Цусны жижиг хэсгүүд ба цус хэрэглэдэг эмчилгээний аргууд

Цусны жижиг хэсгүүд. Цусны жижиг хэсгүүдийг цусны үндсэн дөрвөн хэсэг буюу улаан эс, цагаан эс, ялтас, сийвэнгээс ялгаж авдаг. Жишээ нь, улаан эсээс гемоглобин гэдэг уургийг гарган авдаг. Хүн болон амьтны гемоглобин бүхий бэлдмэлийг их хэмжээний цус алдалт юм уу хүнд хэлбэрийн цус багадалтын үед хэрэглэдэг.

90 хувь нь уснаас тогтдог сийвэн олон тооны даавар, органик бус давс, ферментүүд болон эрдэс бодис, сахар зэрэг тэжээлийн бодис агуулдаг. Түүнээс гадна, сийвэнгийн бүрэлдэхүүнд альбумин гэх мэтийн уураг, цус бүлэгнүүлэх хүчин зүйл, өвчинтэй тэмцэхэд нь бие махбодод тусалдаг эсрэг бие ордог. Ямар нэг өвчнөөр өвчилсөн юм уу өвчилж болзошгүй үед уг өвчний дархлаатай болсон хүмүүсийн цусны сийвэнгээс гарган авсан гаммаглобулин тарьдаг. Цагаан эсээс ялган авдаг интерферон, интерлейкин зэрэг жижиг хэсгийг зарим вирусын халдвар болон хорт хавдрыг эмчлэхэд хэрэглэдэг.

Христиан хүн цусны эдгээр жижиг хэсгээр эмчилгээ хийлгэж болох уу? Энэ талаар Библид нарийн заагаагүй учир дор бүрнээ сайтар бодож байгаад мөс чанараараа шийдэх ёстой. Зарим хүн израильчуудад өгсөн Бурхны Хуульд амьтны цусыг «газарт ...асга» гэж заасныг бодож байгаад цусны аливаа жижиг хэсгээр эмчилгээ хийлгэхгүй байхаар шийддэг (Дэд хууль 12:22–24). Зарим нь бүхэл цус болон үндсэн дөрвөн хэсгийг сэлбүүлдэггүй боловч жижиг хэсгүүдээр эмчилгээ хийлгэдэг. Тэд ийм жижиг хэсгүүдийг цусны мөн чанараа алдаж, амийг бэлгэдэхээ больсон гэж үздэг.

Цусны жижиг хэсгийг хэрэглэх эсэхээ шийдэхдээ дараах асуултыг бодож үзээрэй. «Цусны бүх жижиг хэсгээс татгалзана гэдэг нь зарим өвчнийг эмчлэх, эсвэл цусны бүлэгнэх чанарыг сайжруулж, цус тогтоох зорилгоор хэрэглэдэг зарим эм бэлдмэлээс татгалзана гэсэн үг болохыг би ойлгож байгаа бил үү? Цусны зарим жижиг хэсгийг хэрэглэх юм уу хэрэглэхээс татгалзаж байгаагийнхаа учрыг эмчдээ тайлбарлаж чадах уу?»

Эмчилгээний аргууд. Үүнд: гемодилюц, цус хэмнэх гэх зэргийн арга ордог. Гемодилюц гэдэг нь цусыг биеэс гадагшлуулан, оронд нь цусны эзлэхүүнийг ихэсгэх шингэн сэлбээд, гадагшлуулсан цусыг дараа нь өвчтөнд буцааж хийдэг арга юм. Цус хэмнэх гэдэг нь мэс заслын үед шархнаас гарч байгаа болон цээж, хэвлийн хөндийд хурсан цусыг соруулан авч, цэвэрлэх юм уу шүүгээд, өвчтөнд буцааж хийдэг арга. Эдгээр аргыг эмч нар өөр өөрөөр хэрэглэдэг учир ямар аргыг чухам яаж хэрэглэхийг нь эмчээсээ асууж лавлах нь зүйтэй.

Эмчилгээний арга сонгохдоо: «Биеэс минь гарч эргэлтэд орох цус болон тийн эргэх явцдаа түр саатсан цусыг биеийнхээ нэг хэсэг гэж тооцон, „газар асгах“ шаардлагагүй гэж мөс чанар минь үзэх үү? (Дэд хууль 12:23, 24). Эмчилгээний явцад өөрөөс минь авсан цусны бүтэц найрлагыг өөрчлөөд, эргүүлээд биед минь хийвэл Библиэр сургасан мөс чанар минь өвдөх үү? Цус хэрэглэдэг эмчилгээний бүх аргаас татгалзана гэдэг нь цусны шинжилгээ, гемодиализ болон цусны зохиомол эргэлтийн аппаратын тусламжтайгаар хийдэг эмчилгээнээс татгалзана гэсэн үг болохыг би ойлгож байгаа бил үү?» гэж өөрөөсөө асуугаарай.

Өвчтөний цусыг өөрт нь хэрэглэдэг эмчилгээ хийлгэх эсэхээ христиан хүн бүр өөрөө шийдэх ёстой. Мөн өвчтөнөөс бага хэмжээний цус авч, эмтэй холиод буцааж тарьдаг эмчилгээний зарим арга болон шинжилгээ хийлгэх эсэхээ ч өөрөө шийдэх хэрэгтэй.