Олон нийтэд дэлгэрүүлэх шинэ арга
1. Танай хурлын хэсэгт олон хөлийн газар байдаг бол яах хэрэгтэй вэ?
1 Хурлын тань хэсэгт олон хөлийн газар байгаа бол ширээ юм уу дугуйтай тавиур тавиад нийтэд дэлгэрүүлэх ажлыг зохион байгуулж болно. Дугуйтай тавиур тавих бол нэг хүн хажууд нь зогсох юм уу сууж болно. Харин ширээ тавих бол хоёр дэлгэрүүлэгч зогсох хэрэгтэй. Ийм даалгавар авсан дэлгэрүүлэгч найрсаг, нөхөрсөг, сонирхсон хүнд туслахад бэлэн байгаарай. Хэрвээ хүн сонирхоод ирвэл дэлгэрүүлэгч «Энэ тухай Библид юу гэж байдгийг мэдэх үү?» гэж асуугаад яриа өрнүүлээрэй. Нийтэд дэлгэрүүлж байгаа газрын ойролцоо нэг юм уу хоёр дэлгэрүүлэгч албан бусаар дэлгэрүүлж болно.
2. Ном хэвлэл тавиад олон нийтэд дэлгэрүүлэх нь ач тустайг харуулах жишээ хэлнэ үү.
2 Ингэж дэлгэрүүлдэг болсноос хойш Библи заалгах хүн олширсон. Нэгэн коллежийн оюутан Еховагийн Гэрчүүдийн талаар судалгааны ажил хийхээр болжээ. Хаанчлалын танхимыг хайгаад олсонгүй. Долоо хоногийн дараа сургуулийнх нь хажууд Гэрчүүд ширээ тавиад дэлгэрүүлж байхыг харжээ. Тэгээд Библи заалгах болов. Харин одоо баптисм хүртсэн дэлгэрүүлэгч болоод өөрөө олон нийтэд дэлгэрүүлж байна.
3. Гудамжинд, олон нийтэд дэлгэрүүлэх талаар зарим дэлгэрүүлэгч ямар саналтай байдаг вэ?
3 Нэг Гэрч эмэгтэй олон нийтэд дэлгэрүүлэх талаар «Хүмүүс хэвлэл тавьсан тавиурын өмнө зогсоод, тарааж байгаа сэтгүүлээс авдаг. Еховагийн Гэрчүүдийн талаар огт сонсож байгаагүй хүмүүс ч ирдэг. Энэ арга хэмжээ олон хүнд ач тусаа өгч байна» гэж хэлжээ. Өөр нэг Гэрч эмэгтэй: «Ингэж шинэ аргаар дэлгэрүүлэх үнэхээр сайхан. Хүмүүс өөрсдөө ирдэг. Сонирхоод ирдэг хүн ч бас байдаг» гэж хэлсэн.
4. Тогтсон нэг өдөр, газар, цагт тавиур юм уу, ширээ тавиад дэлгэрүүлэх нь яагаад үр дүнтэй байдаг вэ?
4 Долоо хоногийн тогтсон нэг өдөр, газар, цагт тавиур юм уу ширээ тавиад нийтэд дэлгэрүүлэх нь үр дүнтэй байдаг. Ингэж дэлгэрүүлж байгааг хүмүүс мэддэг болоод ирэхлээрээ асуулт асууж, ном хэвлэл авахаас санаа зовдоггүй. Танай хурлынхан олон нийтэд дэлгэрүүлдэг үү? Дэлгэрүүлдэг бол, та бас «Бурханы хаанчлалыг газар бүр тунхаглах» ажилд үр бүтээлтэй оролцож байна гэсэн үг (Лук 9:60).