Христийн дагалдагч хүн ямар байх ёстой вэ?—Библид юу гэж байдаг вэ?

Өөрсдийгөө Христийн дагалдагч хэмээн бахархан хэлэх хүн дэлхийн өнцөг булан бүрд олон байдаг хэдий ч бусдад харгис ханддаг нэгэн тэдний дунд байдаг нь харамсалтай. Зарим нь хувиа хичээсэн, шударга бус, өрөвдөх сэтгэлгүй байдаг бол харин зарим нь хань ижлийнхээ итгэлийг даадаггүй. Тийм үйлдлийг нь анзаарсан хүмүүс «Христийн дагалдагч хүн ямар байх ёстой юм бол?» хэмээн гайхширах нь бий.

Христийн дагалдагч хүн ямар байх ёстой вэ?

«Би Христийн дагалдагч» гэж хэлэхэд амархан. Гэхдээ ингэж хэлээд л Христийн дагалдагч болчихгүй. Библид тэмдэглэснээр Есүсийн шавь нарыг Христийн дагалдагч гэдэг (Үйлс 11:26). Есүс өөрөө ч «хэрэв та нар хэлснийг минь биелүүлдэг бол миний дагалдагч үнэхээр мөн» хэмээсэн (Ёохан 8:31). Мэдээж хэн ч Есүсийн үгийг төгс төгөлдөр биелүүлж чадахгүй. Гэхдээ Христийн дагалдагч хүн Есүсийн сургаалыг ягштал баримтлахыг хичээж, тэр нь амьдралынх нь бүхий л хүрээнээс харагддаг байх ёстой. Зарим жишээг авч үзье.

Бусдыг гэсэн хайрын сэтгэл

Есүсийн үг сургаал: «Бие биеэ хайрла гэсэн шинэ тушаалыг би өгч байна. Би та нарыг яаж хайрласны адил та нар бие биеэ тийн хайрла. Та нар бие биеэ хайрладаг бол үүгээр тань бүх хүн та нарыг миний шавь гэж мэднэ» (Ёохан 13:34, 35).

Есүсийн үйл хэрэг: Есүс хүмүүсийг байр суурь, удам угсаа, хөрөнгө чинээгээр нь үл ялган бүгдийг нь хайрладаг байсан. Өвдсөн нэгнийг эдгээж, өлсөж явааг нь хооллож, тэр байтугай өөрийн амиа бусдын төлөө золиосолсон (Матай 14:14–21; 20:28).

Христийн дагалдагчдын үйлс: Христийн дагалдагчдын бусдыг гэсэн хайрын сэтгэл хэнийг ч алаг үзэлгүй өгөөмөр, энэрэнгүй ханддагаас нь харагддаг. Тэд ядарч зовж яваа хүмүүст тусламжийн гараа сунган бусдын төлөө өөрсдийн эрх ашгаа дуртайяа хойш тавьдаг (1 Ёохан 3:16).

Шударга зан чанар

Есүсийн үг сургаал: «Би бол ... үнэн» (Ёохан 14:6).

Есүсийн үйл хэрэг: Есүсийн хэлсэн хийсэн бүхэн үнэн зөв, шулуун шударга байсан. Тэрбээр хэзээ ч хууран мэхэлж, худлаа ярьж байгаагүй. Мөн Есүс шударга зөв зантайгаараа олонд алдартай байсан бөгөөд өөрөө хохирол амсах байсан ч шударга зангаа гээгээгүй (Матай 22:16; 26:63–67).

Христийн дагалдагчдын үйлс: Христийн дагалдагч хүн худал ярьдаггүй, хулгай хийдэггүй. Тэд татвараа бүрэн төлж, ажлаа үнэнчээр хийдэг (Ром 13:5–7; Эфэс 4:28). Мөн бусдыг залилан мэхэлж, шалгалт дээр хуулах юм уу аль эсвэл ажлын анкет болон бусад баримт бичигт худал мэдээлэл оруулдаггүй (Еврей 13:18).

Энэрэнгүй үйлс

Есүсийн үг сургаал: «Эцэж туйлдсан, хүнд ачаа үүрсэн та нар бүгдээрээ над руу ир. Би та нарыг сэргээнэ. Буулгыг минь өөр дээрээ авч, надаас суралц. Учир нь би дөлгөөн, даруу. Та нар сэргэх болно. Яагаад гэвэл миний буулга эвтэйхэн, миний ачаа хөнгөн» (Матай 11:28–30).

Есүсийн үйл хэрэг: Есүс эелдэг дөлгөөн зантай, харьцахад амар хүн байсан. Тэрбээр хүүхдүүдийг хүртэл хүлээн авч, зовж шаналсан нэгнийг тайвшруулж, бусдыг хүндэтгэдэг байв (Марк 10:13–15; Лук 9:11).

Христийн дагалдагчдын үйлс: Христийн дагалдагч хүн хүмүүстэй эелдэг боловсон ярьдаг бөгөөд бүдүүлэг эсвэл дээрэлхүү зан гаргадаггүй (Эфэс 4:29, 31, 32). Тэд бусдад санаа тавьж туслахыг хичээдэг (Галат 6:10).

Хань ижилдээ үнэнч

Есүсийн үг сургаал: «Бурхны нийлүүлснийг хэн ч бүү салгаг» (Марк 10:9).

Есүсийн үйл хэрэг: Есүс хэдийгээр гэрлэж байгаагүй ч хань ижилдээ үнэнч байхыг гэрлэсэн хосуудад зөвлөжээ (Матай 19:9). Мөн тэрбээр ямар үйлдэл гэр бүлийг сүйрүүлэх аюултайг анхааруулсан (Матай 5:28).

Христийн дагалдагчдын үйлс: Христийн дагалдагчид хань ижлээ үл хүндэтгэсэн аливаа үйлдлийг цээрлэдэг (Еврей 13:4). Гэр бүлийн хосууд бие биеэ хайрлаж хүндэтгэдэг (Эфэс 5:28, 33).