Дэлгэрүүлэхдээ сэрэмжтэй байцгаая
1. Дэлгэрүүлэхдээ сэрэмжтэй байх хэрэгтэй болж байгаагийн учир юу вэ?
1 «Сүрэг чонон дундах хонь мэт» Бурхны үйлчлэгчид «буруу, гажууд үеийнхний» дунд дэлгэрүүлдэг (Мат. 10:16; Флп. 2:15). Үймээн самуун, эмх замбараагүй явдал, хүн хулгайлах гэх мэтийн хэрэг хаа сайгүй гарах болсон нь «муу хүмүүс ... улам бүр бузар муу болж» байгааг харуулдаг (2 Тим. 3:13). Дэлгэрүүлэхдээ «ухаантай», анхаарал сэрэмжтэй байхад Библийн ямар зарчим туслах вэ? (Мат. 10:16).
2. Ямар нөхцөлд тухайн газраас явж, өөр газар дэлгэрүүлэх нь ухаалаг вэ?
2 Хэрсүү байх: Сургаалт үгс 22:3-т аюулаас сэрэмжилж, хэрсүү байхыг уриалдаг. Сонор сэрэмжтэй байгаарай! Харьцангуй аюулгүй, тайван газарт ч байдал гэнэт өөрчлөгдөж мэднэ. Гудамж талбайд цэрэг цагдаагийнхан ирэх юм уу олон хүн цуглаж болох юм. Айлын хүн сайн санасандаа сэрэмжлүүлэн хэлж магадгүй. Сониуч зандаа хөтлөгдөхийн оронд тэр газраас даруй явж, өөр газар дэлгэрүүлэх нь хэрсүү ухаалаг хэрэг болно (Иох. 8:59; 1 Тес. 4:11).
3. Номлогчийн үгс 4:9-ийн зарчмыг дэлгэрүүлэхдээ хэрхэн хэрэгжүүлэх вэ?
3 Хамт дэлгэрүүлэх: «Ганцаараа байснаас хоёул байх нь илүү дээр болой» гэж Номлогчийн үгс 4:9-д байдаг. Ганцаараа дэлгэрүүлж сурсан байлаа ч одоо цагийн байдал ямар болсныг бодож үзээрэй. Хурлын нутаг дэвсгэрийн зарим хэсэгт аюулгүй байж болох ч зарим хэсгээр Гэрч эмэгтэйчүүд, залуус, ялангуяа оройн цагаар ганцаараа дэлгэрүүлэх нь ухаалаг бус хэрэг болж байна. Дор бүрнээ сонор сэрэмж, анхаарал болгоомжтой байх хэрэгтэй ч хосоороо дэлгэрүүлэх нь илүү тустайг туршлага харуулдаг (Ном. 4:10, 12). Бүлгээр дэлгэрүүлэхдээ ч бусдадаа анхаарал тавьж байгаарай. Явахдаа бусдадаа хэлж байгаарай.
4. Хурлын гишүүд яах нь зүйтэй вэ?
4 Ахлагчид хурлын гишүүдийг «сэрэмжлэн харгалзах» үүргээ биелүүлж нутгийнхаа онцлогт тохирох заавар зөвлөгөө өгөх хэрэгтэй (Евр. 13:17). Бид даруу байж, тэдний зөвлөгөөг дагавал Ехова ивээх нь лавтай (Мика 6:8; 1 Кор. 10:12). Үргэлж сэрэмжтэй, үр өгөөжтэй дэлгэрүүлж, гэрчлэх үйлсэд хувь нэмэр оруулцгаая.