Хүн төрөлхтөн дэлхий дээр амар тайвныг яагаад тогтоож чадахгүй байна вэ?

Библид юу гэж байдаг вэ?

Хүн хэчнээн хичээгээд ч дэлхий дээр амар тайвныг тогтоож чадаагүй бөгөөд ирээдүйд ч чадахгүй. Яагаад гэдгийг авч үзье.

• «Хүний зам өөрт нь байдаггүйг би мэднэ. Өөрийн алхмаа чиглүүлэхээр алхдаг хүнд ч байдаггүйг би мэднэ» (Иеремиа 10:23). Өөрөөр хэлбэл хүн хүнээ захирч чадахгүй. Бурхан хүнийг бүтээхдээ тийм эрх өгөөгүй. Тийм учраас хүн дэлхий дээр амар тайвныг тогтоож чадахгүй.

• Библийн өөр нэг орчуулгад «Хүмүүн удирдагчдад итгэл найдвараа бүү тавь, ямар ч хүн чамайг аварч чадахгүй. Тэд нас бараад газар шороо руугаа буцдаг. Яг тэр өдөр тэдний бүх төлөвлөгөө нурдаг» гэж байдаг. (Дуулал 146:3, 4, «Good News Translation»). Төр засгийн эрх баригчид ард түмнийхээ төлөө гэсэн чин сэтгэлтэй байлаа ч, дайныг өдөөдөг бүх уг үндсийг бүрэн дүүрэн шийдвэрлэж чадахгүй.

• «Эцсийн өдрүүдэд илүү хэцүү цаг ирнэ гэдгийг мэдэж ав. Учир нь хүмүүс ... хэрцгий, сайныг үзэн ядагч, урвагч, бодлогогүй, бардам ихэмсэг» болно (2 Тимот 3:1–4). Бид өнөөгийн бузар муу ертөнцийн «эцсийн өдрүүдэд» амьдарч байгаа учраас эдгээр зан чанартай хүмүүс улам бүр олширч байна. Энэ нь амар тайвныг тогтооход саад болдог.

• «Дэлхий болон тэнгис харамсалтай яа! Яагаад гэвэл Диавол та нар луу бууж очсон. Өөрт нь богинохон хугацаа үлдсэнийг мэдэж байгаа тул тэрээр үлэмж их уур хилэнтэй байгаа» (Илчлэл 12:12). Бурхны дайсан Диавол дэлхий рүү хаягдсан бөгөөд харгис хэрцгий ааш авир, хандлага нь хүмүүст нөлөөлж байна. Сатан Диавол энэ ертөнцийн «захирагч» байсан цагт амар тайван хэзээ ч тогтохгүй (Ёохан 12:31).

• «[Бурхны Хаант төр] тэдгээр бүх хаанчлалыг бутлан сөнөөх боловч өөрөө мөнхөд байх юм» (Даниел 2:44). Дэлхийн дахинд амар тайван тогтоосой гэж хүсдэггүй хүн нэг ч байхгүй. Энэ хүслийг хүний засгийн газар бус, Бурхны Хаант төр биелүүлнэ (Дуулал 145:16).