Бурхны байгуулах шинэ ертөнцөд асар их ивээлийг мөнхөд хүртэнэ. Тэр цагт «Бурхан... [хүмүүсийн] нүднээс нулимс бүрийг нь арчина. Тэнд цаашид үхэл байхгүй болно. Тэнд цаашид гашуудах, уйлах, өвдөх гэж үгүй болно» гэж Библид амласан байдаг (Илчлэлт 21:3, 4).
Хэрэв өөр заалт байхгүй бол Библийн ишлэлийг «Ариун Библи» (АББН, 2004 он) орчуулгаас авсан болно. Бусад орчуулга: МАБ — «Шинэ Гэрээс» (монгол-англи Библи, 1993 он); ШГ — «Шинэ Гэрээ» (ОҮМБОХ, 1998 он).
[6-р хуудасны зураг эзэмшигч]
Зураг: Онгоц: USAF photo. Хүүхэд: WHO photo by W. Cutting. Газар хөдлөлт: Y. Ishiyama, Hokkaido University, Japan.