ХАДГАЛ
Цусны жижиг хэсгийг хэрэглэх болон өөрийнхөө цусаар эмчилгээ хийлгэх тухайд ямар шийдвэр гаргах нь зүйтэй вэ?
Библид: «Цуснаас цээрлэ» гэсэн тушаал байдаг (Үйлс 15:20). Тийм учраас, Еховагийн Гэрчүүд бүхэл цус болон улаан, цагаан эс, ялтас, сийвэн гэсэн цусны үндсэн дөрвөн хэсгийг сэлбүүлдэггүй. Мөн донор болох юм уу өөртөө сэлбүүлэх зорилгоор цусаа хадгалуулдаггүй (Лев. 17:13, 14; Үйлс 15:28, 29).
Цусны жижиг хэсэг гэж юу вэ? Тэдгээрийг хэрэглэх эсэхээ шийдэх нь хувийн хэрэг байдгийн учир юу вэ?
Фракцлах буюу жижиг хэсгээр нь ялгах аргаар гарган авсан цусны элементийг цусны жижиг хэсэг гэдэг. Цусны үндсэн дөрвөн хэсгийн нэг болох сийвэн л гэхэд 91 орчим хувь нь ус; 7 орчим хувь нь альбумин, глобулин, фибриноген гэх мэтийн уураг; 1,5 орчим хувь нь тэжээлийн бодис, даавар, хий, аминдэм, дайвар бүтээгдэхүүн, электролит гэх зэрэг бодис болж задардаг.
«Цуснаас цээрлэх» тушаал цусны жижиг хэсгүүдэд бас хамаатай юу? Библид цусны жижиг хэсгийн талаар нарийн заавар байдаггүй учир үүнд тодорхой хариу өгөх боломжгүй юм. Цусны олон жижиг хэсгийг эмчилгээнд хэрэглэх зорилгоор донорын цуснаас гаргаж авдаг. Эдгээр бодисыг эмчилгээнд хэрэглэх эсэхээ христиан хүн бүр мөс чанараараа шийдэх учиртай.
Ийм шийдвэр гаргахдаа өөрөөсөө: «Цусны жижиг хэсгүүдээс бүгдээс нь татгалзана гэдэг нь вирусын халдвар болон бусад өвчнийг эмчлэх, эсвэл цусны бүлэгнэх чанарыг сайжруулж, цус тогтоох зорилгоор хэрэглэдэг зарим эм бэлдмэлээс татгалзана гэсэн үг болохыг би ойлгож байгаа бил үү? Цусны зарим жижиг хэсгийг хэрэглэх юм уу хэрэглэхээс татгалзаж байгаагийнхаа учрыг эмчдээ тайлбарлаж чадах уу?» гэж асууж үзээрэй.
Өвчтөний цусыг өөрт нь хэрэглэх зарим эмчилгээний тухайд хувь хүн өөрөө шийдвэр гаргах хэрэгтэйн учир юу вэ?
Христиан хүн донор болох юм уу өөртөө сэлбүүлэх зорилгоор цусаа хадгалуулдаггүй. Гэхдээ өвчтөний цусыг өөрт нь хэрэглэдэг эмчилгээний зарим арга болон цусны шинжилгээ Библийн зарчимтай илт зөрчилдөөд байдаггүй тул өөрийнхөө цусаар эмчилгээ хийлгэх эсэхээ хүн бүр мөс чанараараа шийдэх ёстой.
Тийм шийдвэр гаргахдаа өөрөөсөө: «Биеэс минь гарч эргэлтэд орох цус болон тийн эргэх явцдаа түр саатсан цусыг биеийнхээ нэг хэсэг гэж үзэн, „газар асгахгүй“ байхыг мөс чанар минь зөвшөөрөх үү? (Д.хууль 12:23, 24). Эмчилгээний явцад өөрөөс минь авсан цусны найрлагыг өөрчлөөд, эргүүлээд биед минь хийвэл Библиэр сургасан мөс чанар минь өвдөх үү? Өвчтөний цусыг өөрт нь эргүүлэн хийх бүх эмчилгээнээс татгалзана гэдэг нь гемодиализ болон цусны зохиомол эргэлтийн аппаратын тусламжтайгаар хийх эмчилгээнээс татгалзана гэсэн үг болохыг би ойлгож байгаа бил үү? Шийдвэр гаргахаасаа өмнө залбирч байгаад энэ асуудлыг бодож үзсэн үү?» гэж асуугаарай.
Би ямар шийдвэр гаргах вэ?
Арын хоёр хуудсанд хүснэгт байгаа. Хүснэгт 1-д цуснаас гарган авсан зарим жижиг хэсгийг жагсаан, эмчилгээнд хэрхэн хэрэглэдгийг бичсэн. Алийг нь сонгосноо тэмдэглээрэй. Хүснэгт 2-т өвчтөний цусыг өөрт нь эргүүлэн хийх эмчилгээний түгээмэл аргуудыг дурдсан. Аль аргыг сонгосноо бас тэмдэглээрэй. Энэ хоёр хүснэгт хуулийн баримт бичиг биш ч, ХЗИ (эмнэлгийн тусламжтай холбоотой хүсэл зоригийн илэрхийлэл) хуудсаа бөглөхөд тань тус болно.
Та хэн нэгнийг дуурайлгүй, өөрөө шийдвэр гаргах ёстой. Мөн бусдын шийдвэрийг шүүмжилж болохгүй. Цусны жижиг хэсгийг хэрэглэх болон өөрийнхөө цусаар эмчилгээ хийлгэх тухайд «хүн бүр өөрийн ачааг үүрнэ» (Гал. 6:4, 5).
[Зүүлт]