Хурлыг амар тайван, цэвэр ариун байлгах нь

ЖИЛ бүр олон мянган хүн цэвэр шүтлэгт нэгдэн Библийн зөгнөлийг биелүүлж байна (Мика 4:1, 2). Бурхны маань хуралд ирж буй тэднийг бид баяр хөөртэй угтаж авдаг (Үйлс 20:28). Тэд ч бидэнтэй мөр зэрэгцэн Ехова Бурхандаа амар тайван, цэвэр ариун орчинд үйлчилдэгтээ баярладаг. Бид Бурхны агуу хүч, Библид байдаг мэргэн зөвлөгөөний ачаар хурлаа амар тайван, цэвэр ариун байлгадаг (Дуу. 119:105; Зех. 4:6).

² Бурхны ард түмэн Библийн зарчмыг хэрэгжүүлж «шинэ хүнийг өмсдөг» (Кол. 3:10). Жижиг сажиг зүйл, санал зөрөлдөөнөөс болж түнжин хагардаггүй. Бид аливаад Еховагийн үзлээр ханддаг учраас эв нэгдлийг маань эвдэн бусниулах энэ ертөнцийнхний нөлөөнөөс ангид байж, олон үндэстний ах дүүстэйгээ гар нийлэн хамтран зүтгэдэг (Үйлс 10:34, 35).

³ Гэлээ ч заримдаа хурлын эв нэгдэл, амар тайван байдалд сөргөөр нөлөөлж болзошгүй асуудал гардаг. Юунаас болоод тэр вэ? Ихэнх тохиолдолд, Библийн зөвлөгөөг дагаж чадаагүйгээс болсон байдаг. Бид одоо ч төгс бус байдалтайгаа тэмцдэг. Бидний дунд нүгэлгүй хүн нэг ч байхгүй (1 Ёох. 1:10). Зарим хүн Еховагийн тогтоосон ёс суртахууны өндөр хэм хэмжээг зөрчин хурлынхандаа муу нөлөө үзүүлж мэдэх юм. Бид бодлогогүй үг яриа, үйлдлээрээ бусдыгаа гомдоож мэднэ. Эсвэл өөрсдөө итгэл нэгтнийхээ хэлсэн үг, хийсэн үйлдлээс болоод гомдож болох юм (Ром 3:23). Иймэрхүү асуудал гарвал яаж шийдэх вэ?

⁴ Ехова биднийг төгс бусаасаа болоод янз бүрийн асуудал гаргадгийг маань ойлгодог. Тиймээс бэрхшээл тулгарахад хэрхэн шийдэхийг Үгээрээ зааж өгдөг. Бас хайр халамжтай хоньчид буюу ахлагчид бидэнд туслахад хэзээд бэлэн байдаг. Библид үндэслэн өгсөн тэдний зөвлөгөөг дагавал итгэл нэгтэнтэйгээ эвлэрээд зогсохгүй Бурхантай сайн харьцаатай хэвээрээ байна. Ноцтой алдаа гаргаад зэмлэл хүлээх юм уу сахилга батын арга хэмжээ авахуулбал тэнгэрийн Эцэг Ехова маань биднийг хайрласандаа тийн сахилгажуулж байгааг бүү мартаарай (Сур. 3:11, 12; Евр. 12:6).

САНАЛ ЗӨРӨЛДӨӨНИЙГ ШИЙДЭХ НЬ

⁵ Хурлын хүмүүсийн дунд санал зөрөлдөх зүйл заримдаа гардаг. Тийм үед ах дүүгээ гэсэн хайрандаа хөтлөгдөн аль болох хурдан шийдэх учиртай (Эф. 4:26; Флп. 2:2–4; Кол. 3:12–14). «Бие биеэ халуун сэтгэлээр хайрла. Учир нь хайр тоо томшгүй нүглийг далдалдаг» гэсэн элч Петрийн зөвлөгөөг дагавал хувь хүний зан чанараас үүдэж гарсан асуудлыг шийдэж чадна (1 Петр 4:8). «Бид бүгдээрээ алддаг» гэж Библид бий (Яак. 3:2). «Өөрт тань яаж хандаасай гэж хүснэ, өөрөө ч мөн бусдад тийнхүү ханд» гэсэн Алтан дүрмийг баримталдаг бол бусдын жижиг сажиг алдааг уучилж, тоохгүй өнгөрөөж чадна (Мат. 6:14, 15; 7:12).

⁶ Хэрэв таны хэлсэн үг, хийсэн үйлдлээс болж итгэл нэгтэн тань гомдсоныг анзаарвал та тэр даруй санаачилга гарган эвлэрэхийг хичээгээрэй. Тэгэхгүй бол Еховатай тогтоосон харьцаанд тань нөлөөлнө гэдгийг санаарай. Есүс дагалдагчдадаа «Тахилын ширээн дээр өргөл өргөх гэж байхдаа өөрт чинь гомдсон ах дүүгээ санавал өргөлөө тахилын ширээний өмнө орхиод яв. Эхлээд тэр хүнтэйгээ эвлэр. Дараа нь ирж өргөлөө өргө» хэмээн зөвлөсөн (Мат. 5:23, 24). Заримдаа үл ойлголцох явдал гарах нь бий. Тийм үед илэн далангүй ярихыг хичээгээрэй. Хурлынхан бие биетэйгээ ний нуугүй ярилцдаг бол үл ойлголцох асуудал бага гарна. Бас төгс бусаас болоод гардаг асуудлуудыг шийдвэрлэж чаддаг.

БИБЛИЭС ЗӨВЛӨГӨӨ ӨГӨХ НЬ

⁷ Үзэл бодлыг нь засахын тулд зарим хүнд зөвлөгөө өгөх шаардлагатайг ахлагчид анзаарч болох юм. Бусдын буруу үзлийг засах тийм ч амар биш. Элч Паул Галат дахь итгэл нэгтнүүддээ «Ах дүү нар аа, хэрэв хүн өөрийн мэдэлгүй замаасаа хазайвал төлөвшсөн та нар аядуу зөөлөн байж, тэр хүнийг засаж залруулахыг хичээ» хэмээн бичжээ (Гал. 6:1).

⁸ Ахлагчид сүргийг анхааран халамжилдаг бол итгэл сулруулж болох аюулаас хурлынхныгаа хамгаална, ноцтой асуудлыг даамжрахаас урьдчилан сэргийлнэ. Ехова Исаиагаар дамжуулан «Хүн бүр салхинаас хоргодох газар мэт, шуурганаас халхлах халхавч мэт, хуурай газрын усны суваг мэт, ангасан газар дахь өндөр хадны сүүдэр мэт байх болно» гэж амласан. Ахлагчид ч энэ амлалтын дагуу хурлынхныхаа төлөө үйлчлэхийг хичээдэг (Ис. 32:2).

БИЕЭ ЗӨВ АВЧ ЯВДАГГҮЙ ХҮНЭЭС БОЛГООМЖЛОХ НЬ

⁹ Хурлынханд муу нөлөө үзүүлж болзошгүй хүмүүс гарахыг элч Паул сэрэмжлүүлсэн. Тэрээр: «Бид ... заавар өгье. Итгэл нэгт тань биеэ зөв авч явдаггүй, та нарт бидний зааж сургасныг биелүүлдэггүй бол түүнээс хол бай» гэжээ. Ийн хэлснийхээ учрыг тодруулан «Харин энэ захидалд бичсэнийг дагадаггүй хүн байвал түүнээс болгоомжилж, түүнтэй харьцахаа боль. Тэгвэл тэр хүн ичих юм. Гэхдээ түүнийг дайсан биш, итгэл нэгтнээ гэж бодоод сануулж бай» гэжээ (2 Тес. 3:6, 14, 15).

¹⁰ Хурлаас хасагдахад хүргэх ноцтой нүгэл үйлдээгүй ч Христийн дагалдагч хүний баримталбал зохих хэм хэмжээг санаатайгаар үл тоомсорлодог хүн хуралд гарч ирж болох юм. Үүнд хэтэрхий залхуу, үргэлж шүүмжилдэг, бохир заваан гэх зэрэг хүмүүс ордог. Мөн «хүний хэрэгт оролцож» явдаг хүн ч ордог (2 Тес. 3:11). Эсвэл бусдын эд материалыг өөрийнхөө төлөө ашиглахыг боддог, илт зохисгүй зугаа цэнгэлд автсан хүн байж болох юм. Ингэж биеэ зохисгүй авч явдаг бол хуралд муугаар нөлөөлж, итгэл нэгтнүүд нь түүний муу жишээг даган дуурайх аюултай.

¹¹ Ахлагчид биеэ зохисгүй авч явдаг хүнд Библид үндэслэсэн зөвлөгөө өгч, туслахыг урьтал болгох хэрэгтэй. Харин тухайн хүнд Библид үндэслэн дахин дахин сануулга өгсөн ч үл тоомсорловол ахлагчид хурлынхандаа анхааруулах илтгэл тавихаар шийдэж болох юм. Ингэхдээ ахлагчид ухаалаг байж, үнэхээр ноцтой асуудал мөн эсэхийг, бас хурлын амар тайван байдалд аюул учруулж буй эсэхийг тооцож үзэх учиртай. Илтгэл тавих хүн уг асуудалтай холбоотой тохиромжтой зөвлөгөөг өгнө. Тухайн хүний нэрийг хэлэхгүй ч гэсэн, хэний талаар ярьж байгааг илтгэлээс ойлгосон хүмүүс тэр хүнтэй нийлэхээ болих хэрэгтэйгээ мэдэж авна. Гэхдээ түүнтэй итгэл нэгтний ёсоор харьцаж, «сануулж» байх ёстой.

¹² Биеэ зохисгүй авч явдаг хүн биднийг уг арга хэмжээг үнэнч, тууштай дэмжиж байгааг хараад хийсэн зүйлдээ ичиж, өөрчлөгдөөсэй гэж бид хүсдэг. Тухайн хүн засарсан нь тодорхой харагдаж байвал цаашдаа тэр хүнээс дөлөх шаардлагагүй.

НОЦТОЙ АСУУДЛЫГ ШИЙДЭХ НЬ

¹³ Бусдын алдаа дутагдлыг үл тоон, мартах хэрэгтэй гэдэг нь буруу юм хийж байгаа хүнийг тоолгүй, зөвтгөнө гэсэн үг биш ээ. Алдаа болгоныг төгс бусын үр дагавар гэж дүгнэх аргагүй. Мөн жижиг гэж хэлж болохооргүй алдаа дутагдлыг тоолгүй өнгөрөөж болохгүй (Лев. 19:17; Дуу. 141:5). Мосегийн хуульд зарим нүглийг бусад нүглээс илүү ноцтой гэсэн байдаг бөгөөд Христийн дагалдагчид бид ч тэгж үздэг (1 Ёох. 5:16, 17).

¹⁴ Христийн дагалдагчдын хооронд заримдаа ноцтой асуудал гарч мэднэ. Тийм асуудлыг шийдэх аргыг Есүс тодорхой хэлсэн байдаг. Ямар ямар алхам хийх талаар ингэж хэлжээ. «Түүнээс гадна, ах дүү чинь чиний эсрэг нүгэл үйлдвэл 1) очоод хоёулхнаа ярилцаж бурууг нь хэл. Хэрэв чамайг сонсвол чи зөв юм хийхэд нь тусалсан хэрэг. Хэрэв чамайг сонсохгүй бол 2) нэг юм уу хоёр хүнийг дагуулж оч. Ингэвэл хоёр юм уу гурван гэрчийн мэдүүлгээр хэрэг нотлогдоно. Тэднийг сонсохгүй бол 3) хуралд хэл. Хурлыг ч сонсохгүй бол тэр хүн чиний хувьд харь үндэстэн, татвар хураагч мэт байг» (Мат. 18:15–17).

¹⁵ Ингэж хэлснийхээ дараа нэгэн жишээ хэлснийг Матай 18:23–35-д бичсэн. Үүнээс үзвэл Матай 18:15–17-д гардаг нүглийн тоонд мөнгө төгрөг болон эд хөрөнгөтэй холбоотой асуудал ордог байх нь ээ. Жишээ нь, зээлээ эргүүлж өгөхгүй байх, бусдыг залилах зэрэг орно. Мөн бусдын нэр хүндэд ноцтой нөлөөлж болох гүтгэлэг орж болох юм.

¹⁶ Итгэл нэгтэн тань дээр дурдсан нүглийг танд үйлдсэн гэх баталгаа байгаа бол уг асуудалд ахлагчдыг оролцуулах гэж яарах хэрэггүй. Эхлээд тэр хүнтэйгээ ярилцах хэрэгтэй гэж Есүс зөвлөсөн шүү дээ. Өөр хэн нэгнийг оролцуулалгүйгээр асуудлаа шийдэхийг хичээгээрэй. Есүс: «[Ганц л удаа] ярилцаад бурууг нь хэл» гээгүйг анхаараарай. Хэрэв нүгэл үйлдсэнээ хүлээн зөвшөөрөхгүй, уучлалт гуйхгүй бол дараа дахин уулзах нь тустай байж болох юм. Ийм аргаар асуудлыг шийдвэл үйлдсэн нүглийнх нь талаар бусдад яриагүйд, хурал дахь нэр хүндийг нь унагаагаагүйд тухайн хүн талархах нь дамжиггүй. Бас та «зөв юм хийхэд нь тусалсан хэрэг».

¹⁷ Хэрэв хүн нүглээ хүлээн зөвшөөрч, уучлалт гуйн, алдаагаа засахыг хичээж байгаа бол Есүсийн хэлсэн дараагийн алхмыг хийх шаардлагагүй. Үйлдсэн нүгэл нь ноцтой байлаа ч ийнхүү хоорондоо ярилцаад асуудлаа шийдэж болдог.

¹⁸ Хэрэв «хоёулхнаа» уулзаж бурууг нь хэлсэн ч асуудлаа шийдэж чадаагүй бол Есүсийн хэлсэнчлэн «нэг юм уу хоёр хүнийг дагуулж очоод» дахин ярилцаж болох юм. Итгэл нэгтэндээ туслах зорилгоор явж байгаа гэдгийг хамт явж байгаа хүн тань ойлгох учиртай. Болсон үйл явдлыг харсан хүн байвал сайн. Гэхдээ байхгүй байлаа ч, нүгэл үйлдсэн хүнтэй ярилцахад гэрчээр оролцохыг нэг юм уу хоёр хүнээс гуйж болох юм. Тэд тухайн асуудалтай холбоотой маргааныг шийдэх туршлагатай эсвэл юу нь чухам буруу вэ гэдгийг тогтоох чадвартай хүмүүс байвал сайн. Хэрэв ахлагчдыг гэрчээр татан оролцуулбал яах вэ? Ахлагчдын зөвлөл тэр ахлагчийг томилоогүй тохиолдолд хурлыг төлөөлөхгүй.

¹⁹ Хэрэв та Есүсийн хэлсэн хоёр алхмыг хийгээд асуудлаа шийдэхийг хэд хэдэн удаа оролдсон ч чадахгүй, бас тоохгүй өнгөрөөж чадахгүй байвал ахлагчдад асуудлыг хэлэх хэрэгтэй. Ахлагчдын зорилго нь хурлын амар тайван, цэвэр ариун байдлыг хадгалах гэдгийг битгий мартаарай. Ахлагчдаас тусламж хүсэж байгаа нь асуудлаа тэдэнд даатгахаас гадна Еховад найдаж байна гэсэн үг. Та хүний гаргасан үйлдлээс болж Еховагаас битгий хөндийрөөрэй. Баяр хөөрөө ч бүү алдаарай (Дуу. 119:165).

²⁰ Ахлагчид болсон явдлыг олон талаас нь нягталдаг. Хэрэв тухайн хүн танд ноцтой нүгэл үйлдсэн нь тодорхой, хийсэн хэрэгтээ гэмшихгүй, алдаагаа засахын тулд шаардлагатай алхам хийхгүй байвал ахлагчдаас бүрддэг хороо тухайн хүнийг хурлаас хасах хэрэгтэй болж мэднэ. Ийнхүү тэд хонин сүргийг хамгаалж, хурлаа цэвэр ариун байлгадаг (Мат. 18:17).

НОЦТОЙ НҮГЭЛ ҮЙЛДСЭН БОЛ

²¹ Садар самуун үйлдэх, завхайрах, ижил хүйстэнтэйгээ явалдах, Бурхныг доромжлох, тэрслэх, шүтээн шүтэх зэрэг ноцтой нүгэл үйлдсэн хүнийг хохирогч хүн нь уучилбал зүгээр өнгөрөөж болно гэж үзэж болохгүй (1 Кор. 6:9, 10; Гал. 5:19–21). Яагаад гэвэл хурлынхны Еховатай тогтоосон харьцаа болон ёс суртахууны өндөр хэм хэмжээг сахихад сөргөөр нөлөөлдөг тул дээрх ноцтой нүглүүдийг үйлдсэн хүнийг ахлагчдад мэдэгдэх шаардлагатай бөгөөд тэд энэ асуудлыг шийдэх ёстой (1 Кор. 5:6; Яак. 5:14, 15). Ноцтой нүгэл үйлдсэн зарим хүн өөрөө ахлагчид дээр очиж мэдэгддэг. Эсвэл хийсэн хэргийг нь мэдэж байгаа хүн ахлагчдад хэлдэг (Лев. 5:1; Яак. 5:16). Баптисм хүртсэн Гэрчийн хийсэн ноцтой нүглийг ахлагч ямар ч аргаар мэдсэн бай, юуны түрүүнд хоёр ахлагч тухайн хэргийг шалгаж үзнэ. Хэрэв тухайн хэрэгтэй холбоотой хангалттай баримт байвал, мөн тэдгээр баримт нь ноцтой нүгэл үйлдсэнийг нь нотолж байгаа тохиолдолд уг хэргийг шийдэхийн тулд ахлагчдын зөвлөл эрх зүйн хороог томилдог. Тус хороо дор хаяж гурван ахлагчаас бүрдэнэ.

²² Ахлагчид хурлынхныгаа Еховатай тогтоосон харьцаанд нь сэв суулгаж болзошгүй алив бүхнээс хамгаалж, анхаарч халамжилдаг. Мөн алдаа гаргасан хүнийг Бурхны Үгийг чадварлаг ашиглан зэмлэж, Еховатай дахин дотносоход нь туслахыг хичээдэг (Юуд. 21–23). Ийн зааж зааварладаг нь элч Паулын Тимотод өгсөн заавартай тохирдог. Паул: «Бурхны өмнө би чамд тушааж байна. ... Амьд болон үхсэн хүмүүсийг шүүх Христ Есүсийн өмнө би чамд тушааж байна. ... Зэмлэ, сануул, ятга. Ингэхдээ тэвчээртэй байж, чадварлаг заа» гэжээ (2 Тим. 4:1, 2). Энэ нь цаг их шаарддаг ч ахлагчид нөр их хөдөлмөрлөдөг. Тэдний хичээл зүтгэлийг хурлынхан нь өндөр үнэлж, «гүнээ хүндэтгэдэг» (1 Тим. 5:17).

²³ Ноцтой нүгэл үйлдсэн нь тогтоогдсон бол Еховатай дахин сайн харьцаатай болгохын тулд ахлагчид чадах бүхнээ хийдэг. Тухайн хүн чин сэтгэлээсээ гэмшиж, ахлагчдаас тусламж авахыг хүсэж байвал сахилга батын арга хэмжээ авна. Ахлагчид үүнийг ноцтой нүгэл үйлдсэн хүнд ганцааранд нь эсвэл эрх зүйн хорооны уулзалтад гэрчээр оролцсон хүмүүсийг байлцуулан хэлнэ. Ингэж нүгэл үйлдсэн хүнийг сахилгажуулахын зэрэгцээ гэрчээр оролцож буй хүмүүст «сэрэмжлүүлэг» өгдөг (2 Сам. 12:13; 1 Тим. 5:20). Эрх зүйн хороо зэмлэл хүртээсэн бол зарим эрхийг нь заавал хязгаарлана. Энэ нь буруу юм хийсэн хүнд «замаа шулуун болгоход» нь тустай (Евр. 12:13). Зэмлэл хүртсэн хүн ахиц дэвшил гарган Еховатай дотносож байгаа нь тодорхой харагдаж байвал тэр хэрээр эрхийг нь сэргээнэ.

ЗЭМЛЭЛ ХҮРТСЭН ХҮНИЙГ ЗАРЛАХ НЬ

²⁴ Нүгэл үйлдсэн хүнийг гэмшсэн гэж эрх зүйн хороо дүгнэсэн ч тэр асуудлыг хурлынхан нь болон амьдарч буй газрынх нь хүмүүс мэдэх магадлал өндөр бол, мөн хурлынханд тухайн хүний талаар анхааруулах хэрэгтэй бол «Амьдрал, үйл хэрэг цуглаан» дээр дараах товч зарлалыг хэлнэ. «[Нэрийг нь хэлээд] зэмлэл хүртсэн» гэж зарлана.

ХУРЛААС ХАСАХААР ШИЙДСЭН БОЛ

²⁵ Зарим хүн өөрт нь туслах гэсэн ахлагчдын хичээл зүтгэлийг үл тоон ноцтой нүгэл үйлдсээр байдаг. Эрх зүйн хороогоор орох үедээ гэмшиж байгаа нь үйл хэргээс нь хангалттай хэмжээгээр харагдахгүй байж болох юм (Үйлс 26:20). Тийм тохиолдолд яах вэ? Хурлаас хасах шаардлагатай. Ийнхүү нүгэл үйлдээд гэмшээгүй хүн Еховагийн ариун ард түмэнтэй харьцах эрхгүй болдог. Үүний үрээр хуралд муу нөлөө үзүүлэх хүнгүй болж хурлын нэр хүнд, цэвэр ариун байдлыг хамгаална (Д.хууль 21:20, 21; 22:23, 24). Коринтын хурлын нэг хүн бузар булай зүйл хийснийг элч Паул мэдээд ахлагчдад «Хурлынхныг ... зөв үзэлтэй байлгахын тулд түүнийг Сатанд тушаа» хэмээн зөвлөжээ (1 Кор. 5:5, 11–13). Мөн Паул тухайн үед үнэний эсрэг тэрсэлсэн хүмүүсийг хурлаас хассан тухайгаа бичсэн байдаг (1 Тим. 1:20).

²⁶ Гэмшээгүй хүнийг хурлаас хасахаар шийдвэл эрх зүйн хороо Библийн ямар үндэслэлээр хасаж байгаагаа түүнд тодорхой тайлбарлах хэрэгтэй. Хэрэв тухайн хүн эрх зүйн хороог хэргийг нь шийдэхдээ ноцтой алдаа гаргасан гэж үзэн шийдвэрийг нь магадлуулахыг хүсвэл шалтгаанаа тодорхой бичин захидлаар давж заалдаж болохыг ч хэлэх хэрэгтэй. Шийдвэр гарснаас хойш долоо хоногийн дотор давж заалдаж болдог. Ахлагчдын зөвлөл давж заалдах өргөдлийг хүлээж аваад дүүрэг хариуцагчтай холбоо барина. Дүүрэг хариуцагч шаардлага хангасан ахлагчдыг сонгож хэргийг дахин магадлуулахын тулд давж заалдах хороог байгуулна. Уг хорооныхон өргөдлийг хүлээж авснаас хойш болж өгвөл долоо хоногийн дотор тухайн хүнтэй уулзах хэрэгтэй. Тухайн хүн давж заалдсан тохиолдолд хурлаас хасагдсаныг нь зарлахаа хойшлуулна. Мөн энэ хугацаанд дэлгэрүүлэх ажилд оролцохоос бусад эрхийг нь, тухайлбал цуглаан дээр хариулах, залбирах гэх зэргийг хязгаарлана.

²⁷ Давж заалдах нь тухайн хүний төлөө зохион байгуулдаг арга хэмжээ бөгөөд бодол санаагаа дахин нэг илэрхийлэх боломж олгодог. Тиймээс ноцтой нүгэл үйлдсэн хүн давж заалдах уулзалтад санаатайгаар ирэхгүй бол ахлагчид түүнтэй уулзахын тулд бүх аргаараа хичээсний дараа хасагдсаныг нь зарлана.

²⁸ Хэрэв ноцтой нүгэл үйлдсэн хүн давж заалдахыг хүсэхгүй бол эрх зүйн хороо түүнд гэмших хэрэгтэйг нь, эрхээ дахин сэргээлгэхийн тулд ямар ямар алхам хийхийг нь тайлбарлаж өгнө. Энэ нь тухайн хүнд тус болох төдийгүй сайхан сэтгэлээр хандаж буй хэрэг юм. Түүнийг засарч өөрчлөгдөөд Еховагийн байгууллагад эргээд ирээсэй гэсэн сэтгэлээр ярих хэрэгтэй (2 Кор. 2:6, 7).

ХУРЛААС ХАСАГДСАНЫГ ЗАРЛАХ НЬ

²⁹ Ноцтой нүгэл үйлдээд гэмшээгүй хүнийг хурлаас хасахаар шийдсэн бол дараах товч зарлалыг хэлнэ. «[Нэрийг нь хэлээд] Еховагийн Гэрч байхаа больсон» гэж хэлнэ. Зарлал хэлбэл хурлынхан тэр хүнээс холбоогоо таслах хэрэгтэйгээ ойлгоно (1 Кор. 5:11).

ГЭРЧ БАЙХАА ӨӨРИЙН ХҮСЛЭЭР БОЛИХ

³⁰ «Гэрч байхаа өөрийн хүслээр болих» гэдгээр баптисм хүртсэн Гэрч цаашид Еховагийн Гэрч гэж тооцогдохыг хүсэхгүй байгаагаа хэлж Христийн дагалдагч хүний байр сууриасаа татгалзахыг хэлдэг. Эсвэл Библитэй зөрчилддөг юм уу Еховагийн буруушаадаг зүйлийг зорилгоо болгодог байгууллагын гишүүн болох зэргээр хурлынхны нэг байхаас татгалзаж байгаагаа үйлдлээрээ харуулж болох юм (Ис. 2:4; Илч. 19:17–21).

³¹ Итгэл үнэмшлээсээ санаатайгаар татгалзсан хүний тухай элч Ёохан: «Тэд биднээс салж одсон. Бидэнтэй нөхөрлөх хүмүүс биш ажээ. Хэрэв бидэнтэй нөхөрлөх байсан бол хамт байх л байсан» гэжээ (1 Ёох. 2:19).

³² Гэрч байхаа өөрийн хүслээр больсон хүний байр суурь, дэлгэрүүлэх ажилд оролцохоо болиод идэвхгүй болсон Гэрч хүнийхээс эрс ялгаатай. Зарим хүн Бурхны Үгийг тогтмол судалдаггүйгээсээ болоод идэвхгүй болдог. Эсвэл бэрхшээл юм уу хавчлагатай тулгараад Еховад үйлчлэх идэвх зүтгэл нь суларсан байдаг. Ахлагчид болон хурлын хүмүүс идэвхгүй болсон итгэл нэгтнээ Еховатай буцаад дотно болоход нь шаардлагатай тусламжийг үзүүлдэг (Ром 15:1; 1 Тес. 5:14; Евр. 12:12).

³³ Хэрэв Еховад өөрийгөө зориулсан хүн Гэрч байхаа өөрийн хүслээр болихоор шийдсэн бол тухайн хүний талаар хуралд товчхон зарлал хэлдэг. «[Нэрийг нь хэлээд] Еховагийн Гэрч байхаа больсон» гэж зарлана. Гэрч байхаа өөрийн хүслээр больсон хүн болон хасагдсан хүнтэй харьцахдаа адилхан зарчим баримталдаг.

ЭРХИЙГ НЬ СЭРГЭЭХ

³⁴ Хэрэв хурлаас хасагдсан юм уу Гэрч байхаа больсон хүн чин сэтгэлээсээ гэмшсэнээ, мөн зохисгүй юм хийхээ больсноо тодорхой хугацааны турш батлан харуулж байвал эрхийг нь сэргээж болох юм. Мөн Еховатай сайн харьцаатай байх чин хүсэлтэй нь илэрхий байх ёстой. Чин сэтгэлээсээ гэмшсэнээ батлах ёстой учир ахлагчид ухаалаг байж хангалттай хугацаа өгөх хэрэгтэй. Нөхцөл байдлаас нь шалтгаалж олон сар, заримдаа жил эсвэл бүр түүнээс удаан хугацаанд ажиглах шаардлагатай байж мэдэх юм. Тухайн хүн эрхээ сэргээлгэх хүсэлтээ ахлагчдад захидлаар мэдэгддэг. Хүсэлтийг нь ахлагчдын зөвлөл хүлээж авсан тохиолдолд эрх сэргээх хорооны гишүүд түүнтэй уулзах хэрэгтэй. Эрх сэргээх хорооны гишүүд чин сэтгэлээсээ гэмшсэн нь үйл хэргээс нь харагдаж байгаа эсэхийг магадалж, тухайн үед эрхийг нь сэргээх эсэхийг шийднэ (Үйлс 26:20).

³⁵ Өөр хуралд байхдаа хасагдсан хүн эрхээ сэргээлгэх хүсэлт гаргавал байгаа газрынх нь эрх сэргээх хороо түүнтэй уулзаж, асуудлыг нь авч үзнэ. Дараа нь эрх сэргээх хорооныхон өмнө байсан хурлын ахлагчдын зөвлөлд саналаа мэдэгдэнэ. Хоёр хурлын уг хорооны ахлагчид зөв шийдвэр гаргахын тулд хангалттай хэмжээний баримт нотолгоо цуглуулсан эсэхийг магадалж, хамтран ажиллах хэрэгтэй. Харин эрхийг нь сэргээх шийдвэрийг анх уг шийдвэрийг гаргасан хурлын эрх сэргээх хорооны гишүүд гаргана.

ЭРХИЙГ НЬ СЭРГЭЭСНИЙГ ЗАРЛАХ

³⁶ Эрх сэргээх хороо хасагдсан эсвэл өөрийн хүслээр Гэрч байхаа больсон хүн чин сэтгэлээсээ гэмшсэнийг баталж, эрхийг нь сэргээх нь зүйтэй гэж үзсэн бол эрхийг нь сэргээснийг хурлынханд зарлана. Хэрэв хасагдсан хүн одоо өөр хуралд байгаа бол анх хасагдсан хуралд нь бас зарлана. Эрх нь сэргээгдсэн тухай товчхон зарлал хэлдэг. «[Нэрийг нь хэлээд] Еховагийн Гэрч байх эрх нь сэргээгдсэн» гэж хэлнэ.

БАПТИСМ ХҮРТСЭН ХҮҮХЭД НОЦТОЙ НҮГЭЛ ҮЙЛДВЭЛ

³⁷ Баптисм хүртсэн хүүхэд ноцтой нүгэл үйлдсэн бол тэр тухай ахлагчдад мэдэгдэх шаардлагатай. Ахлагчид хүүхдийн оролцсон ноцтой асуудлыг шийдэхдээ баптисм хүртсэн эцэг эхийг нь байлцуулах нь сайн. Эцэг эхчүүд эрх зүйн хороотой хамтран ажиллах ёстой. Өөрөөр хэлбэл хүүхдэд нь сахилга батын арга хэмжээ авбал өмгөөлж хамгаалахыг оролдох учиргүй. Эрх зүйн хороо насанд хүрсэн хүний хэргийг шийдэхтэй адил, тухайн хүүхдэд буруу замаасаа гарч, засрахад нь туслахын тулд чадах бүхнээ хийнэ. Гэхдээ хийсэн хэрэгтээ гэмшихгүй бол тэр хүүхдийг хурлаас хасах арга хэмжээ авдаг.

БАПТИСМ ХҮРТЭЭГҮЙ ДЭЛГЭРҮҮЛЭГЧ НҮГЭЛ ҮЙЛДВЭЛ

³⁸ Баптисм хүртээгүй дэлгэрүүлэгч ноцтой нүгэл үйлдсэн бол яах вэ? Хурлын баптисм хүртсэн Гэрч биш болохоор хурлаас хасдаггүй. Харин Библийн хэм хэмжээг бүрэн гүйцэд ойлгоогүй байж болох учир сайхан сэтгэлийн үүднээс зөвлөгөө өгвөл «замаа шулуун болгоход» нь тус болно (Евр. 12:13).

³⁹ Хоёр ахлагч баптисм хүртээгүй дэлгэрүүлэгчтэй уулзаж, туслахыг хичээсэн ч гэмшээгүй бол хурлынханд зарлах шаардлагатай. «[Нэрийг нь хэлээд] баптисм хүртээгүй дэлгэрүүлэгч байхаа больсон» хэмээн товч зарлана. Хурлынхны хувьд тухайн хүн ертөнцийн хүнээс ялгаагүй болно гэсэн үг. Тухайн хүн хурлаас хасагдаагүй ч хурлын хүмүүс түүнтэй ямар нэг байдлаар харьцахдаа болгоомжтой байх хэрэгтэй (1 Кор. 15:33). Дэлгэрүүлэгч биш болсон хүнээс дэлгэрүүлэх ажлын тайлан авахгүй.

⁴⁰ Баптисм хүртээгүй дэлгэрүүлэгч байхаа больсон хүн яваандаа дахин дэлгэрүүлэгч болохыг хүсэж болох юм. Ийм үед хоёр ахлагч түүнтэй уулзан Еховатай дотносохын тулд хичээж мэрийж буй эсэхийг нь магадална. Хэрэв шаардлага хангаж байвал «[Нэрийг нь хэлээд] дахин баптисм хүртээгүй дэлгэрүүлэгч болсон» хэмээн товч зарлана.

ХУРЛАА АМАР ТАЙВАН, ЦЭВЭР АРИУН БАЙЛГАЖ ЕХОВАГИЙН ИВЭЭЛИЙГ ХҮРТЭХ НЬ

⁴¹ Ард түмэнтэй нь нэгдсэн бүх хүн Еховагийн өгдөг арвин их ивээлийг хүртэж байна. Хоньчин Ехова маань биднийг хурал хэмээх үржил шимтэй газар бэлчээж, үнэний цэвэр усаар элбэг дэлбэг ундаалдаг. Мөн Есүсийн удирдлага дор ажилладаг байгууллагаараа дамжуулан биднийг хамгаалж, санаа тавьдаг (Дуу. 23; Ис. 32:1, 2). Өнөөгийн бусармаг нийгмийн эцсийн өдрүүдэд диваажинтай зүйрлэм орчинд байдаг учир бид айх аюулгүй, амар тайван байдаг.

⁴² Бид хурлаа амар тайван, цэвэр ариун байлгадаг бол үнэний гэрлийг гэрэлтүүлсээр байх болно (Мат. 5:16; Яак. 3:18). Улам олон хүн Еховаг таньж мэдэн, хүсэл тааллыг нь биелүүлэхээр бидэнтэй нэгдэж байгааг хараад бид үнэхээр их баярладаг. Энэ бүхэн бол Еховагийн ивээл юм.