Айлын хүнийг эргэцүүлэн бодож, зөв дүгнэлтэд хүрэхэд нь тусалъя
1. Дэлгэрүүлэх ажилд ямар арга үр дүнтэй байдаг вэ?
1 Өөрийнхөөрөө зүтгэх эсвэл айлын хүнийг эргэцүүлэн бодуулж, зөв дүгнэлтэд хүргэх хоёрын аль нь дэлгэрүүлэх ажилд үр дүнтэй вэ? Элч Паул Тесалоник хотод иудейчүүдтэй ярилцахдаа хоёр дахь аргыг хэрэглэсэн байдаг. Үүний дүнд «зарим нь ... итгэцгээдэг» (Үйлс 17:2–4). Тэгвэл хүнийг эргэцүүлэн бодуулж, зөв дүгнэлтэд хүргэхэд юу туслах вэ?
2. Сайн мэдээ дэлгэрүүлэхдээ Паулыг хэрхэн дууриах вэ?
2 Сэтгэл санаа, үзэл бодол зэргийг нь харгалзан үзэх: Хэсгийнхээ хүмүүсийг эргэцүүлэн бодож, зөв дүгнэлтэд хүрэхэд нь тусалъя гэвэл үзэл бодлыг нь харгалзан үзэж байх хэрэгтэй. Тухайлбал, Паул Арейпагт Еховад итгэдэггүй грекчүүдтэй ярилцахдаа эхлээд тэдний мэддэг, хүлээн зөвшөөрдөг зүйлийг дурдсан байдаг (Үйлс 17:22–31). Тэгэхлээр, оршил үг бэлдэхдээ ихэнх хүний юунд итгэдэг, юунд тааламжгүй ханддагийг нь тооцож үзэх хэрэгтэй (1 Кор. 9:19–22). Хэрэв айлын хүнийг үгүйсгэх юм уу нааштай хариу өгөхгүй бол тухайн хүний санал нийлэх сэдвийг олж, яриа өрнүүлэхийг хичээгээрэй.
3. Эргэцүүлэн бодуулж, зөв дүгнэлтэд хүргэхэд асуулт тавих нь илүү үр дүнтэй байдгийн учир юу вэ?
3 Асуултыг чадварлаг ашиглах нь: Аялалд гарсан хүний хаана явааг мэдэхгүй бол зорьсон газраа хүрэхэд нь тус болох заавар өгөх аргагүй. Үүнтэй адилаар, үзэл бодлыг нь мэдэхгүйгээр хүнийг эргэцүүлэн бодуулж, зөв дүгнэлтэд хүргэх аргагүй. Есүс хүнийг эргэцүүлэн бодож, зөв дүгнэлтэд хүрэхэд нь туслахын тулд эхлээд үзэл бодлыг нь мэдэх зорилгоор асуулт тавьдаг байсан. Жишээ нь, нэгэн хүнийг: «Мөнх амийг өвлөн авахын тул би яах ёстой вэ?» гэж асуухад Есүс шууд хариулалгүй, асуулт тавьж үзэл бодлыг нь сонирхдог (Лук 10:25–28). Мөн Петрийг нэг асуултад буруу хариулахад ташаа ойлголтыг нь засах гэж асуултыг чадварлаг ашигласан (Мат. 17:24–26). Тэгэхлээр, ярилцагч хүн асуулт тавих юм уу ташаа юм яривал тэр талаар эргэцүүлэн бодуулж, зөв дүгнэлтэд хүргэх зорилгоор асуулт тавьж болно.
4. Хүнийг эргэцүүлэн бодуулж, зөв дүгнэлтэд хүргэх нь ямар үр дүнтэй вэ?
4 Хүнийг эргэцүүлэн бодуулж, зөв дүгнэлтэд хүргэх нь Агуу багш Есүс болон І зууны чадварлаг дэлгэрүүлэгчдийг дууриаж байгаа хэрэг. Бас ярилцагч хүнээ хүндэтгэж байгаагийн шинж юм (1 Петр 3:15). Үүний дүнд тэр хүн бидэнтэй дахиж уулзахыг хүсэж болох шүү дээ.