Одоо бол Бурхны санаа зорилгыг биелүүлэх цаг мөн
«[Христ] бүгдийн төлөө үхсэн учраас амьд байгсад цаашид өөрсдийн төлөө... амьдрах ёс[гүй]» (2 КОРИНТ 5:15).
1. Нэгэн миссионерийн дурсамжийг товч ярина уу.
«ИРГЭНИЙ ДАЙН дуусахад бид нэгэн бөглүү тосгонд очиж билээ. Манай машин тэнд очсон цэргийн бус анхны машин байсан юм. Холбоо тасарсан тэндхийн нэг жижиг хурлын итгэл нэгтнүүдээ ямар байгааг үзэх гэж очсон нь тэр байлаа. Бид хоол хүнс, хувцас хунар, Библид үндэслэсэн хэвлэлээс гадна байгууллагынхаа тухай кино авч явсан юм. Тэгтэл тосгоны «театр» буюу зурагт, видео тоглуулагч тавьсан өвсөн урцад их олон хүн ирсэн учир бид киногоо хоёр удаа гаргаж билээ. Тэр болгонд олон хүн Библийн хичээл эхэлж байсан юм. Бидний ажил үнэхээр үр дүнтэй байсан» гэж Африкийн нэг улсад үйлчилж байсан Аарон гэдэг миссионер дурсжээ.a
2. а) Ямар учраас христианууд Бурханд үйлчилж амьдрахыг хүсдэг вэ? б) Энэ өгүүллээр юуны тухай ярилцах вэ?
2 Аарон болон түүний нөхөд ямар учраас тийм хэцүү даалгавар биелүүлсэн юм бол оо? Тэд Есүс Христийн золиосонд талархан, Бурханд өөрийгөө зориулсан учир Бурхныхаа санаа зорилгыг биелүүлэхийг хүсдэг байжээ. Бурханд өөрийгөө зориулсан христианууд ч бас тэдний адил «өөрсдийн төлөө бус», харин «сайн мэдээний төлөө бүх юмсыг хийхээр» шийддэг (2 Коринт 5:15; 1 Коринт 9:23). Өнөөгийн тогтолцоо оршин тогтнохоо болиход эд баялаг, өндөр байр суурь үнэ цэнгүй болохыг тэд сайн мэддэг. Тиймээс, хүч хөдөлмөр, амь амьдралаа Бурхны санаа зорилгыг биелүүлэхэд зориулдаг (Номлогчийн үгс 12:1). Тэгвэл яаж Бурхны санаа зорилгын дагуу амьдрах вэ? Урам зоригтой, эрч хүчтэй байхын тулд яах хэрэгтэй вэ? Үйлчлэлээ өргөжүүлэх ямар ямар боломж байна вэ?
Энгийнээс эхэлж, дэвшилд хүрэх нь
3. Бурхны хүсэл тааллыг биелүүлэхийн тулд ямар үндсэн алхам хийдэг вэ?
3 Жинхэнэ христианууд Бурхны хүсэл тааллыг насан туршдаа биелүүлэх зорилготой. Энэ зорилгодоо хүрэхийн тулд Библийг өдөр бүр унших, Теократ үйлчлэлийн сургуульд орох, дэлгэрүүлэх ажилд оролцох, баптисм хүртэх гэх зэргийн үндсэн алхам хийдэг. Бид амжилт гаргахын хэрээр элч Паулын: «Ахиц дэвшил чинь бүгдэд илэрхий болохын тулд эдгээрт санаа тавь» хэмээсэн зөвлөгөөг хэрэгжүүлэхийг хичээдэг (1 Тимот 4:15). Паулын бичсэнээр ахиц дэвшил гаргах гэдэг нь биеэ дөвийлгөж байгаа хэрэг биш, харин Бурхны хүсэл тааллыг чин сэтгэлээсээ биелүүлэхийг мэрийж байгаа явдал юм. Үүгээрээ бид амьдралынхаа бүх хүрээнд Бурхнаар удирдуулахыг хүсдэгээ харуулдаг. Гагцхүү Бурхан биднийг хэнээс ч илүү удирдаж чадна (Дуулал 32:8).
4. Хэт их санаа зовохгүйн тулд яах хэрэгтэй вэ?
4 Гэхдээ Бурханд үйлчилж, ахиц дэвшил гаргахад өөртөө хэт итгэлгүй байх юм уу хэт их санаа зовох нь саад болдог (Номлогчийн үгс 11:4). Тиймээс, Бурханд болон бусдад үйлчлэхийн баяр хөөрийг үзэхийн тулд юуны түрүүнд санаа зовохоо болих хэрэгтэй. Жишээ нь, Эрик гэдэг христиан гадаад хэлний хуралд үйлчлэхийг бодож байсан боловч «Би ер нь чадах уу? Тэр хурлынхантай таарах болов уу? Намайг тоох юм болов уу?» гэж санаа зовж байжээ. Гэхдээ тэрбээр: «Би өөрийгөө биш, итгэл нэгтнүүдээ илүү бодох хэрэгтэй юм байна гэдгийг ухаараад, санаа зовохоо больсон. Тэгээд юу чадахыгаа л хийе гэж шийдсэн юм. Еховад залбирч, тусламж гуйж байгаад тэр хуралд шилжсэн. Одоо энэ хуралдаа их баяр хөөртэй үйлчилж байна» гэж хэлжээ (Ром 4:20). Тийм ээ, өөрийгөө бодохын оронд Бурханд болон бусдад чин сэтгэлээсээ үйлчилбэл баяр хөөр эдэлж, сэтгэл өндөр болдог.
5. Бурхны санаа зорилгыг биелүүлэхийн тулд яагаад ухаалаг байх хэрэгтэй вэ? Жишээ хэлнэ үү.
5 Бурхны санаа зорилгыг амжилттай биелүүлэхийн тулд алсыг харж, ухаалаг амьдрах нь чухал. Өр ширэнд баригдвал Бурханд чөлөөтэй үйлчлэх боломжоо алдаж, ертөнцийн боол болох аюултай тул болгоомжлох хэрэгтэй. Библи: «Өртөн зээлдүүлэгчийнхээ зарц болдог» гэж сэрэмжлүүлдэг (Сургаалт үгс 22:7). Еховад найдаж, сүнслэг зүйлийг эн тэргүүнд тавих нь ухаалаг байхад тус болдог. Нэг жишээ үзье. Гуомин гэдэг Гэрч эрэгтэй, ээж эгч дүү гуравтайгаа хамт амьдардаг ажээ. Тэдний нутагт орон сууцанд суухад их үнэтэй бөгөөд байнгын ажил олддоггүй гэнэ. Гэхдээ тэд мөнгөө ухаалаг зарцуулж, гарсан зардлыг хувааж төлдөг учир хэн нэг нь ажилгүй болсон ч амьдралаа залгуулж чаддаг байна. Гуомин: «Заримдаа нэг хоёр хүний цалингаар амьдрах үе байдаг ч бид гурав эхлэгчээр үйлчлэнгээ ээжийгээ асарч чаддаг. Ээж маань биднээс их юм нэхэж, сүнслэг үйл хэргээ орхихыг шаарддаггүйд нь бид их баярладаг» гэж ярьжээ (2 Коринт 12:14; Еврей 13:5).
6. Амьдралаа Бурхны санаа зорилгод нийцүүлж чадсан хүний жишээг хэлнэ үү.
6 Мөнгө төгрөг гэх мэтийн сүнслэг бус бусад зүйлээр хөөцөлддөг хүнд Бурхны санаа зорилгыг эн тэргүүнд тавихын тулд амьдралаа ихээхэн өөрчлөх шаардлага гардаг. Үүний тулд цаг хугацаа хэрэгтэй. Бас анхны оролдлогоор л бүтчих хэрэг биш гэдгийг ухаарах хэрэгтэй. Тоглоом наадамд хамаг цагаа зориулдаг байсан Койчигийн жишээг ярилцъя. Тэрбээр арван хэдтэй байхдаа Библийн хичээл хийдэг байсан боловч видео тоглоом тоглох зуршилдаа олон жил дийлдэж явжээ. Нэгэн өдөр тэрбээр: «Би ер нь юу л хийж явна даа? Нас 30 гарчихлаа. Гэтэл амьдралдаа хийсэн утга учиртай юм ганц ч алга!» гэж боджээ. Тэгээд Еховагийн Гэрчүүдээр дахин Библийн хичээл заалгадаг болж, сүнслэг тусламж авчээ. Өөрчлөгдөхөд их амаргүй байсан боловч шантраагүй аж. Еховад шаргуу залбирч, Гэрчүүдийн дэмжлэгтэйгээр муу зуршлаа хаяж чаджээ (Лук 11:9). Одоо Койчи туслах үйлчлэгч болжээ.
Дүн нуруутай байж сурах нь
7. Бурхны даалгасан ажлыг биелүүлэхдээ дүн нуруутай байхын учир юу вэ?
7 Бурхны санаа зорилгыг биелүүлье гэвэл биеийн амрыг харж, залхуу хойрго байлгүй чин сэтгэлийн хүчин чармайлт гаргах ёстой (Еврей 6:11, 12). Гэхдээ Бурханд үйлчилнэ гэдэг туйлдталаа зүтгэж, бие сэтгэлээ зовооно гэсэн үг биш ээ. Бурхны даалгасан ажлыг хүн дан ганц өөрийн хүчээр гүйцэтгэж чадахгүй гэдгийг даруухнаар хүлээн зөвшөөрөх нь Бурхныг алдаршуулж, дүн нуруутайгаа харуулж байгаа хэрэг (1 Петр 4:11). Ехова үйлчлэгчдэдээ хүч өгөхөө амласан. Гэхдээ бид даалгаснаас нь ихийг хийх гэж тамир тэнхээгээ барах шаардлагагүй (2 Коринт 4:7). Бурхандаа эцэж цуцалгүй, тасралтгүй үйлчлэхийн тулд хүч чадлаа зөв зарцуулах учиртай.
8. Нэг залуу Гэрч эмэгтэй Еховад их үйлчилж, ертөнцөд амжилт гаргах гэж оролдоод яасан бэ? Амьдралаа яаж өөрчилсөн бэ?
8 Азид амьдардаг Жи Хи гэдэг Гэрч бүсгүй хариуцлага өндөртэй, ачаалал ихтэй ажил хийнгээ байнгын эхлэгчээр үйлчлэн хоёр жил явжээ. Тэрбээр: «Би Еховад их үйлчлэхийг ч, ертөнцөд амжилт гаргахыг ч хичээж байсан. Гэхдээ сайн амрах завгүй, тавхан цаг унтдаг байлаа. Яваандаа би сүнслэг зүйлийг бодох ч тэнхэлгүй, баяр хөөргүй болсон» гэж ярьсан юм. Еховад «бүх зүрх, бүх сэтгэл, бүх оюун ухаан, бүх хүчээрээ» үйлчлэхийн тулд Жи Хи арай хөнгөн ажилд оржээ (Марк 12:30). «Манай гэрийнхэн өндөр цалинтай ажил хийхийг надаас шаардаж байсан ч би Бурхны санаа зорилгыг амьдралынхаа эн тэргүүнд тавихаар шийдсэн. Би одоогийнхоо цалингаар идэж уух, өмсөж зүүх хэрэгцээгээ хангаж болоод л байна. Үнэнийг хэлэхэд, одоо сайн унтаж амждаг болсон шүү! Баяр хөөртэй дэлгэрүүлж, Еховатай илүү дотно харьцаатай болсон. Энэ бүхэн бол ертөнцөд сэтгэл татагдаж, анхаарлаа сарниулахаа больсны ач юм» гэж туршлагаасаа хуваалцжээ (Номлогчийн үгс 4:6; Матай 6:24, 28–30).
9. Дэлгэрүүлэх ажилд хүчин чармайлт гаргавал ямар үр дүнд хүрч болох вэ?
9 Бүх хүн бүрэн цагаар үйлчилж чадахгүй нь ойлгомжтой. Хэрэв та нас өндөр юм уу бие муутайн улмаас, эсвэл өөр бусад шалтгаанаар бүрэн цагаар үйлчлэх аргагүй бол Ехова үнэнч байдал, чин сэтгэлийн үйлчлэлийг өндөр үнэлдгийг санаж яваарай (Лук 21:2, 3). Их дэлгэрүүлж чадахгүй байлаа ч, чамлахааргүй үр дүнд хүрч болдог. Жишээ нь, цөөн хэдэн айлаар явтал сонирхсон хүн ганц ч тааралдаагүй юм шиг санагдаж болох юм. Гэхдээ биднийг явсны дараа тэр хүмүүс, тэр байтугай, үүдээ тайлаагүй хүмүүс ч гэрийнхэнтэйгээ бидний тухай нэг бус удаа ярилцаж болох шүү дээ. Сайн мэдээг бүгдээрээ биш ч, зарим нь хүлээж авна гэдгийг бид мэддэг (Матай 13:19–23). Түүнчлэн, нийгмийн юм уу хувийнх нь амьдралд өөрчлөлт гарахад хүмүүс сайн мэдээг хүлээн авч болох юм. Ямар ч байсан, дэлгэрүүлэх ажлын төлөө чадах бүхнээ хийдэг бол Бурхны хүсэл тааллыг биелүүлж байна гэсэн үг. Бид «Бурхны хамтран зүтгэгчид» билээ (1 Коринт 3:9).
10. Бүх христианд ямар боломж байдаг вэ?
10 Түүнээс гадна, гэрийнхэн болон итгэл нэгтнүүддээ сайн үйл хийх боломж бид бүгдэд бий (Галат 6:10). Заримдаа христиан хүн үлгэр жишээгээрээ бусдад мартагдашгүй сэтгэл төрүүлж, амьдралд нь ихээхэн нөлөөлдөг (Номлогчийн үгс 11:1, 6). Ахлагч болон туслах үйлчлэгчид хуралд хүлээдэг үүргээ хичээнгүйлэн биелүүлдэг бол хурлын сүнслэг байдал сайн, тогтвортой байдгийн зэрэгцээ христиан үйл хэрэг өргөждөг. «Эзний үйл хэрэгт үргэлж бялхдаг» хүмүүсийн хөдөлмөрийг Бурхан «хоосон зүйл биш» гэж үзэхээ амласан билээ (1 Коринт 15:58).
Бурхны санаа зорилгыг биелүүлэхийг амьдралын гол зорилго болгох нь
11. Үйлчлэлээ өргөжүүлэх ямар ямар боломж байдаг вэ?
11 Христианууд бид амьд яваадаа баярладаг бөгөөд бүх үйлсээрээ Бурхныг алдаршуулахыг хичээдэг (1 Коринт 10:31). Хаанчлалын тухай сайн мэдээ дэлгэрүүлж, Есүсийн тушаасан бүгдийг сахин биелүүлэхийг заах ажилд үнэнчээр оролцдог хүнд үйлчлэлээ өргөжүүлэх олон сайхан боломж бий (Матай 24:14; 28:19, 20). Тухайлбал, дэлгэрүүлэгч хэрэгцээтэй хэсэг, гадаад хэлний хурал, бүр өөр улсад үйлчлэх боломж байдаг. Ганц бие ахлагч, туслах үйлчлэгчдэд Үйлчлэл дээшлүүлэх сургуульд суралцаж, улмаар нутагтаа юм уу гадаадад туршлагатай христиан хэрэгцээтэй газар үйлчлэх завшаан олддог. Бүрэн цагаар үйлчилдэг гэр бүлийн хосууд Гилеад сургуульд суралцаад, гадаадад үйлчлэх боломжтой. Бас Бетелд үйлчлэх, мөн цуглаан, чуулганы танхим, салбарын барилга барих болон засах ажилд хүн хүч үргэлж хэрэгтэй байдаг.
12, 13. а) Үйлчлэлээ өргөжүүлэх шийдвэр гаргахдаа яах нь зүйтэй вэ? б) Нэг даалгавар биелүүлж байтал өөр даалгавар биелүүлэх ямар боломж гардгийг жишээгээр хэлнэ үү.
12 Таны хувьд үйлчлэлээ өргөжүүлэх ямар боломж байна вэ? Бурханд өөрийгөө зориулсан христиан хүн Бурхандаа найдаж, байгууллагаас нь удирдамж заавар авах нь зүйтэй. Еховагийн ариун сүнсээр удирдуулбал ухаалаг шийдвэр гаргаж чадна (Нехемиа 9:20). Еховагаас авсан нэг даалгаврыг биелүүлж байтал өөр даалгавар биелүүлэх боломж цөөнгүй гардаг бөгөөд урьд нь олж авсан туршлага чадвар дараагийн ажилд хэрэг болж болох юм.
13 Деннис Женни хоёрын жишээг ярилцъя. Тэд Хаанчлалын танхим барих ажилд тогтмол идэвхтэй оролцдог байжээ. АНУ-ын өмнөд хэсэгт Катрина гэдэг хар салхи дэгдэж, их хэмжээний хохирол учрахад тэд тусламжийн ажилд сайн дураараа оролцжээ. Деннис: «Гамшигт нэрвэгдсэн итгэл нэгтнүүддээ туслахад барилгын ажлын туршлага маань их хэрэг болсон юм. Биднийг тусалсанд хүмүүс их баярлаж талархсан, бид ч баяртай байсан. Тусламжийн ажилд оролцсон бусад хүмүүс барилгын ажлыг төдийлөн сайн хийж чадаагүй. Харин Еховагийн Гэрчүүд 5300 гаруй айлын гэр, бас олон танхимыг сэргээн засаж, шинээр барьсан юм. Үүнийг ажигласан хүмүүс биднийг дэлгэрүүлэхэд сонирхдог болсон шүү» гэж ярьжээ.
14. Бүрэн цагаар үйлчилье гэвэл яах хэрэгтэй вэ?
14 Тэгвэл танд бүрэн цагаар үйлчлэх боломж бий юү? Ийм боломжийг алдалгүй ашиглавал их ивээл хүртэнэ. Гэхдээ тийм боломж хараахан гараагүй бол амьдрал ахуйгаа өөрчлөхийг оролдоод үзвэл ямар вэ? Бурхны эртний үйлчлэгч Нехемиаг дуурайн, эхлээд Еховад залбираарай. Тэрбээр нэг чухал даалгавар биелүүлэхийг хүсэж байсан учир: «Эзэн минь, би Танаас гуйж байна. [...] ...Зарцдаа... амжилт... хайрла» гэж залбирсан билээ (Нехемиа 1:11). Дараа нь, «Залбирлыг сонсдог Нэгэнд» найдан, төлөвлөсөн зүйлээ ажил хэрэг болгохыг хичээгээрэй (Дуулал 65:2). Үйлчлэлээ өргөжүүлж, Еховагаас ивээл хүртье гэвэл бид эхлээд өөрсдөө санаачилга гаргах учиртай. Бүрэн цагаар үйлчлэхээр нэгэнт шийдсэн бол тэр шийдвэрээсээ бүү ухраарай. Яваандаа та туршлага сууж, илүү баяр хөөртэй болно.
Жинхэнэ ёсоор утга учиртай амьдрах нь
15. а) Бурханд олон жил үйлчилсэн хүмүүстэй ярилцах, тэдний намтрыг унших нь ямар ач тустай вэ? б) Боломжтой бол, танд хамгийн их урам хайрласан өгүүллийг товч ярина уу.
15 Бурхны санаа зорилгыг биелүүлбэл ямар үр дүнд хүрэх вэ? Еховад олон жил, ялангуяа бүрэн цагаар үйлчилсэн хүмүүстэй ярилцаж үзээрэй. Тийм хүмүүс үнэхээр утга учиртай амьдарч, Еховагаас их «ерөөл» буюу ивээл хүртдэгийг та мэдэх болно (Сургаалт үгс 10:22). Зовж зүдрэх цагт нь Ехова тэднийг юугаар ч дутаалгүй, бүр илүүг өгдөг байсныг тэд ярих биз ээ (Филиппой 4:11–13). Өнгөрсөн хугацаанд «Харуулын цамхаг» сэтгүүлд олон үнэнч христианы намтрыг нийтэлсэн билээ. Эдгээрээс Библийн «Үйлс» номд гардаг христиануудынх шиг идэвх зүтгэл, баяр хөөрийн жишээг харж болно. Та ийм сэтгэл хөдөлгөм намтар уншаад, «Ингэж л амьдрах хэрэгтэй юм байна!» гэж лав хэлэх байх.
16. Христиан хүн юуны ачаар аз жаргалтай, утга учиртай амьдардаг вэ?
16 Өгүүллийн эхэнд гарсан Аарон: «Би Африкт байхдаа амьдралын утга учрыг хайж явсан олон залуутай тааралдаж байсан. Ихэнх нь зорилгодоо хүрээгүй. Харин Хаанчлалын тухай сайн мэдээ дэлгэрүүлэн, Бурхны санаа зорилгыг биелүүлдэг хүн утга учиртай амьдарч, „Авахаасаа өгөх нь илүү ерөөлтэй“ гэдэг үгийн үнэнийг ойлгодог гэдгийг би биеэрээ үзсэн» гэж дурсжээ (Үйлс 20:35).
17. Бурхны санаа зорилгыг одоо биелүүлж байх ёстойн учир юу вэ?
17 Тэгвэл таны амьдралын зорилго юу вэ? Сүнслэг тодорхой зорилгогүй хүн өөр бусад юманд амархан татагдах аюултай. Сатаны хуурамч ертөнцөд хайран сайхан амьдралаа дэмий үрэх ямар хэрэгтэй юм бэ? Тун удахгүй болох «агуу их гай гамшгийн» үед эд баялаг, нэр хүнд ямар ч тус болохгүй. Харин Ехова Бурхантай тогтоосон харьцаа л хамгийн чухал нь байх юм. Өнөөдөр Бурхны санаа зорилгыг амьдралынхаа эн тэргүүнд тавин, Бурханд болон бусдад үйлчилж байгаа хүмүүс тэр цагт ямар их баярлах бол оо! (Матай 24:21; Илчлэлт 7:14, 15).
[Зүүлт]
a Энэ өгүүлэлд гарах зарим хүний нэрийг өөрчлөв.
Тайлбарлана уу
• Ехова үйлчлэгчдэдээ хэрхэн ханддаг вэ?
• Ухаалаг, дүн нуруутай байх нь Бурханд болон бусдад үйлчлэхэд ямар тустай вэ?
• Үйлчлэлээ өргөжүүлэх ямар ямар боломж байдаг вэ?
• Одоо ч утга учиртай амьдрахын тулд яах хэрэгтэй вэ?