«Бурхныг алдаршуулахын төлөө бүхнийг хий»

БИД Бурханд өөрийгөө зориулсан учраас үг яриа, үйл хэргээрээ хэзээ ямагт Бурхнаа алдаршуулах үүрэгтэй. Бурхны үйлчлэгчдийн амьдралдаа удирдлага болгох ёстой нэг зарчмыг элч Паул хэлэхдээ «Идсэн ч уусан ч, юу ч хийсэн, Бурхныг алдаршуулахын төлөө бүхнийг хий» гэжээ (1 Кор. 10:31). Ингэхийн тулд Еховагийн төгс зан чанарыг тусган харуулдаг хэм хэмжээг нь сахих учиртай (Кол. 3:10). Бид ард түмэн нь учраас Бурхнаа дуурайх ёстой (Эф. 5:1, 2).

² Энэ нь хэр чухал болохыг элч Петр онцлон «Дуулгавартай хүүхдүүд та нар Бурхны талаар мэддэггүй байсан үеийнхээ хүсэлд автахаа боль. Харин та нарыг сонгосон Ариун Нэгнийг дуурайж, бүх талаар үргэлж ариун бай. Яагаад гэвэл “Би ариун учир та нар ариун байх ёстой” гэж бичсэн байдаг» гэжээ (1 Петр 1:14–16). Эртний израйлчуудын адилаар Христийн дагалдагчид үргэлж ариун байх ёстой. Өөрөөр хэлбэл амьдралынхаа бүх хүрээнд цэвэр ариун байж, энэ ертөнцийн бузар муу нөлөөнөөс ангид байх хэрэгтэй. Ингэсэн цагт Еховад цэвэр ариун үйлчилж чадна (Ег. 20:5).

³ Амьдралынхаа бүх хүрээнд цэвэр ариун байхын тулд Библид байдаг Еховагийн хууль, зарчмыг дагаж мөрдөх учиртай (2 Тим. 3:16). Бид Библиэс Еховагийн тухай, үйл хэргийнх нь талаар мэдэж аваад түүнд татагдсан билээ. Бас Бурхны Хаант төрийг үргэлж амьдралынхаа эн тэргүүнд тавьж, Бурхны хүслийг биелүүлэхийг гол зорилгоо болгох хэрэгтэйг мэдэж авсан (Мат. 6:33; Ром 12:2). Энэ зорилгодоо хүрэхийн тулд «шинэ хүнийг өмсөх учиртай» (Эф. 4:22–24).

ШАШИН ШҮТЛЭГ, ЁС СУРТАХУУНЫ ХУВЬД ЦЭВЭР АРИУН БАЙХ НЬ

⁴ Еховагийн тогтоосон өндөр хэм хэмжээний дагуу амьдрахад амаргүй үе бас бий. Дайсан болох Сатан Диавол биднийг үнэнээс холдуулахыг үргэлж зорьдог. Бид Сатаны ертөнцийн муу нөлөө, мөн нүгэлт хандлагаасаа болоод зовох нь бий. Еховад өөрийгөө зориулсныхаа дагуу амьдрахын тулд байнга тэмцэх хэрэгтэй болдог. Тиймээс эсэргүүцэл хавчлага, сорилт бэрхшээлтэй тулгарвал гайхах хэрэггүйг Библи бидэнд тодорхой хэлж өгдөг. Бурхандаа үнэнч байхын тулд зовлон эдлэх нь гарцаагүй (2 Тим. 3:12). Гэхдээ ийм үед ч бид баяр хөөртэй байж чаддаг. Яагаад гэвэл Бурхныхаа хүслийг биелүүлж байгаа учраас сорилт бэрхшээл амсаж байгаагаа ойлгодог (1 Петр 3:14–16; 4:12, 14–16).

⁵ Есүс төгс байсан хэр нь зовлон туулж, түүнээсээ дуулгавартай байхыг сурсан. Тэрээр Сатаны хорхой хүргэм зүйлд бууж өгөх юм уу ертөнцийнхний үзэл бодолд автаж байгаагүй (Мат. 4:1–11; Ёох. 6:15). Итгэл үнэмшлээсээ няцах тухай хэзээ ч бодож байгаагүй. Чин үнэнч байснаасаа болж хүмүүст үзэн ядагдсан ч Еховагийн тогтоосон хэм хэмжээг тууштай баримталдаг байсан. Есүс нас барахынхаа өмнөхөн шавь нартаа «энэ ертөнцийнхөн та нарыг» бас үзэн ядна хэмээн хэлсэн. Тэр цагаас эхлэн дагалдагчид нь янз бүрийн зовлон эдэлсэн ч зоригтой байсаар ирсэн. Бурхны Хүү энэ «ертөнцийг ялсныг» мэддэг байсан учраас тэр ажээ (Ёох. 15:19; 16:33; 17:16).

⁶ Бид «энэ ертөнцийнх биш» байхын тулд Есүсийн адилаар Еховагийн хэм хэмжээг баримтлах хэрэгтэй. Бас улс төрийн үйл хэрэг, нийгмийн асуудалд хутгалдан оролцохгүй байхаас гадна ялзран доройтож буй ёс суртахуунгүй явдлаас өөрийгөө хамгаалах хэрэгтэй. Бид Яаков 1:21-д байдаг дараах зөвлөгөөг нухацтай бодох хэрэгтэй. «Бузар булай бүхнийг, аливаа муу муухай юмыг ор мөргүй арилга. Бурхан аврах чадалтай үгээ сэтгэлд тань хоногшуулахад даруухнаар хүлээж ав» гэжээ. Бид бие даан судлахдаа, цуглаанд суухдаа үнэний «аврах чадалтай үгийг» оюун ухаан, зүрх сэтгэлдээ хоногшуулбал энэ ертөнцийн санал болгодог зүйлүүдийг тоохгүй, тэр байтугай хүсэх ч үгүй. Шавь Яаков: «Ертөнцтэй нөхөрлөдөг хүн Бурхантай дайсагнаж байгаа хэрэг гэдгийг та нар мэдэхгүй гэж үү? Ертөнцтэй нөхөрлөхийг хүсдэг хэн боловч өөрийгөө Бурхны дайсан болгож байгаа хэрэг» хэмээн бичжээ (Яак. 4:4). Тийм учраас Еховагийн хэм хэмжээг дагахыг, энэ ертөнцөөс тусгаар байхыг Библид хатуу сануулдаг.

⁷ Бас бузар булай, садар самуун явдалтай орооцолдохгүй байхыг анхааруулдаг. Жишээ нь «Ариун хүмүүст үл нийцэх садар самуун, аливаа бузар булай, шуналын талаар та нар дурсах ч учиргүй» гэж байдаг (Эф. 5:3). Тиймээс бузар булай, шалиг завхай, гутамшигтай юмыг бодох ёсгүй. Мөн яриандаа ч дурдах учиргүй. Ингэснээрээ Еховагийн тогтоосон ёс суртахууны өндөр хэм хэмжээг баримтлахыг хүсдэгээ батална.

АХУЙ БОЛОН БИЕИЙН ХУВЬД ЦЭВЭР БАЙХ НЬ

⁸ Христийн дагалдагчид ёс суртахуун, шашин шүтлэг төдийгүй ахуй болон биеийн хувьд цэвэр байх нь их чухал гэдгийг ойлгодог. Ариун Бурхан Ехова эртний израйлчуудаас хуарангаа цэвэр байлгахыг шаарддаг байсан. Бид бас цэвэр байх ёстой. Тэгсэн цагт Ехова биднээс «бузар муухай зүйлийг олж харахгүй» (Д.хууль 23:14).

⁹ Библийн зарчмаар бол, шүтлэг мөргөл, бодол санаа, үйл хэргээ цэвэр ариун байлгах нь биеийн ариун цэврийг сахихтай нягт холбоотой ажээ. Жишээлбэл элч Паул: «Хайрт ах дүү нар минь ээ, ... Бурхнаас эмээж, бие, сэтгэлийг маань бузарлах аливаа бүхнээс өөрсдийгөө цэвэрлэж, улам бүр цэвэр ариун байцгаая» гэжээ (2 Кор. 7:1). Тиймээс эрэгтэй эмэгтэй гэлтгүй Христийн бүх дагалдагч хувийн ариун цэвэр сахиж тогтмол усанд орж, хувцсаа угаадаг байх ёстой. Улс болгоны ахуй нөхцөл өөр өөр байдаг ч ус, саван олоод өөрийнхөө ч, үр хүүхдүүдийнхээ ч ариун цэврийг сахиж чадна шүү дээ.

¹⁰ Бид дэлгэрүүлэх ажилд оролцдог учраас ихэнхдээ хүмүүст танил болсон байдаг. Тийм учраас гэр орон, хашаа хороогоо цэвэр цэмцгэр, эмх цэгцтэй байлгавал хөрш зэргэлдээх хүмүүстээ сайн гэрчлэл болно. Гэр бүлийн бүх гишүүн энэ ажилд оролцох ёстой. Гэр орон, ойр орчноо цэвэр цэмцгэр байлгах нь бусдад таатай сэтгэгдэл төрүүлдэг учраас өрхийн тэргүүнүүд үүнийг анхаардаг байх учиртай. Гэр бүлээ Еховатай дотно байлгах гэж мэрийхийн зэрэгцээ байшин сав, хашаа хороогоо ийнхүү анхаардаг бол өрхийн сайн тэргүүн гэсэн үг (1 Тим. 3:4, 12). Эмэгтэйчүүд бас гэр орондоо санаа тавих үүрэгтэй. Ялангуяа гэр доторхоо хариуцдаг (Тит 2:4, 5). Хүмүүжил сайтай хүүхдүүд гэр орны ажилд туслахаас гадна өрөөгөө цэвэрхэн байлгадаг. Ийм маягаар гэр орноо цэвэр байлгахад гэр бүлийн гишүүн бүр хувь нэмрээ оруулбал Бурхны Хаант төрийн захирах шинэ ертөнцөд амьдрах бэлтгэлээ базааж байна гэсэн үг.

¹¹ Цуглаандаа машинаараа явдаг Гэрчүүд олон бий. Зарим газар дэлгэрүүлэхэд машин зайлшгүй хэрэгтэй байдаг. Бид машин тэргээ угааж арчин, засаж торддог байх хэрэгтэй. Гэр орон, унаа тэрэг маань биднийг Еховагийн цэвэр, ариун ард түмэн гэдгийг тодорхой илэрхийлдэг байх ёстой. Бас дэлгэрүүлэхдээ авч явдаг цүнх, Библи ч цэвэр үзэмжтэй байх нь чухал.

¹² Хувцас хунар сонгох, гадаад байдлаа анхаарахдаа ч Библийн зарчмыг баримтлах ёстой. Та нэр алдартай хүнтэй уулзахдаа хааш яаш эсвэл чөлөөт хувцас өмсөхгүй биз дээ? Тэгвэл Ехова Бурхнаа төлөөлөн дэлгэрүүлэх юм уу тайзан дээр гарахдаа бүр ч их анхаарах нь лавтай! Бидний хэрхэн хувцаслаж, үс зүсээ яаж янзалсныг хүмүүс хараад Еховаг шүтэх шүтлэгийг маань дүгнэдэг. Тиймээс хүмүүсийг эвгүй байдалд оруулах юм уу анхаарлыг нь татахуйцаар хувцаслах нь зохисгүй (Мика 6:8; 1 Кор. 10:31–33; 1 Тим. 2:9, 10). Дэлгэрүүлэхдээ, цуглаан, чуулганд суухдаа хувийн ариун цэвэр сахих болон биеэ зөв авч явахтай холбоотой Библийн заавар зөвлөгөөг дагах ёстой. Бид цаг ямагт Ехова Бурхнаа хүндэлж, алдаршуулахыг хүсдэг.

¹³ Байгууллагын төвийг эсвэл салбарыг үзэх үед ч дээрх зарчмыг баримтлах учиртай. Бетел гэдэг нь «Бурхны өргөө» гэсэн утгатай шүү дээ. Тийм учраас цуглаанд ирдэг шигээ зохистой хувцаслан, биеэ зөв авч явах ёстой.

¹⁴ Чөлөөт цагаа өнгөрүүлэхдээ ч хувцас хунар, гадаад байдлаа анхаарах нь зүйтэй. «Би энэ хувцаснаасаа ичиж зоволгүй албан бусаар дэлгэрүүлж чадах уу?» гэж өөрөөсөө асууж үзээрэй.

АМРАЛТ ЧӨЛӨӨТ ЦАГАА ЗӨВ ЗОХИСТОЙ ӨНГӨРҮҮЛЭХ НЬ

¹⁵ Эрүүл ухаанаар бодож сэтгэн, эрч хүчтэй байхад амралт чөлөөт цаг чухал. Есүс нэг удаа «хүнгүй газар очоод жаахан амаръя» гэж шавь нартаа хэлсэн байдаг (Марк 6:31). Амралт чөлөөт цагаа зөв зохистой өнгөрүүлбэл жинхэнэ утгаар амарсан болдог. Ингэж амарсны үрээр бие сэтгэл сэргэн, ажлаа илүү үр бүтээлтэй хийдэг.

¹⁶ Зугаацаж цэнгэх зүйл өнөө үед олон байдаг учраас Христийн дагалдагчид Бурхны мэргэн ухаанаар удирдуулж, хэм хэмжээнд нь нийцүүлэн сонгох ёстой. Амарч зугаацах нь зүйн хэрэг боловч амьдралын хамгийн чухал зүйл биш юм. Хүмүүс «эцсийн өдрүүдэд» «Бурхныг хайрлахын оронд зугаацаж цэнгэхийг л боддог» болохыг Библид тодорхой хэлсэн байдаг (2 Тим. 3:1, 4). Зугаацаж цэнгэх зүйлсийн ихэнх нь Бурхны тогтоосон хэм хэмжээг сахихыг хүсдэг хүмүүст тохиромжгүй байдаг.

¹⁷ Христийн эртний дагалдагчид зугаа цэнгэл хөөсөн эргэн тойрныхоо хүмүүсийн муу нөлөөнд автахгүйн тулд хичээж мэрийх шаардлагатай байлаа. Ромын цирк л гэхэд хүчирхийлэл, садар самуун, цус урсгах явдлыг үзүүлж, олон нийтийг хөгжөөдөг талбар байв. Хүмүүс энд ирж бусдын зовохыг харж таашаал авдаг байжээ. Харин Христийн дагалдагчид энэ бүхнээс хол байсан. Өнөө үед ч зугаацаж цэнгэх зүйлсийн ихэнх нь дээрхтэй төстэй бөгөөд хүмүүсийн дур хүслийг татдаг. Тиймээс бид өөрсдийгөө «үргэлж шалган», ёс суртахуунгүй явдлыг өөгшүүлдэг зугаа цэнгэлээс хол байцгаая (Эф. 5:15, 16; Дуу. 11:5). Зарим зугаа цэнгэл хал балгүй мэт санагдсан ч тухайн зугаа цэнгэлийг таашааж байгаа олон нийтийн хандлага, уур амьсгал нь Гэрч хүнд тохиромжгүй байх нь бий (1 Петр 4:1–4).

¹⁸ Гэрч хүмүүст амралт, чөлөөт цагаараа хийж болдог зүйл олон байдаг. Энэ талаар манай байгууллагын ном хэвлэлд янз бүрийн зөвлөгөө, Библийн зарчмуудыг нийтэлдэг. Үүнийг дагаад ач тус хүртдэг хүн олон бий.

¹⁹ Гэр бүлүүдийг гэртээ урьж, сэтгэл сэргээм яриа өрнүүлж болно. Итгэл нэгтнүүдээ хуримын цайллага гэх мэт томоохон үдэшлэгт урьж болох юм (Ёох. 2:2). Зохион байгуулж байгаа хүмүүс үдэшлэгийн үеэр гарч болзошгүй асуудлыг хариуцах ёстой. Ялангуяа олон хүнийг урьсан бол бүр ч анхаарах хэрэгтэй. Заримдаа найз нөхдийн халуун дотно орчин бүрдэхэд хүмүүс хэт чөлөөтэй болж Гэрч хүний ёсоор биеэ зөв авч явахаа больж, хэтрүүлэн идэж архидан согтуурч, тэр байтугай бусад ноцтой алдаа гаргах нь бий. Үүнийг бодолцож үздэг ухаалаг Гэрчүүд томоохон үдэшлэг уулзалт зохион байгуулахдаа урих хүний тоо, үргэлжлэх хугацааг урьдчилан тогтоосон байдаг. Хэрэв согтууруулах ундаа байгаа бол зочид нь тохируулж уух нь зүйтэй (Флп. 4:5). Үдэшлэг уулзалт нь бие биеийнхээ урам зоригийг бадрааж, сэтгэлийг нь сэргээж байвал юу идэж уух нь тийм ч чухал биш.

²⁰ Зочломтгой байх нь сайн (1 Петр 4:9). Бид итгэл нэгтнүүдээ гэртээ урьж тэдэнтэйгээ хамт хоол идэх, цагаа өнгөрүүлэх юм уу сайхан яриа өрнүүлэхдээ хөрөнгө чинээ багатай нэгнээ ч орхигдуулдаггүй (Лук 14:12–14). Хэрэв уригдсан бол Марк 12:31-д байдаг зөвлөгөөг дагаж биеэ зөв авч явах ёстой. Сайхан сэтгэл гарган урьж дайлсан нэгэндээ талархлаа илэрхийлж байгаарай.

²¹ Христийн дагалдагчид бид олон сайхан бэлэг өгдөг Бурхандаа баярладаг тул «идэж уух хийгээд эрхэлж буй бүхий л ажилдаа сэтгэл хангалуун» байдаг (Ном. 3:12, 13). «Бурхныг алдаршуулахын төлөө бүхнийг хийвэл» урьсан болон уригдсан хүний хэн хэнийх нь Бурханд үйлчлэх урам зориг бадарч, сэтгэл хангалуун болдог.

СУРГУУЛИАС ЗОХИОДОГ АРГА ХЭМЖЭЭ

²² Еховагийн Гэрчүүдийн хүүхдүүд ерөнхий боловсрол эзэмшихийн чухлыг ойлгодог. Сургуульд яваад сайн уншиж, бичиж сурдаг. Хүүхэд багачуудад Еховад янз бүрээр үйлчлэх зорилгодоо хүрэхэд нь сургууль дээр заалгасан зүйл нь тус болдог. Тэд сургуульд сурч байхдаа ч Бурханд үйлчлэхийг эн тэргүүнд тавьдаг. Ийнхүү Агуу «Бүтээгчээ санагтун» гэсэн зөвлөгөөг дагахын тулд чадах бүхнээ хийдэг (Ном. 12:1).

²³ Чи сурагч бол Еховаг мэддэггүй хүүхдүүдтэй нийлэхээс болгоомжлоорой (2 Тим. 3:1, 2). Ехова чамайг муу нөлөөнөөс хол байхад чинь тустай бүхнийг зааж өгдөг. Тийм учраас өөрийгөө хамгаалахын тулд хийж чадах юм чамд их бий (Дуу. 23:4; 91:1, 2). Өөрийгөө хамгаалахын тулд Еховагийн өгдөг бүхнээс ач тус хүртээрэй (Дуу. 23:5).

²⁴ Энэ ертөнцөөс тусгаар байхын тулд ихэнх Гэрч хүүхэд сургуулиас зохиодог арга хэмжээ, дугуйланд оролцдоггүй. Үүнийг ангийн хүүхдүүд, багш нар нь ойлгохгүй байж мэднэ. Гэхдээ Бурханд таалагдах нь юу юунаас илүү чухал. Охид хөвгүүд та нар Библийн зарчмын дагуу мөс чанараа сургаж, өрсөлдөх сэтгэл, үндсэрхэх үзлийг дэвэргэх ямар ч зүйлд оролцохгүй байхаар бат шийдвэл Еховагийн сайшаалыг хүлээнэ (Гал. 5:19, 26). Бас Бурханд үнэнч эцэг эхийнхээ зааврыг дагадаг, хурлынхантайгаа дотносон нөхөрлөдөг бол Еховагийн тогтоосон хэм хэмжээг баримталж чадна.

АЖИЛ ТӨРӨЛ, НАЙЗ НӨХӨД

²⁵ Өрхийн тэргүүнүүд гэр бүлээ тэжээж тэтгэх үүрэгтэйг Библид бичсэн байдаг (1 Тим. 5:8). Энэ үүргээ биелүүлэх нь чухал хэдий ч Хаант төрийн үйл хэргийг урагшлуулах ажлыг эн тэргүүнд тавих ёстойг тэд ойлгодог (Мат. 6:33; Ром 11:13). Бурханд үргэлж үнэнч байж, хоол унд, хувцас хунар зэрэг байгаа юмандаа сэтгэл хангалуун байвал хэт санаа зовох юм уу эд хөрөнгийг чухалчлах урхинд орохгүй (1 Тим. 6:6–10).

²⁶ Еховад өөрийгөө зориулсан бүх хүн ажил хийхдээ Библийн зарчмыг үргэлж боддог байх учиртай. Үнэнч шударгаар хөдөлмөрлөж хэрэгцээгээ хангахын тулд Бурхныхаа болон улс орныхоо хуулийг зөрчих ямар ч зүйлийг хийх учиргүй (Ром 13:1, 2; 1 Кор. 6:9, 10). Бас муу хүмүүстэй нөхөрлөхийн хор хөнөөлийг мартаж болохгүй. Бид Христийн цэрэг учраас бизнес хийхдээ ч Еховагийн хэм хэмжээтэй зөрчилдөх, төвийг сахих байр сууриасаа няцах, Еховагийн сайшаалыг алдах зүйлсээс зайлсхийдэг (Ис. 2:4; 2 Тим. 2:4). Мөн Бурхны дайсан «Агуу Вавилонтой» ямар ч байдлаар холбогддоггүй (Илч. 18:2, 4; 2 Кор. 6:14–17).

²⁷ Бид Бурхны хэм хэмжээг дагадаг бол итгэл нэгтнүүдтэйгээ цугласан үедээ тэднийгээ хувийн ашиг сонирхлынхоо төлөө ашиглахгүй, хамтран бизнес эрхлэхийг ятгахгүй. Итгэл нэгтнүүдтэйгээ хамт цуглаан, чуулганд суудгийн маань зорилго нь зөвхөн Ехова Бурхнаа шүтэх юм. Бид Еховагийнхаа бэлдсэн заавар зөвлөгөөг сонсож, бие биеийнхээ «итгэлээр урамшин зоригждог» (Ром 1:11, 12; Евр. 10:24, 25). Тийм учраас цуглаан, чуулганыг зорилгынх нь дагуу байлгах ёстой.

ЭВ ЭЕЭ САХИХ НЬ

²⁸ Ард түмэн нь Бурхныхаа тогтоосон хэм хэмжээг сахихын тулд «амар тайвныг эрхэмлэн, Бурхны агуу хүчээр удирдуулж, эв нэгдэлтэй явах» учиртай (Эф. 4:1–3). Бидний хүн нэг бүр өөрийнхөө эрх ашгийг бодолгүй, харин бусдад «сайныг үйлдэхийг» хичээдэг (1 Тес. 5:15). Танай хурлынхан ч тийм хандлагатай гэдэгтэй та санал нийлэх байх. Бид үндэс угсаа, арьсны өнгө, нийгмийн гарал, хөрөнгө мөнгө, мэдлэг боловсролоороо ялгаатай ч Еховагийн тогтоосон хэм хэмжээг бүгдээрээ сахиж амьдардаг. Еховагийн ард түмний энэ онцлог шинжийг хөндлөнгийн хүмүүс ч анзаардаг (1 Петр 2:12).

²⁹ Эв нэгдэлтэй байх үндсэн шалтгааныг элч Паул цааш нь онцолж бичихдээ «Бурхан та нарыг сонгоод нэг шагнал өгөхөөр амласан билээ. Үүнчлэн, нэг бие, нэг агуу хүч, нэг Эзэн, нэг итгэл, нэг баптисм, бүгдэд нэг Бурхан Эцэг байдаг. Тэрээр бүгдийн дээр, бүгдээр дамжин, бүгдийн дотор байдаг» гэжээ (Эф. 4:4–6). Бид Библийн үндсэн болон гүнзгий утгатай сургаалын талаар нэг ойлголттой байж, Еховагийн хэмжээгүй эрх мэдлийг хүлээн зөвшөөрдөг учраас ийм эв нэгдэлтэй байдаг. Үнэхээр ч ард түмэн нь Еховагийн ачаар үнэний «цэвэр хэлээр» ярьдаг учраас мөр зэрэгцэн үйлчилдэг (Зеф. 3:9, ШЕ).

³⁰ Эв нэгдэл, амар тайван ноёлдог хурал маань бидний урам зоригийг бадраадаг нэг эх булаг билээ. Ехова: «Хашаан дахь хоньд ... мэт Би тэднийг хамт байлгана» хэмээн амласан. Бид энэ амлалт биелж байгааг нүдээрээ үзэж байна (Мика 2:12). Тийм учраас Бурхныхаа тогтоосон хэм хэмжээг сахиж бие биетэйгээ үргэлж эвтэй байхыг хичээдэг.

³¹ Ехова Бурхны цэвэр ариун хуралд нэгдсэн хүмүүс үнэхээр жаргалтай! Бид янз бүрийн бэрхшээл амсаж болох ч Еховагийн Гэрч байх нь нэр төрийн хэрэг билээ. Еховатай тогтоосон нандин харьцаагаа үргэлж хадгалж явцгаая. Ингэдэг бол тогтоосон хэм хэмжээг нь өөрөө хичээнгүйлэн сахиад зогсохгүй өрөөл бусдыг сахихад нь тус болно (2 Кор. 3:18).