Баптисм хүртэх хүмүүстэй хийх төгсгөлийн ярилцлага

Еховагийн Гэрчүүд гол төлөв чуулганыхаа үеэр баптисм хүртээдэг. Баптисм хүртэх хүмүүс тусгай илтгэл сонссоныхоо дараа суудлаасаа босож, илтгэгчийн тавих дараах хоёр асуултад чанга, тодорхой хариулдаг:

1. Та нүглээ гэмшсэнээ, Еховад өөрийгөө зориулснаа, Есүс Христээр дамжуулан аврагдахаа хүлээн зөвшөөрч байна уу?

2. Та баптисм хүртсэнээр Еховагийн байгууллагад орж Еховагийн Гэрч болно гэдгээ ойлгож байна уу?

Баптисм хүртэх хүмүүс эдгээр асуултад зөвшөөрсөн хариу өгвөл золиосонд итгэдэг болсноо, мөн Еховад өөрсдийгөө эргэлт буцалтгүй зориулснаа «олон нийтэд тунхаглаж» байна гэсэн үг (Ром. 10:9, 10). Тийм учраас, дээрх асуултад бат итгэлтэйгээр хариулахын тулд залбирч байгаад, урьдчилж сайн эргэцүүлэн бодох нь зүйтэй.

Та залбирлаараа Еховад өөрийгөө зориулж, зөвхөн Түүнийг шүтэж хүслийг нь биелүүлэхийг амьдралынхаа эн тэргүүнд тавихаа амласан уу?

Боломж гармагц баптисм хүртэнэ гэдэгтээ та одоо ч итгэлтэй хэвээрээ байна уу?

Баптисм хүртэхдээ ямар хувцас өмсвөл зохистой вэ? (1 Тим. 2:9, 10; Ёох. 15:19; Флп. 1:10).

Бид «даруу, ухаалаг» хувцаслаж «Бурхнаас эмээдэг» гэдгээ илэрхийлэх ёстой. Тиймээс баптисм хүртэх хүмүүс хэт задгай загвартай усны хувцас юм уу элдэв уриа лоозон, реклам сурталчилгаа бүхий хувцас өмсөх нь зохимжгүй. Харин цэвэр цэмцгэр, аятайхан, мөн уг арга хэмжээг хүндэтгэж буйгаа харуулахаар хувцаслах хэрэгтэй.

Баптисм хүртэх үедээ биеэ хэрхэн авч явах ёстой вэ? (Лук 3:21, 22).

Есүс хэрхэн баптисм хүртсэн нь өнөөгийн бидэнд үлгэр жишээ болдог. Тэрээр баптисм хүртэхийг хариуцлагатай үйл явдал гэж ойлгож байсан бөгөөд энэ нь тэр үед биеэ хэрхэн авч явснаас нь илэрхий байдаг. Тэгэхээр баптисм хүртээх газар тоглож наадах, сэлж шумбах зэргээр уг явдлыг үл тоомсорлосон аливаа үйлдэл хийхгүй байх нь зүйтэй. Түүнчлэн баптисм хүртээд гарч ирж байгаа хүн гавьяа байгуулсан мэт аашлах нь зохимжгүй. Баптисм хүртэх нь баярт үйл явдал мөн хэдий ч баярласан сэтгэлээ зөв зохистой илэрхийлэх хэрэгтэй.

Тогтмол цуглаандаа очиж хуралтайгаа нягт холбоотой байх нь Еховад үнэнч хэвээрээ байхад тань хэрхэн тус болох вэ?

Баптисм хүртсэнийхээ дараа ч бие даан Библи судлах хуваариа чанд баримталж, дэлгэрүүлэх ажилд тогтмол оролцох нь яагаад чухал вэ?

ХУРЛЫН АХЛАГЧДАД ЗОРИУЛСАН ЗААВАР

Дэлгэрүүлэгч баптисм хүртэх хүсэлт гаргавал энэ номын 185–207-р хуудсанд байгаа «Баптисм хүртэх хүмүүст зориулсан асуулт»-ыг анхааралтай судлахыг зөвлөнө. Тухайн хүн 182-р хуудсанд байгаа «Баптисм хүртээгүй дэлгэрүүлэгчид зориулсан заавар»-ыг анхааралтай уншаад ахлагчидтай хийх ярилцлагад бэлдэх учиртай. Баптисм хүртэх хүсэлт гаргагч ярилцлагын явцад номоо ашиглахын зэрэгцээ тэмдэглэлээ харж болохыг зааварт бичсэн. Ахлагчидтай ярилцахаасаа өмнө уг номыг хэн нэгэнтэй хичээлийн маягаар үзэх шаардлагагүй.

Баптисм хүртэх хүсэлтэй хүн ахлагчдын зөвлөлийн зохицуулагчид хүсэлтээ мэдүүлэх ёстой. Ахлагчдын зөвлөлийн зохицуулагч тухайн хүнийг «Баптисм хүртэх хүмүүст зориулсан асуулт»-ыг судалсных нь дараа, түүнээс Еховагийн хүслийг биелүүлэхийн тулд өөрийгөө зориулж хувьчлан залбирсан эсэхийг нь асууна. Тухайн хүн өөрийгөө зориулсан бол ахлагчдын зөвлөлийн зохицуулагч «Баптисм хүртэх хүмүүст зориулсан асуулт»-ыг түүнтэй ярилцахыг хоёр ахлагчид даалгана. Хоёр хэсгийг өөр өөр ахлагч удирдах ёстой. Ярилцлагыг заавал чуулганы товыг тодорхой болсны дараа хийх албагүй.

Ер нь, хоёр хэсгийг тус бүр нь цаг орчим үргэлжлэх хоёр удаагийн ярилцлагаар хэлэлцдэг. Гэхдээ шаардлагатай бол үүнээс удаан хугацаагаар ярилцаж болно. Ярилцлага болгоныг залбирлаар эхэлж, залбирлаар төгсгөх ёстой. Ярилцахдаа яарах хэрэггүй. Томилогдсон ахлагчид ярилцлагыг хойшлуулахгүй байх нь зүйтэй.

Ер нь, баптисм хүртэх хэсэг хүнтэй бус, хүн бүртэй ганцаарчлан ярилцах нь хамгийн сайн. Бүх асуултад хэрхэн хариулахыг нь сонсоод мэдлэгийнх нь түвшинг тогтоож, баптисм хүртэхэд бэлэн эсэхийг нь үнэн зөв тодорхойлж болдог. Түүнээс гадна, ихэнх хүн ганцаараа байхдаа өөрийгөө илүү чөлөөтэй илэрхийлдэг. Эхнэр нөхөр хоёр ярилцлагад зэрэг орж болох юм.

Баптисм хүртэхийг хүссэн эмэгтэйтэй хийх ярилцлагыг хүнд харагдах ч сонсогдохооргүй газар хийх хэрэгтэй. Баптисм хүртэх хүнтэй аль хэсгийг ярилцахаас шалтгаалж, ахлагч юм уу туслах үйлчлэгчийг байлцуулна. Энэ талаар дараагийн догол мөрд дэлгэрэнгүй тайлбарласан.

Цөөн ахлагчтай хуралд бол, «I хэсэг: Христийн дагалдагчийн итгэл үнэмшил»-д байгаа асуултуудыг ярилцахдаа аливаад хэрсүү ухаалаг ханддаг туслах үйлчлэгчийг ярилцлагад оролцуулж болно. «II хэсэг: Христийн дагалдагчийн амьдрал» хэсгийг зөвхөн ахлагчид баптисм хүртэх хүнтэй ярилцана. Шаардлага хангасан эрчүүд хүрэлцэхгүй бол дүүрэг хариуцагчтай холбоо барьж, хөрш хурлаасаа тусламж авч болно.

Баптисм хүртэх хүсэлтэй хүн насанд хүрээгүй бол эцэг эх нь ярилцлагад байлцах шаардлагатай. Эцэг эх нь хамт суух боломжгүй бол хоёр ахлагч (эсвэл аль хэсгийг ярилцахаас шалтгаалж, нэг ахлагч нэг туслах үйлчлэгчтэй хамт) ярилцлагыг хийх ёстой.

Баптисм хүртэх хүсэлт гаргагч Библийн үндсэн сургаалыг зохих хэмжээнд ойлгодог болсон эсэхийг ахлагчид магадална. Түүнээс гадна тухайн хүн Библийн үнэнийг чин сэтгэлээсээ эрхэмлэдэг хийгээд Еховагийн байгууллагыг зохих ёсоор хүндэтгэдэг эсэхийг тодруулах зорилго өвөрлөдөг. Хэрэв тухайн хүн Библийн үндсэн сургаалыг ойлгоогүй байвал дараа баптисм хүртэх бэлтгэлээ хангахад нь шаардлагатай тусламж үзүүлэх арга хэмжээ авна. Зарим хүний хувьд дэлгэрүүлэх ажлыг илүү их үнэлж, Еховагийн байгууллагад дуулгавартай болохын тулд хугацаа хэрэгтэй байж болох юм. Баптисм хүртэх хүн энэ чухал алхмыг хийхэд бэлэн эсэхийг зөв тодорхойлохын тулд тухайн ярилцлагад оногдсон цагийг яаж хуваарилахаа ахлагчид ухаалгаар шийднэ. Өөрөөр хэлбэл, зарим асуултыг дэлгэрэнгүй, зарим асуултыг товчхон ярилцаж болох хэдий ч бүх асуултыг ярилцах шаардлагатай.

Баптисм хүртэх хүсэлт гаргагчтай ярилцсан ахлагчид хоёр дахь ярилцлагын дараа уулзан, баптисм хүртээх эсэхийг зөвлөлдөн шийднэ. Баптисм хүртэх хүсэлт гаргасан хүн бүрийн өмнөх амьдрал, чадал чадвар болон бусад нөхцөл байдлыг тооцож үзнэ. Гол нь, Еховад зүрх сэтгэлээ зориулж, Библийн үндсэн сургаалын утга учрыг ойлгодог болсон эсэхийг нь анхаардаг. Ахлагчид аа, та бүхний хайр халамж, тусламж дэмжлэгтэйгээр, баптисм хүртэх хүмүүс сайн мэдээ тунхаглах Бурхны үйлчлэгчийн үүргээ биелүүлэх бэлтгэлээ бүрэн хангаж чадна.

Үүний дараа ярилцлага хийсэн нэг юм уу хоёр ахлагч тухайн хүнтэй уулзаж, баптисм хүртэх шаардлага хангасан эсэхийг нь мэдэгдэнэ. Шаардлага хангасан бол, ахлагчид түүнтэй уг номын 206, 207-р хуудсанд байгаа асуултын дагуу «Баптисм хүртэх хүмүүстэй хийх төгсгөлийн ярилцлага»-ыг хийх хэрэгтэй. Баптисм хүртэх хүн «Үүрд жаргалтай амьдраарай!» номыг үзэж дуусгаагүй бол баптисм хүртсэн ч үзэж дуусгахыг уриална. Баптисм хүртэх өдрийг нь «Хурлын дэлгэрүүлэгчийн мэдээлэл»-д нэмж тэмдэглэх тухай баптисм хүртэх хүнд мэдэгдэнэ үү. Ахлагчид ийнхүү мэдээллийг цуглуулдгийн учир шалтгааныг сануулаарай. Энэ нь байгууллага маань дэлхий дахины Еховагийн Гэрчүүдийн шашны үйл ажиллагааг цаашдаа ч удирдаж, баптисм хүртсэн хүн хурлын үйл ажиллагаанд оролцон, ахлагчдаас урам зориг, заавар зөвлөгөө авч чадахын тулд юм. Мөн ахлагчид шинэ дэлгэрүүлэгчдийн хувийн мэдээллийг jw.org сайтад байгаа Мэдээллийн нууцлалыг хамгаалах тухай Еховагийн Гэрчүүдийн олон улсын бодлогын дагуу ашиглаж, нууцлалыг чандлан хамгаална гэдгийг танилцуулна. Ер нь энэ ярилцлагыг арван минутаас хэтрүүлэхгүй хийнэ.

Баптисм хүртсэн хүнтэй баптисм хүртсэнээс нь нэг жилийн дараа хоёр ахлагч уулзан урам зориг хайрлан, заавар зөвлөгөө өгдөг. Хоёр ахлагчийн нэг нь тухайн хүний хамрагддаг дэлгэрүүлэх ажлын бүлгийн хариуцагч нь байх ёстой. Насанд хүрээгүй хүүхэдтэй уулзах бол Гэрч эцэг эхийг нь байлцуулах учиртай. Уулзалтыг халуун дулаан уур амьсгалтай, сэтгэл сэргээм байхаар хийх хэрэгтэй. Бурхны үйлчлэгчийн хувиар ямар ахиц дэвшил гаргаж байгааг нь хэлнэ. Мөн цаашдаа ч бие дааж тогтмол судалдаг, өдөр бүр Библи уншдаг, долоо хоног бүр гэр бүлийн хичээл хийдэг, цуглаанд тогтмол явж, идэвхтэй оролцдог, долоо хоног бүр дэлгэрүүлдэг байхад нь тус болох зөвлөгөө өгөх нь зүйтэй (Эф. 5:15, 16). «Үүрд жаргалтай амьдраарай!» номыг үзэж дуусгаагүй бол ахлагчид түүнд туслах хүнийг олж өгөх хэрэгтэй. Тухайн хүнийг чин сэтгэлээсээ харамгүй магтаарай. Ер нь ганц хоёр зөвлөгөө өгөхөд хангалттай.