Гэрч эрчүүд ээ, та нар туслах үйлчлэгч болохыг зорьж байна уу?

1. Элч Паул туслах үйлчлэгчдийг хэрхэн үздэг байсан бэ?

ТУСЛАХ үйлчлэгчид хуралдаа маш чухал ажил хийдэг. Элч Паул Филиппой дахь Христийн дагалдагчдад бичсэн захидалдаа ахлагчдаас гадна туслах үйлчлэгчдийг ч дурдан мэндчилжээ. Эндээс үзвэл тэр үнэнч эрчүүдийн ажлыг өндөр үнэлдэг нь тодорхой байна (Флп. 1:1).

2. Луис туслах үйлчлэгчээр үйлчилж байгаагаа хэрхэн үздэг вэ?

² Хөгшин, залуу гэлтгүй баптисм хүртсэн олон Гэрч эрэгтэй туслах үйлчлэгчээр үйлчлэхийн баяр хөөрийг эдэлж байна. Жишээ нь Диван 18 настайдаа, Луис 50 гарсан хойноо туслах үйлчлэгчээр томилогдсон. Луис: «Би хурлынхандаа ийн үйлчилж байгаагаа үнэхээр завшаан гэж үздэг. Тэд маань намайг маш их хайрладаг. Одоо би тэдэндээ хайраа илэрхийлж байна» гэжээ. Олон туслах үйлчлэгч үүнтэй санал нэг байдаг.

3. Энэ өгүүллээр ямар асуултыг ярилцах вэ?

³ Баптисм хүртсэн ч одоохондоо туслах үйлчлэгч болоогүй Гэрч эрэгтэй та ийм зорилго тавих боломжтой юу? Ямар хандлагатай байх ёстой вэ? Библид бичсэн ямар шаардлагыг хангах хэрэгтэй вэ? Энэ өгүүллээр эдгээр асуултын хариуг авна. Харин эхлээд ямар үүрэг гүйцэтгэдгийг ярилцъя.

ТУСЛАХ ҮЙЛЧЛЭГЧИЙН ҮҮРЭГ

4. Туслах үйлчлэгчид ямар үүрэг гүйцэтгэдэг вэ? (Бас зургийг үзээрэй).

⁴ Туслах үйлчлэгч нь агуу хүчээр томилогдсон баптисм хүртсэн эрэгтэй бөгөөд хурлын олон ажил хийж ахлагчдад тусалдаг. Зарим нь хурлынхнаа дэлгэрүүлэх хэсэг болон хэвлэлээр хангах ажлыг хариуцдаг. Бас цуглааны танхим цэвэрлэх, арчилж тордох ажил хийдэг. Мөн цуглааны үеэр зохицуулагчаар үйлчилж, аудио/видео төхөөрөмж ажиллуулна. Ийм бодитой, ач холбогдолтой ажлыг амжуулдаг. Гэхдээ тэд бол юуны түрүүнд Еховаг хайрладаг, хэм хэмжээнийх нь дагуу амьдардаг хүмүүс юм. Түүнчлэн ах дүүсээ чин сэтгэлээсээ хайрладаг (Мат. 22:37–39). Баптисм хүртсэн эрэгтэй хэрхэн туслах үйлчлэгч болох вэ?

5. Туслах үйлчлэгч болохын тулд яах хэрэгтэй вэ?

⁵ Туслах үйлчлэгчийн хангах ёстой шаардлагыг Библид бичсэн байдаг (1 Тим. 3:8–10, 12, 13). Та туслах үйлчлэгч болох хүсэлтэй бол тэдгээр шаардлагыг судалж, хангахын тулд хичээгээрэй. Харин эхлээд яагаад туслах үйлчлэгч болохыг хүсэж байгаагаа бодоорой.

ТА ЯМАР ХАНДЛАГАТАЙ ВЭ?

6. Юунд хөтлөгдөн ах дүүстээ үйлчлэх ёстой вэ? (Матай 20:28; бас зургийг үзээрэй).

⁶ Бидэнд дуурайвал зохих жишээ үлдээсэн Есүсийг бодъё. Тэрбээр Эцгээ, хүмүүсийг гэсэн хайрандаа хөтлөгдөн бүхнийг хийдэг байсан. Тийм ч учраас хичээнгүйлэн үйлчилж, хүмүүсийн дорд гэж үздэг ажлыг хийсэн (Матай 20:28-ыг уншина; Ёох. 13:5, 14, 15). Та ч ийм хайранд хөтлөгддөг бол Ехова ивээж, туслах үйлчлэгчийн шаардлага хангахад тань тусална (1 Кор. 16:14; 1 Петр 5:5).

7. Нэр алдрын хойноос хөөцөлдөж туслах үйлчлэгч болохыг зорих нь яагаад буруу вэ?

⁷ Энэ ертөнцийнхөн бусдын анхаарлыг өөртөө татдаг хүнийг биширдэг. Харин Еховагийн үйлчлэгчид тийм биш. Есүс шиг хайрандаа хөтлөгддөг Гэрч эрэгтэй эрх мэдэл, байр суурьд дурладаггүй. Нэр алдрын хойноос хөөцөлддөг хүн хуралд хариуцлагатай үүрэг гүйцэтгэх болбол өөрийгөө их юманд бодож, Еховагийн үнэ цэнтэй хоньдын төлөө хийх шаардлагатай аар саар зарим ажлаас татгалзаж болох юм (Ёох. 10:12). Хүчин чармайлт гаргадаг ч амин хувиа боддог, бардам хүнийг Ехова ивээхгүй (1 Кор. 10:24, 33; 13:4, 5).

8. Есүс элч нартаа юу гэж зөвлөсөн бэ?

⁸ Есүсийн дотнын найзууд ч буруу хандлага өвөрлөн чухал үүрэг биелүүлэхийг хүссэн удаатай. Жишээ нь элч Яаков Ёохан хоёр яасныг бодъё. Тэд Хаант төрд дээгүүр байр суурьтай болгож өгөхийг Есүсээс гуйдаг. Ийнхүү нэр алдрын хойноос хөөцөлдсөн тэднийг Есүс сайшаагаагүй. Харин ч бүр «Та нарын хэн нь агуу болохыг хүснэ, тэр нь та нарт үйлчлэх ёстой. Та нарын хэн нь тэргүүн байхыг хүснэ, тэр нь бүгдийн боол байх ёстой» гэж 12 элчдээ хэлсэн (Марк 10:35–37, 43, 44). Итгэл нэгтнүүддээ үйлчилье гэсэн зөв хандлагатай Гэрч эрчүүд хуралд хэрэгтэй (1 Тес. 2:8).

БУСДАД ҮЙЛЧЛЭХ ХҮСЛЭЭ ХЭРХЭН БАДРААХ ВЭ?

9. Бусдад үйлчлэх хүслээ хэрхэн бадраах вэ?

⁹ Та Еховаг хайрладаг, бусдад үйлчлэхийг хүсдэг нь лавтай. Гэсэн ч туслах үйлчлэгч болоод үүрэг даалгавар биелүүлэх хүсэлгүй байж болох юм. Тэгвэл ах дүүстээ үйлчлэх хүслээ хэрхэн бадраах вэ? Туслах үйлчлэгчээр үйлчлэхийн баяр хөөрийг бодож үзээрэй. Есүс: «Авахаасаа өгөх нь илүү жаргалтай» гэжээ (Үйлс 20:35). Тэрбээр өөрөө ч энэ үгийнхээ дагуу бусдад үйлчилж жинхэнэ баяр хөөр эдэлсэн. Та ч мөн ийм баяр хөөрийг амсана.

10. Есүс бусдад үйлчлэх дуртай нь ямар явдлаас харагдсан бэ? (Марк 6:31–34).

¹⁰ Есүс бусдад үйлчлэх дуртайг харуулсан нэг явдлыг ярилцъя (Марк 6:31–34-ийг уншина). Тэрбээр элч нартайгаа хамт дэлгэрүүлээд маш их ядарсан байв. Тэд хэсэг зуур амрахаар хүнгүй газар луу явжээ. Гэтэл Есүсийн сургаалыг сонсох гэсэн олон хүн түрүүлээд тэр газар нь оччихсон байв. Есүс болон элч нар «юм идэх ч завдал гараагүй» байсан болохоор татгалзах юм уу эсвэл ганц, хоёрхон сургаал заагаад тэднийг тарааж болох л байлаа. Гэхдээ хайрандаа хөтлөгдөн «олон зүйлийг зааж эхэлсэн». Бүр «орой болтол» заажээ (Марк 6:35). Тэрбээр ингэх ёстой гэж бодсон юм биш, харин хүмүүсийг «өрөвдсөн». Тийм ээ, хайрласандаа заахыг хүссэн. Бусдад үйлчлээд туйлын их баяр хөөртэй болдог байв.

11. Есүс сургаалыг нь сонссон хүмүүст ямар бодитой тусламж үзүүлсэн бэ? (Бас зургийг үзээрэй).

¹¹ Есүс хүмүүст заагаад зогсохгүй гайхамшиг үйлдэн тэднийг хооллосон. Тэрбээр талх, загасыг хувааж, шавь нараараа тараалган бусдад хэрхэн үйлчлэхийг заасан (Марк 6:41). Мөн ийм энгийн ажил маш чухал гэдгийг ойлгуулсан. Өнөөгийн туслах үйлчлэгчдийн ажил ч үүнтэй төстэй. Есүстэй хамтарч ажилласан элч нар «бүх хүнийг идэж цадахыг» хараад ямар их баярласан бол оо! (Марк 6:42). Есүс өөрийгөө бодохоос илүү бусдын сайн сайхныг бодсон явдал ганц үүгээр тогтохгүй. Дэлхийд байх бүхий л хугацаандаа хүмүүст үйлчилсэн (Мат. 4:23; 8:16). Тэдэнд зааж, хэрэгцээг нь хангаад сэтгэл хангалуун, баяр хөөртэй байсан. Та ч туслах үйлчлэгч болж бусдад дуртайяа үйлчилбэл баяр хөөрөөр бялхах нь дамжиггүй.

12. Хуралдаа тус нэмэр болж чадахгүй гэж яагаад бодох ёсгүй вэ?

¹² Өөрийгөө ямар ч авьяас чадваргүй гэж боддог бол сэтгэлээр битгий унаарай. Хурлынхандаа үйлчлэхэд хэрэг болох зан чанар танд ч байгаа. Залбирч байгаад 1 Коринт 12:12–30-д бичсэн Паулын үгийг эргэцүүлэн бодоорой. Тэгвэл Еховагийн бусад үйлчлэгчийн адилаар та ч хуралдаа хэрэгтэй, чухал үүрэгтэй хүн гэдгээ ойлгоно. Одоохондоо туслах үйлчлэгчийн шаардлага хангаагүй ч бүү бууж өгөөрэй. Харин Ехова болон ах дүүстээ хэрэгтэй хүн байхын тулд чадахыгаа хийгээрэй. Ахлагчид таны чадварыг бодолцон тохирсон даалгавар өгнө гэдэгт итгээрэй (Ром 12:4–8).

13. Томилогдсон эрчүүдийн хангах ёстой ихэнх шаардлагын тухайд юу хэлж болох вэ?

¹³ Бас туслах үйлчлэгчдийн хангах ёстой шаардлагуудын ихэнхийг Христийн бүх дагалдагч хангах хэрэгтэй байдаг. Бүгд л Еховатай дотносож, бусдад өгөхийн баяр хөөрийг эдэлж, Бурхны таалалд нийцүүлэн амьдрах учиртай. Ингэж бодохоор та шаардлагын ихэнхийг хангасан байж таарна. Тэгвэл туслах үйлчлэгч болохын тулд яг ямар шаардлага хангах вэ?

ШААРДЛАГУУДЫГ ХЭРХЭН ХАНГАХ ВЭ?

14. «Хүндэтгэл хүлээсэн» хүн ямар байдаг вэ? (1 Тимот 3:8–10, 12).

¹⁴ 1 Тимот 3:8–10, 12-т хангах ёстой шаардлагуудыг бичсэн (уншина). Одоо заримыг нь ярилцъя. Туслах үйлчлэгч «хүндэтгэл хүлээсэн» хүн байх ёстой. Үүнийг бас «нухацтай», «хариуцлагатай» гэж орчуулж болно. Энэ нь ерөөсөө инээхгүй, хошигнохгүй гэсэн үг биш (Ном. 3:1, 4). Харин бүх үүрэг даалгавартаа нухацтай хандана гэсэн үг. Ямар ч ажлыг ягштал биелүүлдгийг тань хурлынхан хараад итгэнэ, хүндэтгэнэ.

15. «Хоёр нүүргүй», «эдийн шуналгүй» гэдэг нь юу гэсэн үг вэ?

¹⁵ «Хоёр нүүргүй» гэдэг нь чин сэтгэлтэй, үнэнч шударга байхыг хэлнэ. Ийм хүн хэлсэндээ хүрдэг, бусдыг хуурч мэхэлдэггүй (Сур. 3:32). «Эдийн шуналгүй» гэдэг нь бизнес болон мөнгө төгрөгийн асуудлаар үнэнч шударга байхыг хэлнэ. Мөнгө олох зорилгоор итгэл нэгтнүүдээ ашигладаггүй.

16. а) Ямар хүнийг «дарсыг хэтрүүлж уудаггүй» гэх вэ? б) «Мөс сайтай» хүн ямар байдаг вэ?

¹⁶ «Дарсыг хэтрүүлж уудаггүй» хүн согтууруулах ундааг хэтрүүлж хэрэглэдэггүй, бусад нь ч түүнийг их уудаг гэж үздэггүй. «Мөс сайтай» хүн Еховагийн хэм хэмжээний дагуу амьдардаг. Төгс бус хэдий ч Бурхантай сайн харьцаатай учраас сэтгэл зовох юмгүй байдаг.

17. «Шаардлага хангаж байгаа эсэх нь шалгагдаж» байгаа Гэрч эрэгтэй найдвартай хүн гэдгээ хэрхэн батлах вэ? (1 Тимот 3:10; бас зургийг үзээрэй).

¹⁷ Ямар хүнийг «шаардлага хангаж байгаа эсэх нь шалгагдсан» гэх вэ? Хариуцлагатай үүрэг даалгаж болно гэж ахлагчдын дүгнэсэн хүнийг хэлнэ. Тиймээс ахлагчид ямар нэгэн даалгавар өгвөл тэдний болон байгууллагын удирдлага зааврын дагуу нямбай биелүүлээрэй. Яг юу хийх, хэзээ дуусгах ёстойгоо тодорхой мэдэж аваарай. Даалгавар бүрээ хичээнгүйлэн биелүүлбэл ахиц гаргаж байгааг тань хурлынхан анзаарч, өндөр үнэлнэ. Ахлагчид аа, баптисм хүртсэн эрчүүдэд зааж сургахаа бүү хойш тавиарай (1 Тимот 3:10-ыг уншина). Танай хуралд баптисм хүртсэн арван хэдтэй эсвэл түүнээс доош насны хөвгүүд бий юү? Тэд бие дааж судлах хэвшилтэй юү? Цуглаан дээр тогтмол хариулж, бас дэлгэрүүлдэг үү? Тийм бол нас, нөхцөл байдалд нь тохирсон даалгавар өгөөрэй. Ийнхүү хөвгүүдийн «шаардлага хангаж байгаа эсэх нь шалгагдана». Тэгээд 20 хүрэхээсээ өмнө туслах үйлчлэгчийн шаардлага хангаж болох юм.

18. «Гэм зэмгүй» гэдгээр ямар хүнийг хэлэх вэ?

¹⁸ «Гэм зэмгүй» гэдгээр ямар нэг ноцтой алдаа гаргаагүй, буруутгах юмгүй хүнийг хэлнэ. Христийн дагалдагч хүнийг ямар ч үндэслэлгүйгээр буруутгаж магадгүй. Хүмүүс Есүсийг хэрэг хийгээгүй байтал гүтгэж гүжирдсэн. Шавь нарт нь ч ийм явдал тохиолдохыг тэрбээр хэлсэн (Ёох. 15:20). Гэхдээ та Есүсийн адилаар биеэ зөв авч явдаг бол хурлын хамт олны дунд сайн нэртэй байна (Мат. 11:19).

19. «Нэг эхнэртэй» байх гэдгийг юу гэж ойлгох вэ?

¹⁹ «Нэг эхнэртэй» байх. Ехова анх гэр бүлийг үүсгэн байгуулахдаа нэг эрэгтэй нэг эмэгтэйтэй гэрлэх ёстой гэсэн. Энэ зарчмыг Христийн бүх дагалдагч баримтлах учиртай (Мат. 19:3–9). Мөн хэзээ ч садар самуун явдалд орооцолдох ёсгүй (Евр. 13:4). Гэхдээ ингээд л болчихгүй. Эхнэртээ үнэнч байж, өөр эмэгтэйтэй сээтэгнэх ёсгүй (Иов 31:1).

20. Хэрхэн өрхийн сайн тэргүүн байх вэ?

²⁰ «Үр хүүхдээ сайн хүмүүжүүлдэг, өрхийн сайн тэргүүн байх ёстой». Та өрхийн тэргүүн бол үүрэгтээ нухацтай хандах хэрэгтэй. Гэр бүлийн хичээл тогтмол хийгээрэй. Эхнэр, хүүхэдтэйгээ дэлгэрүүлээрэй. Еховатай дотно харьцаа тогтооход нь хүүхдэдээ туслаарай (Эф. 6:4). Гэр бүлийнхэндээ санаа тавьдаг хүн хурлынхандаа ч санаа тавьж чадна (1 Тимот 3:5-тай харьцуулаарай).

21. Та хараахан туслах үйлчлэгч болоогүй бол яах хэрэгтэй вэ?

²¹ Хараахан туслах үйлчлэгч болоогүй Гэрч эрчүүд ээ, та нар энэ өгүүлэлд бичсэнийг залбирч байгаад эргэцүүлэн бодоорой. Туслах үйлчлэгчид тавигддаг шаардлагуудыг судалж, хангахыг хичээгээрэй. Еховаг болон ах дүүсээ хэчнээн их хайрладгаа бодоорой. Тэдэнд үйлчлэх хүслээ бадраагаарай (1 Петр 4:8, 10). Итгэл нэгтнүүддээ үйлчлэхийн баяр хөөрийг амсаарай. Туслах үйлчлэгч болохыг зорьж байгаа таныг Ехова арвин ихээр ивээх болтугай! (Флп. 2:13).