Ехова таныг анхаарч халамжилдагт талархдаг уу?

1, 2. Хяналтын камерыг яагаад тавьдаг вэ? Ехова биднийг яагаад ажиглан хардаг вэ?

ЗАМЫН хөдөлгөөнийг хянах, осол аваарыг бичиж авах зорилгоор камер байршуулах нь олон оронд түгээмэл болжээ. Зөрчил гаргаад хэргийн газраас зугтсан жолоочийг цагдаа нар камерын тусламжтайгаар олж илрүүлэн баривчилдаг. Ийнхүү хаа сайгүй камер тавьж байгаа учир гэмт хэрэгтнүүд зугтах бараг боломжгүй болж байна.

² «ЭЗЭНий мэлмий хаа ч байдаг» хэмээн Библид бичжээ (Сур. 15:3). Ехова нүд салгалгүй хардаг гэхлээр хуулийг нь зөрчих нь үү, үгүй юү гээд анаж байдаг гэсэн үг үү? Эсвэл алдаа гаргамагц шийтгэх гээд хүлээж байдаг хэрэг үү? Яалаа гэж дээ! (Иер. 16:17; Евр. 4:13). Харин ч биднийг хайрладаг, сайн сайхан амьдруулахыг хүсдэг учраас ажиглан харж байдаг (1 Петр 3:12).

3. Бурхан биднийг хэрхэн анхаарч халамжилдаг вэ?

³ Бурхан биднийг нүд салгалгүй ширтэж байдаг нь хайрын илрэл юм. Үүнийг сайн ойлгохын тулд хэрхэн анхаарч халамжилдгийг нь авч үзье. Ехова биднийг 1) буруу юм хийхээс урьтаж сэрэмжлүүлдэг, 2) алдаа гаргахад засдаг, 3) Библийн зарчмаар удирддаг, 4) зовлон бэрхшээлтэй үед тусалдаг, 5) зөв юм хийхэд ивээдэг.

ЕХОВА СЭРЭМЖЛҮҮЛДЭГ

4. Ехова Каиныг нүгэл үйлдэхээс нь өмнө яагаад сэрэмжлүүлсэн бэ?

⁴ Эхлээд, Ехова биднийг буруу юм хийхээс урьтаж хэрхэн сэрэмжлүүлдгийг авч үзье (Ш.дээд 28:9). Жишээ нь, Каинд тохиолдсон явдлыг ярилцъя. Бурхан өөрийг нь сайшаагаагүйд Каин «ихэд уурласан» (Эхлэл 4:3–7-г уншина уу). Тэгэхэд нь «сайныг үйлдэхгүй» бол «гэм нүгэл үүдэн дээр чинь гэтэж байна» гэж Ехова сэрэмжлүүлээд «Чи түүнийг дийлэх ёстой» хэмээн айлджээ. Каиныг «тэргүүнээ өргөөсэй» гэж хүссэн аж. Хэрэв Каин энэ сэрэмжлүүлгийг анхаарсан бол «тэргүүнээ өргөх» буюу Бурхантай сайн харьцаатай байх байсан.

5. Ехова биднийг хэрхэн сэрэмжлүүлдэг вэ?

⁵ Ехова бидэнд ч сэрэмжлүүлэг өгдөг. Бидний зүрх сэтгэлийг нэвт шувт хардаг учраас бодол санаа, хүсэл эрмэлзлийг маань сайн мэддэг. Тиймд Бурхнаас юу ч нуух аргагүй. Ехова бидэнд хайртай учраас зөв юм хийгээсэй гэж хүсдэг. Гэхдээ албаддаггүй. Буруу юм хийх гээд байвал Библиэр дамжуулан сэрэмжлүүлдэг. Чухам яаж? Библийг өдөр бүр уншвал буруу хандлагаа ялан дийлж, зөв сэдэлтэй болоход тустай санаа олдог. Түүнээс гадна, тулгарч буй бэрхшээлээ даван туулах аргыг Библид үндэслэсэн ном хэвлэлийн тусламжтайгаар мэдэж авдаг. Бас цуглаан дээр цагаа олсон зөвлөгөө сонсдог.

6, 7. а) Еховагийн өгдөг зөвлөгөө олон сая хүнд зориулагддаг ч, ялангуяа танд онцгой ач холбогдолтой гэхийн учир юу вэ? б) Бурхны сэрэмжлүүлгийг анхаарч ач тусыг нь хүртье гэвэл яах хэрэгтэй вэ?

⁶ Ехова хүн нэг бүрийг хайрлаж, анхаарч халамжилдаг учраас сэрэмжлүүлдэг. Библи болон Библид үндэслэсэн ном хэвлэл, цуглаанаар өгдөг заавар зөвлөгөө олон сая хүнд зориулагддаг нь үнэн. Хэдий тийм боловч Ехова таныг Библид байдаг сэрэмжлүүлгийг өөртөө тусгаж аваасай гэж хүсдэг. Тэгдэг бол та буруу хандлагаа ялна. Ехова танд үнэхээр санаа тавьдгийн баталгаа биш гэж үү?

⁷ Бурхны сэрэмжлүүлгийг анхаарч ач тусыг нь хүртье гэвэл яах хэрэгтэй вэ? Бурхан бидэнд үнэхээр санаа тавьдагт юуны түрүүнд итгэх хэрэгтэй. Дараа нь Библийн зарчмыг дагаж, Бурханд таалагдахгүй бодлыг оюун санаанаасаа таягдан хаяхыг хичээгээрэй (Исаиа 55:6, 7-г уншина уу). Бурхны өгдөг сэрэмжлүүлгийг анхаардаг бол олон зовлонг тойрч гарна. Гэтэл сэрэмжлүүлгийг нь тоолгүй буруу хандлагадаа автчихжээ гэж бодъё. Ийм үед Бурхан яаж туслах бол?

ХАЛАМЖИТ ЭЦЭГ МААНЬ ЗАСДАГ

8, 9. Итгэл нэгтэндээ зэмлүүлбэл Ехова намайг хайрлан халамжилж байна гэж бодох хэрэгтэйн учир юу вэ? Жишээ хэлнэ үү.

⁸ Алдаа дутагдлыг маань засах үед Еховагийн хайр халамжийг онцгой их мэдэрдэг (Еврей 12:5, 6-г уншина уу). Хүн алдаагаа хэлүүлэх юм уу зэмлүүлэхлээрээ баярладаггүй нь үнэн (Евр. 12:11). Гэхдээ зэмлэж буй хүн таны алдааг засахын тулд ямар ямар алхам хийснийг бодоорой. Таны хийж байгаа зүйл Ехова Бурхантай тогтоосон харьцаанд хэр аюултайг магадалсан. Сэтгэлийг тань шархлуулах байх гэдгийг ч бодолцсон. Бас алдаагаа засахад тань тус болох зөвлөгөөг Библиэс үзүүлэхийн тулд цаг зав, хүч хөдөлмөрөө зориулсан. Үнэн хэрэгтээ таны алдааг Ехова засах гэж байгаа учир дуулгавартай байх нь ухаалаг юм.

⁹ Ехова Бурхан үйлчлэгчдээрээ дамжуулан засаж залруулдаг. Үүнийг харуулах нэгэн явдлыг авч үзье. Порно үздэг байсан нэг эрэгтэй үнэнийг мэдээд муу зуршлаа хаяжээ. Гэхдээ гал цогшиж үлддэгийн адил хуучин хандлага нь бүрмөсөн арилсангүй. Шинэ гар утастай болсныхоо дараа хуучин зуршилдаа дийлджээ (Иак. 1:14, 15). Гар утсаараа интернетэд орж порно үздэг болсон байна. Нэг удаа ахлагчид утсаа түр өгтөл, үзэж байсан порно сайт дэлгэцэн дээр нь гараад ирэх нь тэр. Ахлагч өнөөх эрэгтэйд шууд л туслахаар шийдэж, зөвлөгөө өгчээ. Энэ нь түүний хувьд үнэхээр цагаа олсон хэрэг байлаа. Тэрбээр зөвлөгөөг дуртайяа хүлээн авч, хорт зуршлаа хаяж чадсан байна. Ехова бидний нууцаар үйлддэг нүглийг ч харж, өөртэй нь тогтоосон харьцаагаа сэвтүүлэхээс маань өмнө засдагт талархаад баршгүй!

БИБЛИЙН ЗАРЧМЫГ ДАГАХЫН АЧ ТУС

10, 11. а) Бурхныг «таньж мэдэхийн» тулд яах хэрэгтэй вэ? б) Библийн зарчмыг дагахын ач тусыг нэг гэр бүл хэрхэн үзсэн бэ?

¹⁰ Дуулалч: «Та намайг Өөрийн зөвлөгөөгөөр удирдана» хэмээн дуулжээ (Дуу. 73:24). Зөвлөгөө хэрэг болсон үед тухайн асуудлыг Бурхан юу гэж үздэгийг Библиэс судалбал түүнийг «таньж мэднэ». Библийн зарчмыг дагадаг бол сүнслэг хэрэгцээгээ төдийгүй материаллаг хэрэгцээгээ хангаж чадна (Сур. 3:6).

¹¹ Филиппиний хөдөө нутагт амьдардаг нэгэн гэр бүлд тохиолдсон явдлыг авч үзье. Тэднийх түрээсийн газартаа тариалангийн аж ахуй эрхэлдэг аж. Нөхөр эхнэр хоёр олон хүүхэд тэжээхийн зэрэгцээ байнгын эхлэгчээр үйлчилдэг. Нэг өдөр газар чөлөөлж өгөхийг хүссэн мэдэгдэл газрын эзнээсээ аваад ихэд цочирджээ. Хүмүүс тэднийг үнэнч шударга биш гэж гүтгэсэн юм байж. Гэрч эрэгтэй гэр бүлээ аваад хаана очиж амьдрахаа мэдэхгүй санаа зовж байсан ч «Ехова өгнө өө. Юу ч болж байсан, хэрэгцээг маань үргэлж хангадаг» гэж хэлжээ. Түүний зөв байлаа. Удалгүй тэднийх нүүх шаардлагагүй болсноо мэдээд тайвширчээ. Чухам юу болсон юм бол? Тэднийхэн гүтгүүлсэн ч Библийн зарчмыг баримталж, хүндэтгэлтэй, сайхан харьцаж байсан учраас газрын эзний сэтгэл ихэд хөдөлж, бодлоо өөрчлөөд зогсохгүй газар нэмж өгөхөөр болжээ (1 Петр 2:12-ыг уншина уу). Хүнд хэцүү үед ч Библийн зарчмыг дагадаг бол Ехова биднийг удирдан чиглүүлдгийг энэ явдал харуулж байна.

БЭРХШЭЭЛИЙГ ДАВАХАД ТУСАЛДАГ АНД НАЙЗ

12, 13. Бурхан үнэхээр санаа тавьдагт ямар үед эргэлзэж мэдэх вэ?

¹² Еховагийн үйлчлэгчдэд янз бүрийн зовлон бэрхшээл тулгардаг. Зарим бэрхшээл хурдан арилахгүй байж болох юм. Архаг өвчнөөс болж шаналах, ойр дотныхныхоо эсэргүүцлийг тэвчих, байнгын хавчлага дарамтад байх зэрэг нь үнэхээр бэрх. Гэхдээ зан чанараасаа болоод итгэл нэгтэнтэйгээ таарамжгүй байх нь бүр ч хэцүү.

¹³ Та итгэл нэгтнийхээ хэлсэн үгэнд гомджээ гэж бодъё. «Бурхны байгууллагад ийм юм байх ёсгүй!» гэж хэлэх байх. Гэтэл таныг гомдоосон хүн хуралд хариуцлагатай үүрэг хүлээдэг болжээ. Хүмүүс ч түүний талаар ам сайтай байдаг. «Яаж ийм юм болдог байна аа? Ехова харахгүй байна гэж үү? Ямар нэг юм хийхгүй юм байх даа?» гэж бодогдож мэднэ (Дуу. 13:1, 2; Хаб. 1:2, 3).

14. Ехова бидэнд шууд туслахгүй байгаа нь ямар шалтгаантай байж болох вэ?

¹⁴ Ехова бидний мэдэхгүй юмыг мэддэг. Тийм учраас шууд туслахгүй байх хүндтэй шалтгаан байдаг гэсэн үг. Жишээ нь, та нөгөө хүнээ илүү буруутай гэж бодож байхад Ехова таныг буруутай гэж үзэж болох юм. Таны сэтгэлийг шархлуулсан хатуу үг үнэн хэрэгтээ нэгийг бодуулах чухал зөвлөгөө байж болох шүү дээ. Удирдах Зөвлөлийн гишүүн байсан Карл Клайн нэг удаа Рутерфорд ахаас зэмлэл хүлээснээ намтартаа бичжээ. Рутерфорд ах дараа нь Клайн ахтай тааралдаад инээмсэглэн «Сайн уу, Карл аа?» гэж мэндэлжээ. Гэтэл Клайн ах дуртай дургүй хариу мэндлэв. Гомдол нь тайлагдаагүйг анзаарсан Рутерфорд ах: «Сэрэмжтэй байгаарай. Диавол чамайг отож байна шүү» гэжээ. Клайн ах цааш нь бичихдээ «Хэлж зөвлөх эрхтэй хүнд зэмлүүлсэндээ дургүйцэн муу санаад байвал Диаволд өөрийгөө бариад өгч байна гэсэн үг» гэжээ.a

15. Бэрхшээл тулгарсан үед юу санавал тэвчээр алдахгүй вэ?

¹⁵ Бидэнд тулгарсан бэрхшээл хэзээ ч шийдэгдэхгүй юм шиг санагдаад тэвчээр барагдаж мэдэх юм. Тийм үед яах хэрэгтэй вэ? Жишээ авъя. Та машин барьж яваад замын түгжрээнд орчихжээ. Хэр удаан зогсохоо мэдэхгүй байлаа. Хэрэв тэвчээр алдаад сайн мэдэхгүй замаараа тойрч явбал төөрсөөр байгаад зорьсон газраа нэлээд хоцорч очих байх. Харин түгжрээ арилахыг тэвчээртэй хүлээвэл хамаагүй хурдан хүрэх биз ээ. Үүнтэй адилаар, Библийн зарчмыг тууштай баримтлаад байвал Еховагийн сайшаалыг хүлээнэ, ирээдүйд мөнх амьдарна.

16. Бэрхшээл тулгарсан үед Ехова хэсэг хугацаанд туслахгүй байх өөр ямар шалтгаан байж болох вэ?

¹⁶ Ехова биднийг сургах гэсэндээ хэсэг хугацаанд туслахгүй байж болох юм (1 Петр 5:6–10-ыг уншина уу). Сорилт бэрхшээлийг Бурхан учруулдаг гэж бодож хэрхэвч болохгүй (Иак. 1:13). Ихэнх зовлонг «өрсөлдөгч болох диавол» учруулдаг. Ехова биднийг сүнслэгээр өсгөхийн тулд тэдгээр зовлонг сайнаар эргүүлдэг. Тэрбээр хэрхэн зовж байгааг маань хардаг. Бидэнд «санаа тавьдаг учраас» энэ бүх зовлонг «түр зуур» л байлгадаг. Бэрхшээл тулгарсан үед гарах замыг Ехова зааж өгнө гэдэгт та итгэдэг үү? Анхаарч халамжилдагт нь талархдаг уу? (2 Кор. 4:7–9).

ЕХОВАГИЙН ИВЭЭЛ

17. Ехова ямар учраас бүх хүний зүрхийг шалгадаг вэ?

¹⁷ Ехова өөрийг нь үнэхээр хайрладаг хүнийг олохын тулд бүх хүний зүрхийг шалгадаг. Тэрбээр Аса хаанд «Өөрт нь бүрэн зориулсан зүрх сэтгэлтэй хүмүүст хүчтэй дэмжлэг болохоор ЭЗЭНий мэлмий дэлхий даяар хойш урагшаа хэрэн явдаг юм» гэж зөнч Хананигаар хэлүүлжээ (Ш.дэд 16:9). Харамсалтай нь Аса Еховад зүрхээ бүрэн зориулаагүй. Харин таныг зөв юм хийгээд байвал Бурхан «хүчтэй дэмжлэг» үзүүлэх нь дамжиггүй.

18. Бид сайн юм хийдэг бол Еховагийн ивээлийг хүртэнэ гэдэгтээ яагаад итгэлтэй байж болох вэ? (Өгүүллийн эхний зургийг үзнэ үү).

¹⁸ Бурхан бидэнд «нигүүлсэнгүй хандахыг» буюу ивээлээ хайрлахыг хүсдэг. Ивээлийг нь хүртье гэвэл «сайныг хайж», «сайныг хайрлаж», «сайныг үйлдэх» хэрэгтэй (Ам. 5:14, 15; 1 Петр 3:11, 12). Еховагийн «мэлмий зөв шударга хүн уруу чиглэсэн байдаг» бөгөөд сайн үйл хийхэд нь ивээдэг (Дуу. 34:15). Еврей эх баригч Шифра Пуа нарыг жишээ болгон авъя. Израильчуудыг Египетийн дарлалд байхад энэ хоёр эмэгтэй фараоноос бус, Еховагаас эмээсэн юм. Эр хүйстэй еврей хүүхэд бүрийг төрмөгц нь ал гэсэн фараоны тушаалыг зөрчин хөвгүүдийг амьд үлдээжээ. Хожим нь Бурхан тэр хоёрыг ивээж, «гэр бүл бий болгон» өгсөн (Ег. 1:15–17, 20, 21). Бидний хийсэн сайн үйлсийг хэн ч тоохгүй байгаа юм шиг санагдах үе байж болох юм. Харин Ехова бүгдийг харж байдаг. Тиймээс бидэнд «буцааж төлнө» (Мат. 6:4, 6; 1 Тим. 5:25; Евр. 6:10).

19. Сайн үйлсийг маань Ехова ажиглаж байдгийг харуулах явдлыг ярина уу.

¹⁹ Хичээл зүтгэл гаргадаг хүнийг Бурхан харж байдгийг Австрид амьдардаг Гэрч эмэгтэй биеэрээ үзжээ. Унгар гаралтай тэрбээр унгар хэлтэй хүний хаяг хүлээж авсан байна. Хаягийн дагуу шууд яваад очтол хэн ч байсангүй. Гэсэн ч дахин дахин очсоор жил хагас өнгөрчээ. Заримдаа хүн байгаа юм шиг санагддаг байв. Гэхдээ хаалга тайлж өгдөггүй байлаа. Тэрбээр очих болгондоо захиа бичиж, холбоо барих хаягаа ном хэвлэлийн хамт орхидог байжээ. Нэг өдөр нөгөө айлдаа очтол хаалгаа тайлж өгөх нь тэр! Уриалагхан зантай нэг эмэгтэй мэндлээд «Ор, ор. Би авчирсан бүх номыг чинь уншчихаад, чамайг хүлээж байлаа» гэв. Тэр эмэгтэй химийн эмчилгээ хийлгэж байсан болохоор хүмүүстэй уулзахыг хүсдэггүй байсан гэнэ. Ингээд Библийн хичээл эхэлжээ. Гэрч эмэгтэй уйгагүй байсныхаа ачаар Еховагийн ивээлийг хүртсэн нь энэ аж.

20. Ехова таныг анхаарч халамжилдаг гэхлээр танд ямар сэтгэгдэл төрж байна вэ?

²⁰ Биднийг юу ч хийсэн Ехова харж байдаг бөгөөд хүн бүрийн зүрхийг шалгадгийг энэ өгүүллээр үзлээ. Гэхдээ хяналтын камер шиг алдаа зөрчил илрүүлэх гэж нүд салгалгүй ширтдэг юм биш ээ. Харин ч бидэнд санаа тавьж, тусалж дэмжин, ивээхийн тулд ажиглаж байдаг. Тиймд Ехова Бурхантайгаа улам дотно болцгооё!