Та одоо ч Библийн үндсэн сургаалаас ач тус хүртдэг үү?

1. Библийн үндсэн сургаал танд хэрхэн нөлөөлсөн бэ?

БИБЛИЙН үндсэн сургаалын ачаар амьдрал маань их өөрчлөгдсөн. Жишээ нь Бурхны нэр Ехова гэдгийг мэдсэн нь түүнтэй дотносох эхний алхам байсан (Ис. 42:8). Хүн үхээд яадгийг мэдээд нас барсан хайртай хүмүүс маань зовж байгаа болов уу гэж санаа зовохоо больсон (Ном. 9:10). Бас дэлхий диваажин болно гэсэн Бурхны амлалтын тухай мэдэж аваад ирээдүйгээ өөдрөгөөр хардаг болсон. Хүн ердөө 70, 80-хан жил наслах биш, үүрд мөнх амьдарна гэдэгт итгэдэг болсон (Дуу. 37:29; 90:10).

2. 2 Петр 1:12, 13-аас үзвэл Библийн үндсэн сургаал Христийн төлөвшсөн дагалдагчдад ч тустай гэж яагаад хэлэх вэ?

² Бид Библийн үндсэн сургаалыг хэзээ ч дутуу үнэлэх ёсгүй. Элч Петр «мэддэг үнэнийхээ дагуу бат зогсдог» Христийн дагалдагчдад зориулж хоёр дахь захидлаа бичсэн (2 Петр 1:12, 13-ыг уншина). Тухайн үед үнэн сургаалаас холдуулах зорилготой хуурамч багш нар, үнэнч бус хүмүүс хуралд байжээ (2 Петр 2:1–3). Тиймээс Петр нөлөөнд нь автахгүй байхад нь ах дүүстээ тусалж батжуулахыг хүссэн. Тэгээд аль хэдийн мэддэг зарим сургаалыг нь захидалдаа сануулжээ. Энэ нь эцэс хүртэл үнэнч байхад нь тусалсан.

3. Христийн бүх дагалдагч Библийн үндсэн сургаалыг эргэцүүлэн боддог байх хэрэгтэйг жишээгээр тайлбарлана уу.

³ Христийн дагалдагч төлөвших тусам Библийн үндсэн сургаалаас шинэ юм мэдэж авах нь бий. Жишээгээр бодъё. Туршлагатай ба шинэхэн тогоочийн хэн хэн нь яг адилхан материалаар хоол хийхээр болов. Туршлагатай нь материалынхаа онцлогийг сайн мэддэг тул шинэ содон, янз бүрийн хоол хийж чаддаг. Үүнтэй адил, Еховад олон жил үйлчилсэн хүн Библийн шинэхэн суралцагчийг бодвол нэг зүйлээс янз янзын сургамж авдаг. Баптисм хүртсэн тэр цагаас хойш бидний нөхцөл байдал, Еховад хэрхэн үйлчилж байгаа маань өөрчлөгдсөн байх. Өмнө нь мэдэж авсан сургаалаа одоогийнхоо нөхцөлд хэрэгжүүлбэл шинэ, хэрэгтэй юмыг ойлгож болох юм. Одоо, Христийн төлөвшсөн дагалдагч Библийн үндсэн 3 сургаалаас юу мэдэж авч болохыг ярилцъя.

ЕХОВА БОЛ БҮТЭЭГЧ

4. Ехова бол Бүтээгч гэдэг үнэн бидэнд хэрхэн нөлөөлсөн бэ?

⁴ «Бүх юмыг барьж бүтээсэн нь Бурхан мөн» (Евр. 3:4). Манай гараг болон түүн дээрх амьд бүхнийг төгс мэргэн ухаантай, төгс хүчтэй Бүтээгч бүтээснийг бид мэддэг. Мөн биднийг ч бүтээсэн учраас нэвт шувт мэддэг. Үүгээр барахгүй бидэнд санаа тавьдаг, юу хамгийн сайныг мэддэг. Ехова бол Бүтээгч гэсэн энэ энгийн үнэн бидэнд маш их нөлөөлж, амьдрал маань жинхэнэ ёсоор утга учиртай, зорилготой болсон.

5. Юуг бодохлоор бид даруу болдог вэ? (Исаиа 45:9–12).

⁵ Ехова бол Бүтээгч гэдэг үнэн даруу байх ёстойг бидэнд ойлгуулдаг. Иов өөрийгөө хэтэрхий их анхаарч, өөрийнхөө зөвийг батлах гэхэд Ехова төгс хүчит Бүтээгч гэдгээ сануулсан (Иов 38:1–4). Үүний ачаар Бурхны зам хүнийхээс хамаагүй давуу гэдгийг Иов ойлгосон. Зөнч Исаиа бас хожим нь «Шавар нь ваарчнаасаа “Та юу хийгээд байна вэ?” гэж асуух уу?» хэмээн бичжээ (Исаиа 45:9–12-ыг уншина, ШЕ).

6. Ялангуяа ямар үед агуу Бүтээгч Еховагийнхаа тухай эргэцүүлэх нь чухал вэ? (Бас зургийг үзээрэй).

⁶ Христийн дагалдагч хүн туршлагатай болох тусам удирдлага заавар хайн Еховад залбирч, Үгийг нь уншихын оронд өөрийн үзэл бодлыг чухалчлан үздэг болж мэдэх юм (Иов 37:23, 24). Харин тэрбээр Бүтээгчийнхээ хосгүй мэргэн ухаан, сүр хүчийг эргэцүүлэн бодвол яах вэ? (Ис. 40:22; 55:8, 9). Өөрийн эрхгүй даруу болж, өөрийн үзэл бодлыг чухалд үзэхээ болино.

7. Рахела шинэ зааврыг хүлээн зөвшөөрөхийн тулд яасан бэ?

⁷ Бүтээгчийнхээ тухай бодох нь байгууллагын шинэ зааврыг хүлээж авахад тустай гэдгийг Словенид амьдардаг Рахела ойлгосон. Тэрбээр: «Заримдаа удирдах үүрэгтэй хүмүүсийн гаргасан шийдвэрийг хүлээн зөвшөөрөх амаргүй байдаг. Жишээ нь би “2023 оны Удирдах Зөвлөлийн тайлан мэдээ №8”-ыг үзсэн мөртлөө сахалтай хүн илтгэл тавихыг анх хараад шоконд орсон. Тиймээс энэ өөрчлөлтөд дасахад туслахыг Еховагаас гуйн залбирсан» гэжээ. Тэнгэр газрын Бүтээгч Ехова байгууллагаа зөв чиглүүлж удирдах бүрэн чадвартайг Рахела ойлгосон. Хэрэв танд шинэ ойлголт юм уу шинэ зааврыг хүлээн зөвшөөрөхөд амаргүй санагдвал даруу байн Бүтээгчийнхээ агуу мэргэн ухаан, хүч чадлын талаар эргэцүүлэн бодоорой (Ром 11:33–36).

БУРХАН ЗОВЛОН ЗҮДҮҮРИЙГ ЯАГААД ХҮЛЦЭН ЗӨВШӨӨРДӨГ ВЭ?

8. Бурхан зовлон зүдүүрийг хүлцэн зөвшөөрдгийн учрыг мэдсэн нь танд ямар ач тустай байсан бэ?

⁸ Бурхан зовлон зүдүүрийг яагаад хүлцэн зөвшөөрдөг вэ? Энэ асуултын хариуг мэддэггүй хүмүүс Бурханд уурлах юм уу Бурхан байдаггүй гэж дүгнэдэг (Сур. 19:3). Харин та Ехова буруугүй бөгөөд зовлонгийн шалтгаан нь нүгэл, төгс бус байдал гэдгийг мэддэг болсон. Бас Ехова хүлцэн тэвчдэгийн ачаар улам олон хүн түүний тухай, бас зовлонг хэрхэн бүрмөсөн арилгахыг нь мэдэж авч байгааг ойлгодог болсон (2 Петр 3:9, 15). Эдгээр үнэнийг мэдээд та тайвширч, Еховатай улам дотноссон.

9. Ехова зовлонг хүлцэн зөвшөөрдгийн учрыг ямар үед бодох хэрэгтэй вэ?

⁹ Ехова зовлонг арилгатал тэвчээртэй хүлээх хэрэгтэйгээ бид ойлгодог. Гэхдээ өөрөө эсвэл хайртай хүнээ зовж зүдрэх, шударга бус явдалд өртөх, үхэл хагацал үзэхлээрээ Ехова яагаад энэ бүхнийг хурдан арилгахгүй байгаа юм бэ гэсэн бодол төрж болох юм (Хаб. 1:2, 3). Ийм үед шударга хүн зовохыг Ехова яагаад зөвшөөрдгийг эргэцүүлэн бодох нь ухаалаг юм (Дуу. 34:19).a Бас зовлон бэрхшээлд цэг тавина гэсэн Еховагийн санаа зорилгын тухай тунгаан бодоорой.

10. Ээжийгээ алдсан Анн хэрхэн тайвширдаг вэ?

¹⁰ Зовлонгийн тухай үнэнийг мэддэг маань тэвчихэд тус болдог. Энэтхэгийн далайд орших Майотта арал дээр амьдардаг Анн: «Хэдэн жилийн өмнө би ээжийгээ алдаад их гашуудсан. Харин Ехова зовлон учруулдаггүй гэдгийг өөртөө дандаа сануулдаг. Тэрбээр бүх зовлонг арилгаж, хайртай хүмүүсийг маань амилуулахыг хүсэн тэмүүлдэг. Хэчнээн хэцүү байсан ч эдгээрийн тухай бодохлоор тайвширчихдаг» гэжээ.

11. Ехова зовлон зүдүүрийг хүлцэн зөвшөөрдгийн учрыг бодохоор дэлгэрүүлээд байх урамтай болдог гэж яагаад хэлэх вэ?

¹¹ Бурхан зовлон зүдүүрийг яагаад хүлцэн зөвшөөрдгийг бодохоор дэлгэрүүлсээр байх урам зориг ордог. Гэмшсэн хүмүүс Еховагийн тэвчээрийн ачаар аврагдахыг Петр тайлбарласныхаа дараа «Та нар биеэ хэрхэн авч явдгаа, юу хийдгээ бодох нь зүйтэй. Та нар ариун байж, Бурханд үнэнчээ үйлсээрээ батлах ёстой» гэжээ (2 Петр 3:11). «Бурханд үнэнчээ ... батлах» үйлсэд дэлгэрүүлэх ажил ордог. Бид тэнгэрийн Эцгийнхээ адилаар хүмүүсийг хайрладаг. Тэднийг Бурхны шударга ёс ноёлсон шинэ ертөнцөд амьдраасай гэж хүсдэг. Ехова тэвчээртэй байж таны амьдарч байгаа газрын хүмүүст ч өөрийг нь шүтэх боломж олгодог. Төгсгөл ирэхээс өмнө Бурхантай хамтран ажиллаж, түүний тухай мэдэхэд нь аль болох олон хүнд тусалж байгаа маань юутай завшаан бэ! (1 Кор. 3:9).

БИД «ЭЦСИЙН ӨДРҮҮДЭД» АМЬДАРДАГ

12. «Эцсийн өдрүүдэд» амьдарч байгаагийн баталгааг харахлаар бид яадаг вэ?

¹² «Эцсийн өдрүүдэд» хүмүүс ямар болохыг Библид яг таг зөгнөжээ (2 Тим. 3:1–5). Энэ зөгнөл биелж байгаа нь эргэн тойрноо харахад л илт байдаг. Хүмүүсийн хандлага улам муудаж байгааг харахаар Бурхны Үг үнэн гэдэгт итгэх итгэл маань батаждаг (2 Тим. 3:13–15).

13. Лук 12:15–21-д байдаг Есүсийн ярьсан жишээг эргэцүүлэн бодоод өөрөөсөө юу гэж асууж болох вэ?

¹³ Бид эцсийн өдрүүдэд амьдарч байгаагаа мэддэг учир үнэхээр чухал юмаа анхаардаг. Яагаад ингэх хэрэгтэйг Лук 12:15–21-д байдаг Есүсийн ярьсан жишээнээс ойлгож авна (уншина). Баян залууг яагаад «мунхаг» гэсэн бэ? Баян учраас бус, чухал юмаа анхаараагүй учраас юм. Тэрбээр «өөрийнхөө төлөө эд хөрөнгө хураасан» ч «Бурхны хувьд ядуу» ажээ. Үүнийг яагаад том алдаа гэх вэ? Бурхан түүнд «Өнөө шөнө чи үхнэ» гэсэн. Өнөөгийн тогтолцоо дуусах дөхөж байгаа энэ цаг үед амьдардаг бид өөрсдөөсөө ийн асууж болох юм. «Тавьсан зорилгоос минь үнэхээр чухал зүйлийг анхаардаг нь харагддаг уу? Зөв зорилго тавихад нь хүүхдэдээ тусалдаг уу? Цаг хүч, мөнгө төгрөгөө өөрийнхөө төлөө зориулдаг уу, эсвэл тэнгэрт эд хөрөнгө хураахад зориулдаг уу?»

14. Микигийн жишээнээс харвал эцсийн өдрүүдэд амьдарч байгаагийн баталгааг эргэцүүлэн бодох нь яагаад ухаалаг вэ?

¹⁴ Эцсийн өдрүүдэд амьдарч байгаагийн баталгааг эргэцүүлэн бодвол амьдралын талаарх үзэл маань өөрчлөгдөнө. Мики гэдэг Гэрч эмэгтэй яг ингэжээ. Тэрбээр: «Би ахлах сургуулиа төгссөнийхөө дараа амьтан судалдаг ажил хиймээр байсан. Мөн байнгын эхлэгч болж, хэрэгцээ ихтэй газар үйлчлэх зорилготой байв. Хүссэн ажлаа хийхийн зэрэгцээ эхлэгчээр үйлчлэх боломжтой эсэхийг сайтар бодож үзэхийг төлөвшсөн найзууд маань зөвлөсөн юм. Энэ тогтолцооны төгсгөл ойртож байгааг ч сануулсан. Шинэ ертөнцөд хүссэн амьтдаа үүрд судлах боломжтой шүү дээ. Тиймээс би ажлын ур чадвар эзэмших богино хугацааны сургалтад суухаар шийдлээ. Тэгээд байнгын эхлэгчээр үйлчлэх боломжтой ажилд орсон. Хожим нь хэрэгцээ ихтэй Эквадор луу нүүсэн» гэжээ. Одоо Мики нөхөртэйгөө тэнд дүүргийн ажил хийдэг.

15. Сайн мэдээг хүлээж аваагүй хүмүүс хожим нь яаж магадгүй вэ? Жишээ хэлнэ үү (Бас зургийг үзээрэй).

¹⁵ Хүмүүс сайн мэдээг хүлээж аваагүй бол бид сэтгэлээр унах ёсгүй. Хүмүүс өөрчлөгддөг. Есүсийн дүү Яаковын тухай бодъё. Тэрбээр Есүсийг өсөн торниж, Мессиа болон тодорч, хэн хүнээс илүү чадварлаг заадгийг нь харсан. Гэхдээ дагалдагч нь болоогүй. Харин Есүсийг амилсны дараа л шавь нь, бүр идэвх зүтгэлтэй шавь нь болсон! (Ёох. 7:5; Гал. 2:9).b Библийг сонирхдоггүй хамаатан юм уу Хаант төрийн тухай мэдээ хүлээж авдаггүй хүмүүст шантралгүй дэлгэрүүлээрэй. Бид эцсийн өдрүүдэд амьдарч байгаа тул дэлгэрүүлэх нь хойшлуулшгүй чухал ажил гэдгийг санаарай. Таны хэлсэн үгийг тэд хожим нь, бүр агуу их гамшгийн үед санаж болох юм.c

БИБЛИЙН ҮНДСЭН СУРГААЛААС АЧ ТУС ХҮРТСЭЭР БАЙГААРАЙ

16. Та Библийн үндсэн сургаалаас ямар ач тус хүртдэг вэ? (Бас «Бусдад туслахдаа ашиглаарай» гэсэн хавсралтыг үзээрэй).

¹⁶ Байгууллагаас өгдөг Библид үндэслэсэн зарим мэдээлэл Библийн тухай бараг мэддэггүй хүмүүст зориулсан байдаг. Жишээлбэл долоо хоног бүрийн нийтийн илтгэл, мөн сэтгүүл, jw.org сайт дахь өгүүлэл, видеонуудын зарим нь Гэрч биш хүмүүст зориулагддаг. Гэхдээ бид ч тэдгээрээс ач тус хүртдэг. Еховаг гэсэн хайр маань лавширч, Үгэнд нь итгэх итгэл батжиж, Библийг улам сайн заадаг болоход тустай (Дуу. 19:7).

17. Ямар үед Библийн үндсэн сургаалын талаар тунгаан бодож болох вэ?

¹⁷ Еховагийн Гэрчүүд бид Библийн үнэнийг илүү зөв ойлгоод сэтгэл догдолдог. Гэхдээ анх мэдэж авсан Библийн үндсэн сургаалыг ч их эрхэмлэдэг. Тэр үнэний ачаар бид Еховатай дотносож эхэлсэн. Хэрэв Еховагийн байгууллагын удирдлага зааврыг гэхээсээ илүү өөрийн үзэл бодлыг чухалчлах гээд байвал даруу байж төгс хүчтэй, агуу мэргэн ухаантай Бүтээгч байгууллагыг удирдаж байгааг санаарай. Өөрөө юм уу хайртай хүн маань соригдож байгаа бол Ехова яагаад зовлонг хүлцэн зөвшөөрдгийг тунгаан бодож тэвчээртэй байгаарай. Бас цаг хүчээ юунд зориулахаа шийдэх болбол эцсийн өдрүүдэд амьдарч байгаагаа, юу нь үнэхээр чухал болохыг санаарай. Биднийг хүчтэй, урам зоригтой, мэргэн ухаантай болгодог Библийн үндсэн сургаалаас цаашдаа ч ач тус хүртэцгээе.